1 Palo akala događaja, o caro o Kserks mothovđa čast e Hamanese e Agagavcose, e Hamedatinesere čhavese. Čhivđa le ko najbaro položaj upreder sa avera šerutne kola služinde oleja. 2 Sa e carosere službenici ki e carosiri kapija pele ko kočija hem pokloninde pe te den čast e Hamanese, adalese so ađahar naredinđa o caro zako lese. Ali o Mardohej na pelo ko kočija niti dinđa le čast.

3 Tegani e carosere službenici ki e carosiri kapija pučle e Mardoheje: "Sose phageja e carosiri naredba?"

4 I ađahar vaćerena lese ine taro dive ko dive, ali ov na šunđa len. Adalese on adava vaćerde e Hamanese, te dikhen da li vredini e Mardohejesoro opravdanje, adalese so phenđa lenđe dai ov Jevrejco. 5 Kad o Haman dikhlja da o Mardohej na perela ko kočija hem na poklonini pe lese sar te del le čast, but holjanđa. 6 Ali kad dodžanđa save narodose o Mardohej pripadini, hari ine lese te mudari samo e Mardoheje, pa rodinđa te mudari sa e Jevrejen ano celo carstvo e Kserksesoro. 7 Ko dešu dujto berš oti vladavina e carosiri e Kserksesiri, ano prvo masek, vičime nisan, frdinde anglo Haman o barbuti vičime pur sar te odredinen o dive hem o masek kad ka ćeren adava, hem o barbuti pelo ko dešu dujto masek, vičime adar.

8 Tegani o Haman phenđa e carose e Kserksese: "Isi jekh narodo rasejime hem rasfrdime ko sa o regije ano to carstvo, kaserei adetija averčhane oto adetija sa avere narodengere hem savo na pokorini pe e carosere zakonenđe. Adalese nane šukar e carose te trpini esavke narodo. 9 Tei e carose pali volja, nek del naredba te mudari pe adale narodo, a me ka dav trišelu saranda hiljade kilja srebro ani e carosiri riznica prekalo okolende kola ka ćeren adava."

10 O caro huljavđa pli angrustik e pečateja hem dinđa la e Hamanese, e jevrejengere neprijateljese, 11 pa phenđa lese: "Nek ačhol adava srebro tuće hem ćer adale narodoja so god mangeja."

12 Palo adava, ko dešu trito dive ano prvo masek, vičinde e carosere pisaren, kola e carosere narednikonenđe, e upravnikonenđe oto razna regije hem e šerutnenđe oto razna narodija pisinde sa e Hamanesere naredbe svakona regijaće ađahar sar so adari pisinena hem ki čhib svakone narodosiri. A pisinde len ano anav e carosoro e Kserksesoro hem zapečatinde lesere angrustikaja. 13 O proglasija bičhalde palo glasnici ano sa e carosere regije. Naredimei te ispudinen, te mudaren hem te uništinen sa e Jevrejen – ternen hem puranen, čhavoren hem đuvljen – ano jekh dive, o dešu trito dive oto masek adar, hem te lel pe lendar sa okova so isi len. 14 O prepis oto proglas valjanđa te ovel zakoni ani svako regija hem te ovel mothovdo sa e narodenđe sar te oven spremna zako adava dive. 15 Pali e carosiri naredba, o glasnici siđarde te legaren o proglas. O proglas mothovde hem ani palata oti diz Suza. Tegani o caro hem o Haman bešle te pijen, a ani diz Suza uli pometnja.