1 Mwanagwangu, paguvijimira visoweru vyangu na kugashera malagalira gangu, 2 paguyambira likutu lyaku kupikinili luhala na kutula kala moyu gwaku gupati umani, 3 yina, paguluwa gupananwi luhala, pagulonga shondi gupananwi umani, 4 paguyisakula luhala handa madini ga feza na kuyisakula handa luhanja lwalulufifikiti, 5 ndo haguvimani kumtira Mtuwa Mlungu na haguvimani mota ya kummana Mlungu. 6 Toziya Mtuwa Mlungu kawapanana wantu luhala, mumulomu mwakuyi mlawa umani na mahala. 7 Kawatulira yawamfiriziya Mlungu shigibikiru sha luhala luherepa, yomberi ndo ngawu kwa wantu yawalikala kwa waminika. 8 Kawalolera wantu yawalikala na kutenda galii yagamfiriziya Mlungu, nakuwalonguziya wantu yawaliliviyiti kwa yomberi.

9 Pagumpikinira haguvimani mirandu ya nakaka na yayifiruwa kulongolu kwa Mlungu, hagumani mlandu yaguwera teratera na haguvimani njira yayiwera heri. 10 Toziya luhala halwingiri mumoyu mwaku na umani hawuhelipiziyi umuntu waku. 11 Luhala halukuloleri, umani hawukutuliweri, 12 halukulopoli nagutenda makontola, nagupayirwa na wantu yawana visoweru vipotuziya, 13 wantu walii yawaleka kutenda mirandu iherepa, su walikali na kutenda vidoda, 14 wantu yawanemelera kutenda makontola na kufiriziwa na upotuziya wa makontola, 15 wantu weni ng'endu zawu zipotoka na njira zawu zaminikandiri.

16 Luhala halukutendi guwezi kumshapira mdala mhumba, mdala mndiyandiya yakana visoweru vinoga, 17 mdala yakamlekiti mpalu gwa uhinga wakuyi, na kulyaluwa lipatanu lyakalituliti kwa Mlungu gwakuyi. 18 Numba yakuyi yankugenda mukuhowa na matendu gakuyi gamjega pahala pawalikala yawahowiti. 19 Yoseri yakamgendera mdala ayu kawuyandiri nakamu, pota hapakayiwuyiri njira ya ukomu. 20 Hangu gufati mfanu gwa wantu waheri na kulikala na kutenda yagamfiriziya Mtuwa Mlungu. 21 Toziya wantu waheri hawalikali muisi na waminika hawalikali mashaka goseri amu. 22 Kumbiti wakontola hawawusiwi muisi na wanavidoda hawatupulwi amu.