1 Guliloleri weri pagugenda kunumba Nkulu Nanagala ya Mlungu. Mbaka kulifunda kuliku kulaviya tambiku handa wazigizigi ntambu yawalaviya tambiku, wantu yawavimanandiri kuwera wankutenda madoda. 2 Nagutakula visoweru vya uzigizigi, pota moyu gwaku kugutenda kalongola kutakula kulongolu kwa Mlungu, mana Mlungu kakumpindi nagwenga gwa pasipanu. Hangu visoweru vyaku viweri vididini. 3 Kulota kwiza pagwana mahengu gavuwa, viravirii visoweru vya mzigizigi shaka pakayowera nentu. 4 Pagutakula shintu kwa Mlungu, nagukawalira kushitenda, toziya Mlungu kafiliziwandiri na wazigizigi. Gutendi shagulongiti. 5 Mbaka nagutakula kuliku kutakula pota kutenda. 6 Nagutakula shintu shanashikutendi gutendi vidoda, viraa nagumgambira mtambika gwa Mlungu handa, ntakuliti pota kufira. Aga hagamtendi Mlungu kaweri na maya na gwenga na kulihalibisiya lihengu lyaku lyoseri lyagutenditi. 7 Handa pagulota nentu ama paguyowera visoweru vivuwa, avi vya manandiri. Shintu sha mana ndo kumpanana ligoya Mlungu na kumjimira.

8 Nagulikangasha paguwona wantu wahushu wankuyonerwa mu isi, toza na haki pavigalambulwa. Mana mkulu yumu kajimira shirii shakagambiritwi na gwa kumpindi gwakuyi nentu.

9 Mpatiru ya isi ndo kwa wantu woseri, ata mfalumi mweni kaliya vyavilawa mumalambu.

10 Muntu yakafira mpiya katoshekanazindiri na yakafira ulunda hapeni kaweri na nemeru. Na ashi viraa ndo shintundiri. 11 Lunda payongereka na yawaliya wongereka. Kumbiti lunda hapayimtangi muntu yakana ulunda, su hakayiloli na upeleru wakuyi hayagamiri kalongola. 12 Shibaluwa kagonja mpota zinoga, ata pakaliya shididini ama shivuwa. Kumbiti ulunda uvuwa umwima mpota mlunda.

13 Kayi moniti mlandu gumonga mkontola nentu pasipanu. Muntu kalimamatiliti lunda na yeni imtangandiri shaka sha ntabiku. 14 Shintu shidoda pashilawira, na kuyitenda lunda ayi yagamiri, upeleru wakuyi, Kahera mpiya yoseri yayisigaliti kwa mwana gwakuyi. 15 Muntu kiwuka pota shintu shoseri, ntambu yakiziti ndo hakawuyi ntambu iraa. Hapeni katoli shoseri shashilawa mulihengu lyakuyi. 16 Mlandu agu viraa guhinginiziya, mana muntu hakawuyi ntambu yakiziti. Nayomberi hakapati shishi kwa kutenda lihengu lyoseri. Mlandu agu ndo teratera na kutugiziya lyega? 17 Makaliru goseri ga mlunda gaweriti ntabiku, kwinginika, magaziwu, malweri na maya.

18 Kumbiti, nivimaniti kuwera mbaka muntu kuliya na kulanda na kunemelera lihengu lyakuyi likamala lyakatenditi pasipanu mumashaka madidini gakapananwiti na Mlungu, mana ashi ndo shakafiruwitwi kupananwa. 19 Handa Mlungu kampanana muntu ulunda na vintu vitangala na kamtenda kavinemeleri na kulonga mayagaashii kulawa mulihengu lyakuyi likamala. Mana aga ndo mafupu kulawa kwa Mlungu. 20 Toziya Mlungu kamtenda muntu kaweri na nemeru, su muntu hapeni kaweri na lyoga mumakaliru gakuyi madidini.