1 No momole awa mangale wangere da-daini,

sababu ngana no waro ua 'oru ga'a 'i dadi toma wangere gena-ge.✝

2 Sieanga ḇato ngowa'a lelegu 'aḏi sihie-hie ngana, re awa ngana masiretene madanga,

ngowa'a ga'a 'ngana na'u nana'o ua 'aḏi si hie ngana, mada'a ngana 'ani 'uḏu ma betu'u ua.

3 Maḏi gena-ge tubuso re dongi tubuso ḏi'i,

mada'a lebe tubuso toma fara ḏiḏi gena-ge: ngowa'a haga ga'a 'aḏi sikangela ngana.

4 Ngowa'a ga'a 'aḏi ruta, ananga gena-ge 'aḏi sijira re siwejere ngowa'a,

mada'a lebe cira ḏi'i ngowa'a ga'a hamu.

5 Lebe rousu ḇangata bi-biono i'a,

reo dadalara ga'a 'i sijumu ua.

6 Ḏagilomu 'aḏi ca'olo rema maksudu ma la-la,

mada'a lawana 'aḏi dume sida-dadunu.

7 Ngowa'a ga'a wunusu 'aḏi sito-to'u madu;

mada'a di'a ngowa'a ga'a sawini kalaha ma-maḏi, basono mami.

8 Ma tero namo diwanga ga'a sisoi'i tala ma ngi'i,

so'o gena ḏi'i, ngowa'a ga'a 'aḏi wiḏi sisoi'i tala wala.

9 Goroho re bo-bounu 'i sisanangi 'akala re sinyingara,

mada'a kangela 'i si'susa ngowa'a.*

10 Sisoi'i tala awa 'ani ḏagilomu bolo 'ani ḇaḇa 'ai ḏagilomu.

awa golo'o ri-riono tani ioro nongoḏu toma 'orasa bodito

Lebe rousu ngowa'a toma wala sebanga ga'a co-cori

reo ioronongoḏu toma giḏanga.

11 'Ari ngowa'a nau'u, ngana balasu 'ani 'akala soro'unu, re no sisanangi 'ari 'akala re sinyingara,

la ngoi nyengara to sangoro toma ngowa'a ga'a 'aḏi sisala ngoi.

12 Na'o ngowa'a 'akala soro'unu 'aḏi oḏi'i bodito, unanga 'o magogono;

mada'a ngowa'a ga'a 'ahu ma wo-waro rimoi i'a mai ua, unanga 'o tagi togumu ua, ḏua 'o sanga bodito.✝

13 'Oro pakeanga toma ngowa'a ga'a 'aḏi jaji tuusu di'a ngowa'a lelegu manga binyatoro,

re no tahana gena-ge singadolo ngowa'a tagi-tagi ino ro fangu 'ai banyatoro. ✝

14 Ngowa'a ga'a ma daini i'a moju 'aḏi pula'a tabea remanga iḏingi siduga-duga,

hali gena-ge ma tero kutuki di'a ananga.

15 Were'a ga'a nyanyaḏi ma'u go'oro,

ma tero sa'olo leketu ma dege kama togu-togumu ua toma 'orasa besa'a.

16 Matengo i'a mai ua nga'unu 'o ḇangata munanga, la mo masiogoro,

ma tero karawiana ga'a no tahana yoḏu'u

re no gu'u goroho.

17 Ḇesi 'i simangono reo ḇesi,

manusia madoto'o toma manusia.

18 'A guna 'o palihara ate 'ara, unanga 'a oromo ma sowo'o,

re 'a guna ga'a 'o saolo 'ai tuanga, 'ai tuanga ḏuanga i'a 'o silamo'o unanga.

19 Ma tero ḇanyo 'i siwaiti manga biono ma guḏumingi,

so'o gena ḏi'i manusia manga 'akala re sinyingara 'i sijumu manga diri.

20 Ngowa'a senge-sengene manga ngi'i re ngi'i ma singi-ngiranga 'i romanga yoḏu'u,

so'o gena ḏi'i, manusia manga la'o 'i ḏugala yoḏu'u.

21 Guraci re salaka 'i si'uisi toma u'u,

re disa waro ngowa'a gena-ge, toma 'orasa ngowa'a lelegu 'aḏi silamo'o ananga.

22 Kalaha no tutu'u ngowa'a haga toma ḏiḏisongo ma dara,

reo dudutu'u si mete'e gandum

sanga ua manga haga 'i iranga.

23 Nana'o la-la ino 'ani doba re 'abingi,

totoho 'ani haiwani mo-moini,

24 sababu harata gena-ge kasingado-ngadolo i'a ua,

lastari ḏi'i mai 'i tatapu kasingado-ngadolo ua.

25 Na'o rurubu 'i iranga re ma ju'uda 'i supu,

re sau ma rurubu wa lomu,

26 ngana nyengara no 'a'a pakeanga reo doba-doba ra-ramasa ie ma gogo,

re 'abi-'abingi ma nau'u nyengara no sitibo guḏa su-sungi.

27 Re ḏi'i 'ani 'abingi ma susu 'i ngadolo di'a 'ani ngitu re ngale manga ngo-ngoromo,

re di'a 'ani falalomu were'a manga 'ahu ma paralu.