1 Guwapanani wantu vintu vyaku kwa moyu gwa kufira, handa pagutenda hangu lishaka limu haguwuzilirwi. 2 Guwapanani wantu saba ama nani vintu vyaguweranavi, toziya guvimanindiri lishaka lya ntabiku ntambu yalyanakupati.

3 Mawundi pagamema mashi, mvula itowa muisi. Mtera paguguwira kusika ama kushana, paguguwiriti hagugonjeri palaa. 4 Yakahepera lyega hapeni kayali mbeyu, yakahepera mawundi gagamili, hapeni kabenangi shintu. 5 Ntambu yaguvimanandiri njira ya lyega ama nshimba ntambu yayiwumbwa mngati mwa mtima gwa mawu, ntambu iraa guvimanandiri lihengu lya Mlungu, mnyawa gwa vintu vyoseri. 6 Guyali mbeyu mandawira na pashimihi naguleka kuyala, mana guvimanandiri hazimeri zyoshi, zya mandawira ama zya pashimihi ama zoseri haziweri ziherepa.

7 Kulangala kuwatenda wantu wanemeleri. Nakugulola mshenji gwa mandawira gufiriziya. 8 Muntu pakalikala vinja vivuwa na kavinemeleri vinja vyoseri avi, kumbiti kaliholi kuwera mashaka gakuyi hagaweri gatangala na goseri yakafata hagaheri mana.

9 Gwee mntemba, gunemeleri untemba waku, moyu gwaku gukalamki shaka gwankali mntemba. Goseri gagugawona na kugafira gugatendi. Kumbiti guliholi kuwera Mlungu hakakutozi kwa goseri aga gagutenda.

10 Su naguwera na lyoga mumoyu mwaku na gwasiri kutali magaziwu ga nshimba yaku, toziya untemba na makakala shintundiri.