1 Kad o Mardohej dodžanđa adava so ulo, pharavđa o šeja upra peste, urđa pe ano kostret hem čhorđa pepeo upra peste, pa dželo ani diz hem sa glasoja phareste runđa. 2 Reslo đi ki kapija e carosiri, ali na inele muklo nikase te đerdini ko inele urjavdo ano kostret. 3 Ani svako regija ani savi reslo e carosoro proglas hem lesiri naredba uli bari žalost maškaro Jevreja. Postinde, runde hem kukinde, a but džene olendar pašljona ine ano kostret hem ano pepeo. 4 Kad e Jestirakere sluškinje hem o evnuhija ale koro late hem kad javinde laće adava, i carica but uznemirinđa pe. Oj bičhalđa šeja e Mardohejese te urjel len umesto o kostret, ali ov odbinđa.

5 Tegani i Jestira vičinđa e Hatahe, jekhe oto e carosere evnuhija, kova inele odredime te služini laće, hem naredinđa lese te dodžanel oto Mardohej so ulo hem sose. 6 O Hatah dželo koro Mardohej ko trg e dizjakoro angli e carosiri kapija. 7 A o Mardohej vaćerđa lese sa so ulo hem o tačno iznos e parengoro savo o Haman obećinđa da ka del ani e carosiri riznica sar te oven o Jevreja mudarde. 8 Dinđa le hem o prepis oto proglas zako lengoro uništenje, savoi mothovdo ani Suza, te mothoj hem te objasnini e Jestiraće, hem vaćerđa lese te phenel laće te džal koro caro te molini le zaki milost hem te zastupini zako plo narodo anglo leste.

9 O Hatah irinđa pe hem vaćerđa e Jestiraće so phenđa lese o Mardohej, 10 a oj naredinđa lese so te phenel e Mardohejese: 11 "Sa e carosere službenici hem o narodo oto e carosere regije džanen da zako svako murš ili đuvli kola bivičime avena ano unutrašnjo boro paše anglo caro, isi samo jekh zakoni: te oven mudarde – sem te o caro na pružini lese plo zlatno žezlo hem na poštedini lesoro dživdipe. A me već trijanda dive na injum vičime te džav koro caro."

12 Kad vaćerde e Mardohejese e Jestirakere lafija, 13 ov ađahar phenđa laće: "Ma te misline da jedino tu ka spasine tut oto sa avera Jevreja samo adalese so injan ani e carosiri palata. 14 Adalese so, te akana trainđan, o pomoć hem o izbavljenje e Jevrejenđe ka avel taro aver than, a tu hem ti porodica ka properen. I ko džanel na li tu uljan carica baš zbog akava trenutko."

15 Tegani i Jestira phenđa te vaćeren e Mardohejese: 16 "Dža hem čede sa e Jevrejen kolai ani Suza, pa postinen zako maje. Ma han hem ma pijen trin dive, ni raćate ni diveste. Ađahar ka postina hem me hem mle sluškinje. Onda ka džav koro caro, iakoi adava protiv o zakoni, pa i te muljum, nek merav."

17 Ađahar o Mardohej dželo hem ćerđa sa sar so naredinđa lese i Jestira.