1 Kila shintu shilawira kwa shaka shakuyi pasipanu.

2 Shaka sha kwiwuka na shaka sha kuhowa,

shaka sha kuyala na shaka sha kubenanga,

3 shaka sha kulaga wantu na shaka kuponiziya wantu,

shaka sha kubomola na shaka sha kunyawa,

4 Viraa kwana shaka sha kulira na shaka sha kuseka,

shaka sha kudaya na shaka sha kuvina,

5 Kayi kwana shaka sha kwasa mabuhi na shaka sha kugajojonira mabuhi na kugatendera kayi,

shaka sha kukisikira na shaka sha kuleka kukisikira.

6 Viraa kwana shaka sha kusakula na shaka sha kwagamiziya,

shaka sha kutula weri na shaka sha kwasa,

7 kayi kwana shaka sha kupapula na shaka sha kusona,

shaka sha kunyamala na shaka sha kuyowera,

8 Ntambu iraa kwana shaka sha kufira na shaka sha kulema,

shaka sha nkondu na shaka sha ponga.

9 Mtenda lihengu hakapati shishi kulawirana na lihengu lyakuyi? 10 Neni mona lihengu likamala lyeni Mlungu kampanana muntu, su katabiki. 11 Mlungu kashitenda kila shintu shiweri shiherepa kwa shaka shakuyi. Kampanana muntu kavimani mirandu ayi shaka shoseri, kumbiti kwahera muntu yakavimana shakashitenda Mlungu kulawa kwanja mpaka upeleru. 12 Nivimana kuwera kwa muntu, kwana mlandu gumu hera, gweni ndo kunemelera na kutenda maheri shaka shoseri shakalikala. 13 Twawoseri twenga tufiruwa kuliya na kulanda na kunemelera galii gatugapata. Aga ndo mafiru ga Mlungu.

14 Nivimana handa shoseri shakatenda Mlungu hashilikali mashaka goseri. Kwahera shashiweza kongerwa ama kupungulwa, Mlungu katenda hangu su wantu wamguwiri yomberi. 15 Shintu shoseri shashilawira vinu, shilawiritikala na shanashilawiri shakapanu shilawiritikala. Mlungu katenda kila shintu shilawiri kayi.

16 Viraa, moniti shintu shimonga pasipanu, sheni ndo, pamahakama ukontola ukolamlima, na pahala pa kulaviya shilii shashifiruwa, ukontola ukolamlima. 17 Su, nilihola mumoyu mwangu, "Mlungu hakawatozi woseri yawatenda yagafiruwa na wakontola, toziya hakuweri na shaka kwa kila mlandu na shaka kwa kila lihengu." 18 Viravirii nilitakulira mumoyu mwangu, kuwera Mlungu kawatenda wantu wavimani kuwera womberi ndo handa wankanyama, ndo mana kawajera. 19 Upeleru wa muntu ndo handa wa nkanyama. Ntambu yakahowa muntu ndo ntambu yakahowa nkanyama. Woseri wapumula ntambu yimu, muntu kahera mana kuliku nkanyama. Goseri ndo shintundiri. 20 Woseri wahowa na wagenda pahala pamuhera. Woseri walawa mulidikudiku na hawawuyi mulidikudiku. 21 Gaa yakavimana, handa rohu ya muntu ikwena kulyera ama pambindi na rohu ya nkanyama igenda pasi palitapaka? 22 Hangu mona handa kwahera mrandu yaguherepa nentu kwa muntu, ira kunemelera mahengu gakuyi, toziya aga ndo gakapangiwa. Su gaa yakaweza kumuwuziya kayi kawoni yagafira kulawira shaka pakahowa.