1 Palo nesavo vreme, kad nakhini i holi e carosiri e Kserksesiri, ov setinđa pe oti Vašti, oto okova so oj ćerđa hem okova so inele odlučime protiv late.

2 Tegani e carosere lična sluge phende: "Nek roden pe terne šuže čhaja e carose. 3 Nek o caro ano sa o regije oto plo carstvo odredini manušen oto poverenje kola sa adale šuže čhajen ka anen ano harem ani palata ani diz Suza. Nek olendar brinini pe e carosoro evnuho o Hegaj, kovai zadužime zako đuvlja, hem ov nek del len sa so valjani lenđe zaki nega. 4 Okoja čhaj koja e carose najviše ka sviđini pe, nek ovel carica umesto i Vašti."

Akava predlog sviđinđa pe e carose, pa ov ađahar hem ćerđa.

5 A ani palata ani diz Suza inele hem jekh Jevrejco taro e Venijaminesoro pleme palo anav Mardohej, kova inele čhavo e Jairesoro, unuko e Šimijasoro, praunuko e Kisesoro. 6 Ole taro Jerusalim zajedno avere robonencar kolen e Jehonijaja, e caroja oti Juda, legarđa o Navuhodonosor, o caro oto Vavilon. 7 O Mardohej barjarđa e Hadasa – e Jestira – ple kakosere čhaja, adalese so ola na ine ni daj ni dad. I čhaj inele but šuži hem zgodno, a o Mardohej, palo meriba lakere dadesoro hem dajakoro, lelja la kora peste sar pla čhaja.

8 Kad šundili e carosiri naredba hem o proglas, ani palata ani diz Suza ande bute čhajen hem poverinde len e Hegajese te brinini olendar. Ađahar hem e Jestira legarde ani e carosiri palata hem poverinde la e Hegajese, kova inele zadužime zako đuvlja. 9 E Hegajese sviđinđa pe i čhaj hem ov inele šukar premalo late, i revno brininđa pe zaki olakiri nega hem zako sa so sledujinđa laće. Dinđa la hem eftane najšukare sluškinjen oti palata e carosiri, pa ola hem lakere sluškinjen preselinđa ano najšukar deo oto harem.

10 A i Jestira na vaćeri ine ple narodostar hem pla familijatar, adalese so o Mardohej naredinđa laće te na vaćeri adalestar. 11 Ov svako dive phirela ine upre tele anglo boro e haremesoro sar te dodžanel sari i Jestira hem so ka ovel olaja.

12 Svako čhaj bi avela ko redo te džal koro caro o Kserks, kad bi završini pe ine lakiri nega oto dešu duj masek, premali odredba zako đuvlja. Edobor trajini ine lengoro srediba: šov masek uljeja oti smirna hem šov masek mirisencar hem avere sredstvonencar. 13 A i čhaj bi ađahar džala koro caro: bi ovela laće dindo sa so bi rodela te legari peja taro harem ani palata e carosiri. 14 Raćate bi džala koro caro, a sabale bi irini pe ano dujto deo e haremesoro hem bi ovela predime ki briga e Šašgazese, e carosere evnuhose hem nadglednikose oto e carosere romnja-ropkinje. Oj ne bi palem džala koro caro sem te oj sviđini pe lese hem te o caro vičini la kora peste palo anav.

15 Kad alo o redo đi i Jestira – kola usvojinđa o Mardohej hem koja inele čhaj lesere kakosiri e Avihajilesiri – te džal koro caro, oj na rodinđa ništa sem okolestar so predložinđa laće o Hegaj, o evnuho e carosoro kovai zadužime zako đuvlja. Adaleja i Jestira ćerđa te oven zadivime avera kola dikhle la. 16 E Jestira legarde koro caro o Kserks, ani lesiri carikani palata, ko dešto masek, vičime tevet, ko eftato berš oti lesiri vladavina.

17 O caro zavolinđa e Jestira više oto sa avera đuvlja hem oj arakhlja milost hem naklonost anglo leste više nego bilo savi aver čhaj. Ov čhivđa laće carikani kruna ko šero hem ćerđa la te ovel carica umesto i Vašti. 18 Tegani o caro e Jestiraće ani čast ćerđa bari gozba, zako sa ple šerutne hem službenici, proglasinđa prazniko ko sa o regije hem razdelinđa darija ađahar sar so dolikujini zaki e carosiri darežljivost.

19 Kad čedinde e čhajen palo dujto puti, o Mardohej terđola ine ki carikani kapija.* 20 A i Jestira na vaćeri ine ple narodostar hem ple familijatar, sar so o Mardohej naredinđa laće, adalese so pana ićerđa pe ko e Mardohejesere lafija, sar so ćerela ine adava dok barjarđa la.

21 Zako vreme kad o Mardohej terđola ine ki carikani kapija, o Bigtan hem o Tereš, o duj evnuhija e carosere kola pazinena ine o ulaz, holjande upro caro o Kserks hem lelje te ćeren plan te mudaren le. 22 Ali o Mardohej dodžanđa zako adava plan hem phenđa e caricaće e Jestiraće, a oj phenđa e carose ano e Mardohejesoro anav. 23 Kad o plan razotkrijinđa pe hem kad šundilo dai čačikano, okole dujen obesinde ko kaš. Sai adava anglo caro zapisime ani knjiga kaj inele zapisime e carosere istorijska zapisija.