1 Nena-ne dolabololo-dolabololo ra Salomo Israel manga 'olana, 'a Daud 'ai ngowa'a nau'u.

2 Dolabololo gena-ge ma maksudu di'a riono ngowa-ngowa'a, la 'aḏi sanga 'akala soro'unu re do-doto'o mangale 'adata re 'atoranga

di'a sanga wo-waro lai ngido,

3 la ngowa'a 'aḏi sanga do-doto'o ga'a 'i si'a'a ananga 'akala soro'unu,

sa-sakala ua, pa'ala kaci moi ua re 'ahu ma loasa re banari.

4 Ngowa-ngowa'a ga'a 'ahu ma wo-waro rimoi i'a mai ua, dolabololo-dolabololo nena-ne ya'u sidoto'o, la ananga gena-ge 'aḏi dadi pahe

re ḏi'i ngowa'a ra-ramasa ie sanga wo-waro re 'akala soro'unu.

5 Dadi ngowa'a 'akala soro'unu 'aḏi 'isene dolabololo, re ḏuanga i'a nyengara 'aḏi sidogo manga wo-waro

re ḏi'i ngowa'a remanga wo-waro ga'a ya sinyanyasele, ananga gena-ge 'aḏi sanga dolabololo ma di-dibanga

6 di'a ananga ya sahe dolabololo re 'ade-'ade toma ngowa'a 'akala soro'unu, re ya sahe ananga manga demo-demo re cu-cumu.

7 Silamo'o re mojongo Ma JOU, gena-ge wo-waro ma mulaingi.

Mada'a ngowa'a haga, ananga gena-ge 'aḏi sipa-pake ua 'akala soro'unu re do-doto'o.

8 'Ari ngowa'a nau'u, no totoho la-la ino 'ani ḇaḇa 'ai do-doto'o

re awa sidaioranga 'ani ngina 'ami demo-demo,

9 sababu 'ani ḇaḇa 'ai do-doto'o ma tero saya-saya toma sae'e,

re 'ani ngina 'ami demo-demo ma tero rate tani camala.

10 'Ari ngowa'a nau'u, na'o ngana no sanga bo-baja toma ngowa'a baraḏosa,

na'u mete'e awa.

11 Na'o ananga 'aḏi kanau, <<Ino, ngene wo magogono re totoma ngowa'a matengo di'a wu sisengene,

ino ngene wo danu re wo jalalara ngowa'a matengo ga'a kai sala ua.

12 Ino ngene wo siḏingoto ngowa'a matengo ga'a 'ahu-'ahu toma ngowa'a senge-sengene manga ngi'i,

re wo sipoini unanga ga'a kai si-siḏi ua toma kubu ma dara.

13 Ngene wa'u ra-rabasa manga 'ori i'a rana ga'a rema ijana, la wa gasa

re wa siromanga tananga wala reo 'ori i'a rana ga'a wa ra-rabasa gena-ge.

14 Ino mete'e ngomi!

Nanga dori'i ma hasili, ḏuanga i'a ngene wa sibalangu te-tero!>>

15 'Ari ngowa'a nau'u! No mete'e awa ananga manga ga'a ma jira,

mada'a no maki-kiḏanga ra ananga manga ngo'omo;

16 sababu ananga 'aḏi lalara jau i'a 'a'a kajahatana,

re ananga pa'i mau jau-jau 'aḏi sisengene ngowa'a.

17 Tantu ḏua, namo diwanga mai 'i osama ua toma jojoḏi ma dara,

na'o enanga ya oḏi'i ḏua,

18 mada'a ngowa'a ma jira gena-ge 'aḏi sigae jojoḏi di'a sisado ananga masiretene,

jojoḏi gena-ge ḏuanga i'a 'i sijira ananga.

19 So'o gena-ge, ngowa-ngowa'a ga'a 'aḏi disa ngowa'a lelegu manga 'ori i'a rana re ya sanga gena-ge reo 'a'a kajahatana,

ananga ḏuanga i'a ya sifangu remanga nyawa masiretene.

20 'Isene! Ngowa'a matengo ga'a rai 'akala soro'unu 'o maga-garo'o toma ngo'o-ngo'omo re 'o mabo-boa'a toma ngi'i-ngi'i rema ngowa'a repe! 21 Ngowa'a gena-ge 'o mabo-boa'a toma ngala-ngalana lamo'o

re toma ngi'i-ngi'i rema ngowa'a repe so'o ne:

22 Hai ngowa-ngowa'a ga'a 'ahu ma wo-waro rimoi i'a mai ua,

singadolo ngau moju ngini ni nyanyaḏi ninga 'ahu so'o gena-ge?

Ngini, ngowa'a ga'a 'aḏi situ-tuhu 'akala soro'unu, ngau ni matogumu gena-ge,

re ngowa'a ga'a 'aḏi emono wo-waro, ngau ni matogumu emono gena-ge?

23 Ni totoho la-la, na'o ngini ngoi tini ḇangata,

ngoi ḏuanga i'a ta siba-ba'ala 'ari 'akala re sinyingara ma dara ra ngini

re to doto'o 'ari wo-waro ra ngini.

24 Ngoi reto 'aro'o ngini, mada'a ngini ni oḏu'u 'isene;

re wakutu ngini ngoi tini g̱awi, ngini ni sapolo ino ua.

25 'Ari duga re domolo mo-moini na mete'e ua

re ni totoho ua wakutu ngini ngoi tini ḇangata.

26 Sababu gena-ge, na'o ngini ni sanga bodito, ngoi ḏuanga i'a tini nye-nyelo'o.

Na'o ni mojongo singadolo terewete, ngini ngoi ḏuanga i'a tini sije-jengere.

27 Wakutu mojongo singadolo terewete ḏuanga i'a 'i nga'unu ngini ma tero momoku,

wakutu bodito ḏuanga i'a 'i nga'unu ngini ma tero rato, re wakutu 'akala kangela, susa re sangisara 'i pilatu ngini;

ngoi ḏuanga i'a to sije-jengere ngini.

28 Toma 'orasa gena-ge, ngini ni 'aro'o ngoi, mada'a ngoi to waḏusu ua.

Ngini ni disa ngoi lea ḇato

mada'a ni sanga ngoi ua.

29 Sababu ngini ma tero sa'olo ngowa'a 'aḏi sipa-pake ua wo-waro,

re ni pili ua silamo'o re mojongo Ma JOU.

30 Re ḏi'i ngini soi moi mai ua ni dawongo 'ari duga re domolo

re ni totoho ua wakutu ngini ngoi tini ḇangata.

31 Sababu gena-ge, ngini ḏuanga i'a na oromo ma sowo'o ma jira taninga ga'a,

re ni wunusu reninga rancana-rancana ma rousu ua.

32 Ngowa-ngowa'a ga'a 'ahu ma wo-waro rimoi i'a mai ua, ananga gena-ge ḏuanga i'a 'aḏi sengene sababu 'aḏi pula'a ḏuḏunu tari duga re domolo,

re ngowa'a ga'a 'aḏi emono wo-waro, ananga gena-ge ḏuanga i'a sanga singi-ngiranga sababu 'aḏi sipa-pake ua 'ari duga re domolo.

33 Mada'a ngowa-ngowa'a ga'a 'aḏi 'isene ngoi, ananga gena-ge ḏuanga i'a 'aḏi paralu 'ori i'a rimoi mai riwara,

re 'aḏi sanga saolo re 'aḏi mojongo bahala ua.>>