1 Ađahar o caro hem o Haman palem ale ki gozba kori carica i Jestira.

2 Ko dujto dive oti gozba sar pijena ine mol, o caro palem pučlja: "Savi ti molba, carice Jestiro? Ka ovel će uslišime. Hem so mangeja? Tei hem ekvaš oto carstvo, ka del pe će."

3 A i carica i Jestira phenđa: "Te arakhljum milost angla caro, hem tei e carose pali volja, te poklonini dživdipe maje hem mle narodose. Adavai mli molba hem okova so mangava. 4 Adalese so, me hem mlo narodo biknime injam te ova mudarde, čhinde hem uništime. Te ova ine samo biknime te ova robija hem ropkinje, ka trainav ine, adalese so esavki nevolja naka ovel ine ki šteta e carose."

5 Ko adava o caro o Kserks pučlja e carica e Jestira: "Kovai adava? Kaj adava manuš kova usudinđa pe te ćerel ađahar nešto?"

6 A i Jestira phenđa: "Amaroi protivniko hem neprijatelj o Haman, ovi adava bišukar manuš kova bešela avdive amencar."

Ko adava e Hamane prelelja bari dar anglo caro hem i carica.

7 Tegani o caro holjame uštino, ačhavđa i mol hem iklilo ano vrt e palatakoro. A o Haman, dikhindoj so o caro već odlučinđa so ka ćerel oleja, ačhilo te molini e carica e Jestira zako plo dživdipe. 8 Kad o caro irinđa pe oto vrt e palatakoro andre kaj inele i gozba, o Haman frdinđa pe upro than kaj pašljola ine i carica i Jestira.

A o caro vičinđa: "Pa zar akava manuš angla mande ka napadini e carica dok me injum ano čher?"

I samo so phenđa ine o caro adava, odmah dolinde e Hamane.

9 Tegani o Harvona, jekh oto evnuhija kola služinena e carose phenđa: "Eče o vešala save o Haman vazdinđa zako Mardohej, kova e carose javinđa zaki zavera. O vešalai uče bišu pandž metarija hem terđona uzalo e Hamanesoro čher."

O caro phenđa: "Obesinen le upro lende."

10 I obesinde e Hamane ko vešala save ov pripreminđa e Mardohejese.

Tegani nakhini e carosiri holi.