1 Ko dešu trito dive ano dešu dujto masek, vičime adar, alo o vreme te izvršini pe e carosoro proglas, o neprijatelja e Jevrejengere nadinde pe da ka vladinen upro lende, ali sa preirinđa pe kad o Jevreja dobinde vlast upro okolende kola mrzinde len.

2 O Jevreja čedinde pe ano pumare dizja ano sa o regije e carosere e Kserksesere, te napadinen okolen kola olenđe mangle bišukaripe. Niko našti ine te suprotstavini pe lenđe, adalese so o manuša taro avera nacije darandile olendar. 3 Sa o šerutne ano regije, e carosere narednici hem e carosere službenici pomožinde e Jevrejenđe adalese so darandile oto Mardohej. 4 Adalese so e Mardoheje inele baro uticaj ani palata e carosiri, o glaso olestar šundilo ano sa o regije, hem ov ulo sa po baro.

5 Ađahar o Jevreja napadinde mačeja sa pumare neprijateljen, mudarđe len hem uništinde len. E manušenđe, kola mrzinde len, ćerde sa so mangle. 6 Samo ani palata ani diz Suza o Jevreja mudarde hem uništinde panšel manušen. 7 Maškaro lende mudarde ine e Paršandate, e Dalfone, e Aspate, 8 e Porate, e Adalie, e Aridate, 9 e Parmašte, e Arisaje, e Aridaje hem e Vajzate. 10 On inele deš čhave e Hamanesere, o čhavo e Hamedatinesoro, o neprijatelj e Jevrejengoro. Mudarde len, ali na lelje ništa sar plen.

11 Ko isto adava dive e carose javinde o broj e mudardengoro ani palata ani diz Suza. 12 Ko adava o caro phenđa e caricaće e Jestiraće: "O Jevreja ani palata ani diz Suza mudarde hem uništinde panšel manušen hem e Hamanesere deše čhaven. So li tek ćerde ano avera regije e carosere? Onda, savi ti molba? Ka ovel će uslišime. Hem savoi to zahtev? Hem ov ka ovel će ispunime."

13 I Jestira phenđa: "Tei e carose pali volja, muk e Jevrejenđe ani Suza hem tejsa te ćeren palo avdisutno proglas hem o mule telija e Hamanesere deše čhavengere te oven obesime ko vešala."

14 O caro naredinđa te ćerel pe baš ađahar. Dindoi o proglas ani Suza hem o mule telija e Hamanesere deše čhavengoro obesinde. 15 O Jevreja tari Suza čedinde pe hem ko dešu štarto dive ano masek adar hem mudarde trišel muršen ani Suza. Ali na lelje ništa sar plen.

16 Hem avera Jevreja, okola kola živinde ano regije e carosere, čedinde pe te braninen taro neprijatelja pumaro dživdipe hem pumaro mir. Mudarde eftavardešu pandž hiljade dženen, ali na lelje ništa sar plen. 17 Adava inele ko dešu trito dive ano masek adar. Ko dešu štarto dive odmorinde pe hem adava dive proglasinde dive zaki gozba hem veselje. 18 A o Jevreja tari Suza čedinde pe ko dešu trito hem ko dešu štarto dive, a ko dešu pandžto dive odmorinde pe hem adava dive proglasinde dive zaki gozba hem veselje. 19 Zbog adalese o gavale Jevreja slavinena o dešu štarto dive ano masek adar sar dive zako veselje hem zaki gozba hem maškara pumende dena o hajba sar darija.

20 O Mardohej zabeležinđa sa akava so ulo hem bičhalđa lila sa e Jevrejenđe kolai paše hem kolai dur ano regije e carosere e Kserksesere vaćerindoj lenđe 21 te slavinen svako berš o dešu štarto hem o dešu pandžto dive ano masek adar 22 sar dive kad o Jevreja odmorinde pe pumare neprijateljendar hem sar masek kad lengiri tuga irinđa pe ani radost, a o žalost ano dive e slavibnasoro, hem adala dive te slavinen sar dive zako veselje hem zaki gozba, maškara pumende te den o hajba sar darija hem te darujinen e čororen. 23 O Jevreja prihvatinde te nastavinen okova so lelje te ćeren, ćerindoj ađahar sar so pisinđa lenđe o Mardohej.

24 Adalese so, o Haman, o Agagavco, o čhavo e Hamedatinesoro, o neprijatelj sa e Jevrejengoro, ćerđa plan te mudaren pe o Jevreja, pa frdinđa o barbuti vičime "pur" sar te odredini o dive zako lengoro propast hem uništenje. 25 Ali i Jestira anglo caro zastupinđa zako plo narodo hem o caro dinđa proglas i zavera savi ćerđa o Haman protiv o Jevreja te irini pe protiv oleste, pa o Haman hem lesere čhave inele obesime ko vešala. 26 Adalese adala dive vičinde Purim, palo lafi "pur".

Zbog sa so inele pisime ano lil e Mardohejesoro hem zbog sa so dikhle hem sa so ulo, 27 o Jevreja odlučinde te na čhinaven akava adeti, ađahar on hem lengere čhave, hem sa okola kola pridružinena pe lenđe, svako berš te proslavinen adala duj dive ko način savoi lenđe pisime hem ano odredime vreme. 28 Adala dive valjani te setinen pe hem te slavinen svako porodica ani svako generacija, ani svako regija hem ani svako diz. O Jevreja na troman nikad te ačhaven te slavinen adala dive oto Purim, niti te bisterđol adava maškaro lengere potomci.

29 I carica i Jestira i čhaj e Avihajilesiri hem o Mardohej o Jevrejco pisinde aver lil ano autoritet sar te potvrdinen o proglas oto prazniko Purim. 30 O Mardohej sa e Jevrejenđe ano sa o šelu bišu efta regije oto carstvo e Kserksesoro bičhalđa poruka oto mir hem oti sigurnost, 31 te proglasinen o prazniko Purim ano odredime vreme hem te proslavinen ko način sar so odredinde o Mardohej o Jevrejco hem i carica i Jestira. Isto ađahar, o Jevreja zako pumenđe hem zako pumare potomci odredinde o vreme ano berš zako post hem zaki žalost. 32 Ađahar e Jestirakiri naredba potvrdinđa akala odredbe zako Purim hem adava inele zapisime ani knjiga.