1 Niliholiti namweni panonga, guleki njeri kulinoma na kulinemiziya. Kumbiti nyambuliti kuwera kutenda hangu ndo shintundiri. 2 Ntakula, kuseka shaka shoseri ndo uzigizigi. Hashi hatupati shishi kwa kulinemeziya? 3 Njeriti kulanda ujimbi na kutenda mirandu ya uzigizigi, agawu mahala gangu gankali kunonguziya mu luhala. Nfiriti kuwona loshi ndo liherepa lyawafira kutenda wantu kwa mashaka madidiki gawalikala pasipanu.

4 Ntenditi mirandu mikulu. Nilinyawiriti numba nkulu na kulilimira malambu ga mizabibu. 5 Nyawiti bostani na kuyala mitera ya mabwajubwaju ga kila ntambu. 6 Mbawiti matanda ga mashi ga kwitilira mitera ayi. 7 Hemiriti wamanda wapalu na wadala na wamanda wamonga wiwuka mnumba mwangu. Viraa weriti na ulunda uvuwa wa vipinga vya ng'ombi, kondolu na mbuzi kuliku wakolamlima yawanongoleriti kulikala Yerusalemu pamberi pa neni. 8 Nilijojoniriti mpiya na zaabu, kulawa hanja za wafalumi na kulawa muisi zimonga. Weriti na wimbaji wapalu na wadala, viraa weriti na wadala wa kunja yawampanana nemeru nkulu.

9 Manikiti nentu, kuliku wakolamlima woseri yawalongoleriti kulikala Yerusalemu pamberi paneni, mu goseri aga weriti nanaluhala nentu. 10 Kila shintu shanishifiriti nishipatiti. Toziya moyu gwangu nigwimitindiri nemeru yoseri na gweni gunemeliliti mahengu gangu na alii, ndo lifupu lya lihengu lyangu. 11 Shakapanu nigaholiti goseri yanigatenditi na ntambu yantabikiti kugatenda aga. Panu nivimaniti kuwera goseri ndo shintundiri nakamu, ndo teratera na kutugiziya liyega, na kwahera mota yoseri pasipanu. 12 Shakapanu nanja kulihola mana ya kuwera na luhala, lukwali na uzigizigi.

Shintu gaa mfalumi yakiza kaweza kutenda sheni hashenitendwi? 13 Su, Mona handa luhala ndo luherepa kuliku uzigizigi, gambira ulangala ntambu yauherepa kuliku luwindu. 14 Muntu yakana luhala kawona kwakagenda, kumbiti mzigizigi katyanga muluwindu. Su nivimana kuwera woseri wawili awa upeleru wawu ndo umuhera. 15 Shakapanu nilihola mumoyu mwangu, "Yagafira kumpata mzigizigi hagampati naneni. Ntambu gaa wera na luhala loseri alu?" "Ntakula mumoyu mwangu," "Ali viraa lyahera mana." 16 Toziya kwahera muntu yakanamuholi yakana luhala ama mzigizigi. Mana mashaka yagiza woseri hawalyaluwiki. Ntambu yakahowa yakana luhala na mzigizigi hakahowi ntambuiraa. 17 Hangu, nagakalalira makaliru aga, toziya goseri yagatendeka pasipanu gahinginiziya. Goseri shintundiri nakamu, ndo handa kutugiziya liyega.

18 Nkalaliriti lihengu lyangu lyoseri lyantenditi pasipanu, toziya nfiruwitwi nimlekeri mkolalimlima yakiza. 19 Gaa yakavimana kuwera muntu ayu hakaweri na luhala ama mzigizigi? Hangu yomberi ndo hakakolimlima vyoseri vyantenditi kwa luhala pasipanu. Ali viraa ndo shintundiri nakamu. 20 Su, moyu gwangu gutwezukiti kwa lihengu lyangu lyoseri lyantediti kwa ntabiku pasipanu. 21 Mana, shaka shimonga muntu katenda lihengu kwa kutendera luhala, mahala na umani wakuyi, shakapanu kamlekera muntu gwingi kanemeleri mota ya lihengu lyeni kalitendandiri. Aga na geni gahera mana. Ndo mlandu yagutabisiya. 22 Muntu hakapati shishi kwa lihengu lyakatenditi kwa ntabiku nentu pasipanu? 23 Toziya makaliru gakuyi goseri gamema ntabiku na lihengu lyakuyi ndo magaziya, na pashiru mahala gakuyi goyerandiri. Aga na geni gahera mana.

24 Shintu shiherepa kwa muntu, ndo kuliya na kulanda na kulinemelera lihengu lyakuyi. Ali nalyeni niliwona lilawa kwa Mlungu. 25 Gaa yakaweza kuliya na kunemelera, pota Mlungu? 26 Muntu ulii yakamfiriziya Mlungu, Mlungu kampanana luhala, umani na nemeru, ila yakana vidoda Mlungu kampanana lihengu lya kujojonira na kutula ulunda su Mlungu kampanani ulii yakamfira. Ali na lyeni viraa shintundiri, ndo handa kutugiziya liyega.