1 Adaja rat o caro našti ine te sovel, pa naredinđa te anen lese i knjiga oto službena istorijska zapisija, pa te čitinen lese olatar. 2 Adari arakhlja pe zapisime da o Mardohej razotkrijinđa e Bigtane hem e Tereše, e duje e carosere evnuhen kola pazinde o ulaz, kola mangle te mudaren e caro e Kserkse.

3 Tegani o caro pučlja: "Savo čast hem priznanje o Mardohej dobinđa zako akava?"

E carosere lična sluge phende: "Baš ništa na dobinđa adalese."

4 O caro pučlja: "Koi adava ano boro?"

A adava inele o Haman kova samo so đerdinđa ko boro oti palata te rodel e carostar o Mardohej te ovel obesime ko vešala save pripreminđa lese.

5 E carosere sluge phende: "Adavai o Haman, terđola ano boro."

Tegani o caro phenđa: "Nek đerdini."

6 Kad o Haman đerdinđa, o caro pučlja le: "So valjani te ćerel pe e manušese kolese o caro mangela te del čast?"

O Haman mislinđa ana peste: "Kase o caro ka del čast te na maje?"

7 Adalese phenđa e carose: "E manušese kase o caro mangela te del čast 8 valjani te del pe carikane šeja save korkoro o caro akharđa hem te anel pe o gras save korkoro o caro jašinđa hem savesei upro šero čhivdo o carikano venco. 9 Palo adava nek o šeja hem o gras poverinen pe jekhese oto e carosere plemićija, kova ka urjel e manuše kase korkoro o caro mangela te del čast hem upro gras te nakhaj le maškaro e dizjakoro trg, vičindoj anglo leste: ‘Ađahar ćerela pe e manušeja kase o caro mangela te del čast!’ "

10 Tegani o caro naredinđa e Hamanese: "Odmah le o šeja hem e graste, pa zako Jevrejco o Mardohej, kova bešela angli kapija e carosiri, ćer sa sar so phenđan. I ma te na ćere nešto okolestar so phenđan."

11 Ađahar o Haman lelja o šeja hem e graste, pa urjavđa e Mardoheje hem upro gras nakhavđa le maškaro e dizjakoro trg, vičindoj anglo leste: "Ađahar ćerela pe e manušeja kase o caro mangela te del čast!"

12 Palo adava o Mardohej irinđa pe ki kapija e carosiri, a o Haman siđarđa čhere, ožalostime hem učharde šereja, 13 pa phenđa pla romnjaće e Zerešaće hem sa ple amalenđe oto sa so ulo lese.

Lesere savetnici hem olesiri romni i Zereš phende: "Tei o Mardohej potomko e Jevrejengoro, a tu već leljan te pere anglo leste, naka ovel tut zoralipe te suprotstavine tut lese. Sigurno ka pere anglo leste."

14 Hem sar on pana vaćerena ine oleja, ale e carosere evnuhija hem ki sig legarde e Hamane ki gozba savi i Jestira pripreminđa.