1 Mbaka kuwera na litawu liherepa kuliku lunda zivuwa, uheri ndo uherepa kuliko madini ga feza ama zahabu.

2 Walunda na wahushu walifana mu shintu shimu: Woseri awa Mtuwa Mlungu ndo mnyawa gwawu.

3 Muntu yakalolaweri kawona atali na kulififa, kumbiti wapukapuka wendeleya kulongolu na kulitenda.

4 Pagunanaga na kumguwira Mtuwa Mlungu, hagupati lifupu na lunda na ligoya na ukomu.

5 Njira ya wakontola imema misontu na migomiziwu, kumbiti yulii yakalolera makaliru gakuyi hakalikali kutali na migomiziwu ayi.

6 Gumfundi mwana njira ya kulikala na yomberi hapenikalyaluwi njira ayi mpaka kuuzewi wakuyi.

7 Mlunda kamkolamlima mhushu, yakatola uwanda ndo mmanda gwa yakalaviya uwanda.

8 Yakayala ukontola hakabeni ntabiku, uwezu wakuyi wa kutenda madoda hawuwagamiziwi.

9 Muntu yakalaviya shintu kwa nemeleru hakatekelerwi, mana shiboga shakuyi hakambaguliri mhushu.

10 Gumuwingi yakana beziya na mabishanu hagawuki, kulilewa na mahigirangu haviperi.

11 Yakafira kuwera na moyu guherepa na visoweru vya manemu, hakaweri ganja gwa mfalumi.

12 Mtuwa Mlungu kalolera umani, kumbiti kavivuluga visoweru vya wakontola.

13 Mleri katakula kwana simba kunja, kayi katakula handaguwi kunjira.

14 Mlomu gwa mdala mhumba ndo lirindi litali, yakakalalirwa na Mtuwa Mlungu hakapatukili amu.

15 Upukapuka utawa mumoyu mwa mwana, kumbiti luhonga lwa kuberiziya haluwusilirwi kutali.

16 Yakamzurumu mhushu su kaweri na ulunda, yakawapanana walunda mafupu woseri hawaweli wahushu.

17 Guyambili likutu gupikanili matakulu ga yawana luhala, guloziyi moyu gwaku kwa mafunda gangu,

18 toziya hagunemeleri handa pagugatula mumoyu mwaku, napagugakanta kila shaka.

19 Ata na gwenga nikufunda aga leru, su litumbiru lyaku liweri kwa Mtuwa Mlungu.

20 Nikulembiritindiri matakula selasini? Matakulu ga magambiziya na maberiziya na umani,

21 Su gakufundindiri yagawera nakaka na yagaminika, su muntu pakakukosiya guwezi kumwankula weri?

22 Nagumzurumu mhushu toziya ndo mhushu, pota nagumwima mhushu shilii shakafiruwa kupata kumahakama,

23 toziya Mtuwa Mlungu hakawakomangili, hakawapoki wali yawafira kuwapoka lunda zawu.

24 Nagutenda uganja na muntu yakana maya, pota nagulikola na yakana nkalaliru,

25 Nagwiza kulifunda shakatenda yomberi, nakuliyingiziya nakamu mmugomiziwu.

26 Naguwera yumu gwawu pakati pawalii yawatakula hawalipili wamonga uwanda, ama guweri muntu gwakugolokera wantu mawanda,

27 Payiwera gwahera shoseri ya kulipa, ata shitanda shagugonjera hashitolwi.

28 Naguwusiya shimaniziwu sha mbaka ya makashu yeni itulitwi na wazewi waku.

29 Hashi, kwana muntu yakatenda lihengu lyakuyi kwa ugangamala? Ayu hakawatenderi wafalumi na hakatendi lihengu kwa wantu wamana.