1 Shakapanu mona wantu pawatabisiwa pasipanu. Viraa mona masozi ga wantu yawatabisiwa na kwahera ata muntu gwakuwazyangazyanga, mana walii yawawatabisiya wana makakala nentu. 2 Nilihola mumoyu kuwera mbaka wantu yawahowiti kuliku walii yawawera wakomu. 3 Mbaka muntu yakiwukitindiri kuliku wawili awa, toziya mweni hakewoni ukontola ulii yawutendeka pasipanu.

4 Kayi moniti kuwera mahengu goseri na mpatiru zoseri zirawirana na mashindanu ga mpatiru pakati pa wapakwegera. Ashi na sheni shintundiri, ndo handa kutugiziya liyega 5 Mzigizigi katendandiri lihengu na upeleru wakuyi kaliraga kwa njala. 6 Mbaka kuwera na shididini na ponga mumoyu, kuliku kuwera na vivuwa vyana ntabiku. Ayi viraa ndo teratera na kutugiziya liyega.

7 Kayi, moniti mlandu gumonga yagwahera mana nakamu pasipanu. 8 Kuweriti na muntu yakaweriti gweka yakuyi, kaweritindiri na mwana ama mlongu, katenditi lihengu kila lishaka na katosiwandiri na ulunda wakaweriti nawu. Pota kulikosiya, nilitabisiyiti hangu toziya ya gaa na neni ntambu gaa sinda kunemelera? Ashi na sheni ndo shintundiri, ndo lihengu lyana ntabiku.

9 Mbaka wantu wawili yawatenda lihengu pamuhera kuliku muntu gwekayakuyi. Toziya hawalitangi kutenda lihengu weri. 10 Handa yumu pakaguwa, myaguwi hakamgolusiyi. Kumbiti ndo mlandu gwa kuhinginiziya muntu pakaguwa pakawera gwekayakuyi na kahera gwa kumgolosiya. 11 Viraa, wantu wawili pawagonja pamuhera hawahemuki, kumbiti muntu pakawera gweka yakuyi hakahemuki hashi? 12 Mnkondu kaweza kumkanka muntu pakawera gweka yakuyi, kumbiti pawawera wawili waweza kumkomanga mnkondu na kumkanka. Handa ngoyi ntatu pazipotwa pamuhera hapeni zidumuki kalongola.

13 Mbaka mntemba mhushu yakana luhala kuliku mfalumi mzewi mzigizigi, mweni kapikinirandiri shiheri shakagambirwa, 14 ata payiwera mntemba ayu kiwukitindiri mukaya ya shifalumi ama kaweriti mtatirwa na mhushu kaweza kuwera mfalumi. 15 Niwawoniti wantu woseri yawalika pasipanu, wamfatiti mntemba ayu yakaweriti ufalumi. 16 Wantu yakawakolitimlima waweriti wavuwa nentu. Na yomberi kawakolitimlima woseri Ata, walii yanawiwuki pamberi hapeni wamnemeleri. Ashi viraa shintundiri, ndo handa kutugiziya lyega.