1 Handa wavinkozi yawafuwiriti musupa ya utuli kutenda ununki, viravirii uzigizigi mdidini guhalibisiya luhala na ligoya.

2 Moyu gwa yakana luhala gumulonguziya kutenda yagafiruwa, Kumbiti muntu mzigizigi moyu gwakuyi gumlongoziyandiri katendi maheri. 3 Muntu mzigizigi pakatyanga munjira, kalanguziya ungalimahala wakuyi na katenda kila muntu kammani yomberi ndo mzigizigi.

4 Mkolamlima pakakukalalira naguleka lihengu lyaku, makosa gavuwa gaweza kuwusiwa kwa kulinanagaziya.

5 Moniti ukontola pasipanu, weni mkolamlima kawutenditi. 6 Wakolamlima wawapanana wazigizigi lihengu lya ukulu na walunda watola mpenu za pasi. 7 Neni mona wamanda wakwena falasi na wakulu wankugendagenda kwa magulu handa wamanda.

8 Yakabawa lirindi hakawezi kupatukira mweni na yakabomola shibambaza hakawezi kulumwa na njoka. 9 Mpanda mabuwi kaweza kutenduwa na geni, yakasalanga mbawu ziweza kumtenda. 10 Handa liwagu lyaku palikolandiri, hayiweri ikamala kulitendera na paguwera na luhala haguvimani ntambu ya kutenda. 11 Muntu kaweza kumana mgota gwa kumtenda njoka kanyamali, kumbiti njoka pakaluma muntu mgota agu gwahera mana. 12 Visoweru vya yakana luhala vimtenda wantu wampanani ligoya, kumbiti visoweru vya mzigizigi vimwagamiziya mweni. 13 Mzigizigi kanja kutakula visoweru vya ungalimahala na upeleru wa visoweru vyakuyi ndo lukwali. 14 Mzigizigi kalekandiri kutakula. Kumbiti kwahera muntu yakavimana yagafira kulawira,

kwahera yanakafiri kutugambila yanagalawiri patuhowaku

15 Mzigizigi katenda lihengu na kutoka nentu, ata kavimanandiri njira ya kuwuya ukaya kwakuyi.

16 Wantu hawaweri muntabiku payiwera mkolamlima gwakuyi mntemba mzigizigi, viravirii walonguziya wakuyi hawafiri msambu kila lishaka. 17 Itekelerwa isi yeni, mkolamlima gwakuyi kalawa kaya yayipananwa ligoya na walonguziya wakuyi watenda msambu shaka shashifaa, kwajili ya kupata likakala na toziyandiri ya kulowera.

18 Handa muntu pakawera mleli shitwiku sha numba hashing'ong'onali na kwa uleli wakuyi kayitenda numba yakuyi isumi.

19 Msambu gwa shiboga na divayi vitutenda tukalamuki na kuwera na nemeru, kumbiti gufiruwa kuwera na mpiya su kuhemera vyoseri avi.

20 Nagumlonga mfalumi ata mumaholu gaku, ama kumpangira mlunda mushumba shaku sha kugonja, toziya wampongu wa kuliyera waweza kutola visoweru vyaku na mpongu yakaguluka kaweza kubwera visoweru vyaku vyagutakuliti.