1 Ayi ndo mesali ya Selemani mwana mpalu gwa Dawudi, mfalumi gwa Israeli.

2 Mesali azi viwapanana wantu luhala na migendelanu miheri, su viwatenda wavimani visoweru vya luhala. 3 Mesali azi kayi zimtanga muntu kulikala kwa luhala na kutenda yagamfiriziya Mlungu na kutenda pota kulola uwega woseri. 4 Viwapanana luhala yawahera umani na wantemba umani su waliloleri weri. 5 Yakana luhala kalupikiniri na kongera umani wakuyi na yakana umani kapati mlonguziwu, 6 su muntu kavimani mana ya mesali na mifanu na mana ya visoweru vya wana luhala na vitendawiri vyawu.

7 Kumguwira Mtuwa Mlungu ndo shanjiru sha umani, kumbiti wazigizigi wabeziya luhala na walema kulifunda.

8 Mwanagwangu, gupikanili mlonguziwu gwa tati gwaku, pota nagugaleka mafunda ga mawu gwaku. 9 Aga hagaweri lijenjeri liherepa pamtuwi paku na handa mkufu gwaguherepa msingu mwaku.

10 Mwanagwangu paguzyangwazyangwa na wana vidoda naguwajimira. 11 Pawalonga, tugendi twakamgwadiri muntu na kumlaga; gwizi twakawakomangi yawahera vidoda, 12 tuwamiri pawawera wakomu handa lisembi, waweri handa walii yawapatukira mulirindi litali. 13 Hatupati lunda zoseri za beyi nkulu na numba zyetu hatumemiziyi vintu vyatuvipokiti. 14 Gwizi gulikolani na twenga, vyoseri vyanatupati hatubagulani,

15 mwanagwangu nagulilonguziya nawa, nagugenda nawa, 16 toziya womberi wawera mumbiwu kutenda makontola, wawera kalongola kulaga. 17 Lihengu lya hera mgomiziwu yaguyambirwa agawu wampongu pawaguwona, 18 kumbiti wantu awa wagwadira na kulyagamiziya weni, wayambira mgomiziwu gwa kugomiziya miyoyu yawu weni. 19 Awu ndo upeleru wa wantu yawatola vintu kwa kupoka, ntambu yayilawira kwa muntu yakalikala kwa kupoka.

20 Luhala lishemelanga kwa liziwu mnjira, lubota liziwu lyakuyi kusoku, 21 lushema kwa liziwu mu magomi ga mji, pahala wantu pawalijojonira.

22 Mwenga mwawazigizigi! Mpaka ndii hamwendeleyi kuwera wazigizigi? Mpaka ndii mwenga yamwana beziya hawanemeleri beziya zawu na wazigizigi kukalalira luhala? 23 Mpikiniri makalapira gangu, haniwamintiri maholu gangu, haniwamaniziyi visoweru vyangu. 24 Toziya niwashema mlema kupikanira, niwashemera kwa liwoku mwizi mlema. 25 Mgasherandiri matakula gangu, pota kugashera makalapira gangu, 26 hangu neni haniwaseki palii pamtabika, haniwajongeri pamkangalwa na lyoga, 27 lyoga paliwapata handa shimpepera shikulu, ndo ntabiku zyenu haziwapati handa shizyokutera, shaka utama na ntabiku paviwapata. 28 Panu ndo hamnshemi kumbiti hapeninitiki, hamnsakuli kwa gangamala kumbiti hapenimmpati. 29 Toziya muukalaliriti umani, na mlema kumtira Mtuwa Mlungu. 30 Toziya mlemiti shaniwagambiriti neni, mgapikinirandiri magambiziya gangu. 31 Su hagupati shagufiruwa kupata, na hamtabiki kulawirana na galii yamgatenda. 32 Mana wazigizigi wahowa kwa kulema luhala na wapukapuka wahowa kwa kubeziya kwawu, 33 kumbiti kila yakampikanira hakalikali poneka, hakalikali pota kutira.