1 Akava ulo ano vreme e Kserksesoro, okolesoro kova vladinđa upreder šelu bišu efta regije oti Indija đi o Kuš. 2 Ano adava vreme o caro o Kserks vladinđa oto plo carikano prestolje ani palata savi inele ani diz Suza.

3 Ko trito berš oti pli vladavina ćerđa bari gozba zako sa ple šerutne hem službenici, pa maškaro lende arakhle pe o persijska hem o međanska šerutne, o plemićija hem o upravnici oto regije. 4 I gozba inele šelu oftovardeš dive, a zako sa adava vreme o caro mothovđa lenđe o barvalipe, i slava hem o šukaripa lesere carstvostar.

5 Palo adava, o caro andre ano vrt oti pli palata ćerđa gozba savi inele efta dive zako sa o narodo, oto najtikoro đi o najbaro, savo inele ki palata ani diz Suza. 6 O vrt inele ukrasime parne hem plavone zavesencar oto lan save inele phandle dorikhencar oto šužo ljubičasto platno ko srebrna alke upro stubija oto mermer. A o zlatna hem o srebrna thana zako pašljojba inele ko pod ćerdo oto porfir, oto sedef, oto mermer, hem oto aver dragocena bara. 7 I mol služinđa pe ano zlatna peharija, savo svako olendar inele averčhane ukrasime, a i carikani mol inele edobor but hem o caro darežljivo dela la ine. 8 Pali e carosiri naredba, o vičime šaj ine te pijen kad hem kobor mangle, dok o caro naredinđa e slugenđe te ugodinen e gostonenđe.

9 A i carica i Vašti ani carikani palata e carosiri e Kserksesiri ćerđa gozba zako đuvlja. 10 Ko eftato dive, kad o caro inele oraspoložime oti mol, ov phenđa e Mehumanese, e Biztese, e Harvonase, e Bigtese, e Avagtese, e Zetarese hem e Karkase, e eftane evnuhenđe kola služinde lese, 11 te anen anglo leste e carica e Vašti e carikana krunaja ko šero, te mothoj e narodose hem e šerutnenđe lakoro šužipe, adalese so i Vašti inele but šuži. 12 Ali, kad o evnuhija phende laće e carosiri naredba, i carica i Vašti odbinđa te džal. Ko adava o caro but holjanđa hem ana peste ka pharjol ine oti holi.

13 I adalese so e caro ine adeti te savetujini pe e manušencar kola inele stručna zako zakoni hem zaki pravda, ov vičinđa e mudrakonen kola džande te haljoven o vremenja 14 hem okolen kolai lesere najpaše – e Karšene, e Šetare, e Admate, e Taršiše, e Merese, e Marsene hem e Memuhane, e eftane šerutnen oti Persija hem Medija kolenđe inele muklo phravdeste te vaćeren so mislinena hem kolen inele najbaro položaj ano carstvo. 15 O caro pučlja len: "So palo zakoni valjani te ćerel pe e caricaja e Vaštinaja adalese so na šunđa i naredba e carosiri savi phende laće o evnuhija?"

16 Tegani o Memuhan phenđa anglo caro hem anglo šerutne: "I carica i Vašti na grešinđa samo protiv o caro nego hem protiv sa o šerutne hem protiv sa o narodo oto regije e carosere e Kserksesere. 17 Adalese so, sa o đuvlja ka dodžanen zako e caricakoro ponašanje pa naka poštujinen pumare romen hem ka phenen: ‘O caro o Kserks naredinđa te anel pe anglo leste i carica i Vašti, a oj na ali.’ 18 I kobor avdive romnja oto persijska hem međanska šerutne kola šunde zako e caricakoro ponašanje ka vaćeren isto ađahar ple romenđe, pa naka ovel kraj zako nepoštujiba hem zaki holi. 19 Adalese, tei e carose pali volja nek del carikano proglas da i carica i Vašti više na tromal te ikljol anglo caro o Kserks hem nek adava proglas upisini pe maškaro persijska hem međanska zakonja, save našti te menjinen pe. Hem nek o caro lakoro carikano položaj del averaće kojai po šukar olatar. 20 Tegani, kad ka mothoj pe e carosoro proglas maškaro sa lesoro baro carstvo, sa o romnja ka poštujinen ple romen, bilo te oven čorore ili barvale."

21 Akava savet sviđinđa pe e carose hem lesere šerutnenđe, pa o caro ćerđa ađahar sar so predložinđa lese o Memuhan. 22 Bičhalđa proglas ano sa o regije oto carstvo, svakona regijaće ađahar sar so adari pisinena hem svakone narodose ki lesiri čhib. Ano lil terđola ine da svako manuš valjani te ovel gospodari ano plo čher hem te vaćeri i čhib ple narodosiri.