1 Ko isto adava dive o caro Kserks dinđa e caricaće e Jestiraće o imanje e Hamanesoro, o neprijatelj e Jevrejengoro. A hem o Mardohej iklilo anglo caro, adalese so i Jestira phenđa e carose soi laće ov. 2 O caro huljavđa pli angrustik e pečateja, savi lelja oto Haman, pa dinđa la e Mardohejese, a i Jestira čhivđa e Mardoheje te upravini e Hamanesere imanjeja.

3 Palo adava i Jestira palem vaćerđa e caroja. Peli anglo lesere pre hem rundoj molinđa le zaki milost te cidel i zavera e Hamanesiri e Agagavcosiri hem lesoro plan savo ćerđa protiv o Jevreja. 4 O caro pružinđa plo zlatno žezlo premali Jestira, hem oj uštini hem terdini anglo leste.

5 I Jestira phenđa: "Tei e carose pali volja hem te arakhljum milost anglo leste hem te mislini dai šukar ađahar te ćerel pe, hem te injum lese pali volja, nek pisini pe dai poništime o proglas savo o Haman, o Agagavco, o čhavo e Hamedatinesoro, smislinđa hem pisinđa te uništini e Jevrejen ano sa o regije e carosere. 6 Adalese so, sar bi šaj te dikhav o bišukaripe savo bi arakhi mle narodo? Sar bi šaj te dikhav o uništenje mla porodicakoro?"

7 O caro o Kserks phenđa e caricaće e Jestiraće hem e Mardohejese e Jevrejcose: "Ače, o imanje e Hamanesoro dinđum e Jestiraće, kole obesinde ko vešala adalese so vazdinđa plo vas upro Jevreja. 8 Akana hem tumen pisinen okova so smatrinena dai šukar zaki korist e Jevrejenđe, ano anav e carosoro, hem zapečatinen e carosere angrustikakere pečateja. Adalese so, nijekh proglas savoi pisime ano anav e carosoro hem zapečatime lesere angrustikaja našti poništini pe."

9 Tegani, ko bišu trito dive ano trito masek, vičime sivan, vičinde e carosere pisaren hem on pisinde sa e Mardohejesere naredbe zako Jevreja hem zako e carosere narednici, zako upravnici hem zako šerutne oto šelu bišu efta regije oti Indija đi ko Kuš. Svakona regijaće inele pisime ađahar sar so adari pisinena hem svakone narodose ki lesiri čhib, a ađahar hem e Jevrejenđe sar so on pisinena hem ki lengiri čhib. 10 O Mardohej pisinđa o lila ano anav e carosoro e Kserksesoro, zapečatinđa e carosere angrustikaja hem bičhalđa palo glasnici kola jašinde najbrzone grasten tari e carosiri štala.

11 O proglas e carosoro muklja e Jevrejenđe ani svako diz te čeden pe hem te braninen pumaro dživdipe, te mudaren hem te uništinen svakona neprijateljskona vojska bilo oto savo narodo ili regije save napadinena len, lengere čhavoren hem lengere romnjen, hem te len sar plen o barvalipe lengere neprijateljengoro. 12 Sa adava ine lenđe dindo te ćeren ano sa o regije oto carstvo e Kserksesoro ko dešu trito dive ano dešu dujto masek, vičime adar. 13 O prepis oto akava proglas valjanđa te ovel zakoni ani svako regija hem te mothoj pe sa e narodenđe sar te šaj o Jevreja adava dive oven spremna te osvetinen pe pumare neprijateljenđe. 14 Pali naredba e carosiri, o glasnici kola jašinde e najbrzone grasten tari e carosiri štala legarde o proglas savo inele mothovdo hem ani palata ani diz Suza.

15 Kad o Mardohej iklilo tari palata e carosiri, akharđa parne hem plava carikane šeja, bari zlatno kruna hem ljubičasto sano laneno ogrtači. A ani diz Suza inele baro veselje hem radost. 16 Zako Jevreja adava inele vreme oto bahtalipe, oti radost, oto veselje hem oti čast. 17 Ani svako regija hem ani svako diz, ano svako than ano savo alo e carosoro proglas, lelja te ovel veselje, radost hem gozba maškaro Jevreja. But manuša oto avera narodija ule Jevreja, adalese so uklinđa len dar oto Jevreja.