1 'Ari ngowa'a nau'u, sidaioranga awa 'oru ga'a ngoi reto doto'o ḏua ra ngana, re na 'elingi 'ari parenta, 2 la 'ani 'umuru 'i dogo kiḏanga re 'ani 'ahu ganapu la-la i'a. 3 Awa no matogumu dadalara re setia ra Ma Jou'ongu Madutu re manusia, ngana balasu na pake ma tero rate ga'a hali tani camala, re no palihara gena-ge mo-moini tani 'akala re sinyingara ma dara. 4 Ḏua ngana ḏuanga i'a no sanga sanangi re sayanga ma jingi'i ra Ma Jou'ongu Madutu 'ai momina re manusia.

5 Ngana balasu no ngaku ti-tiai Ma JOU re awa no masidiriwa tani wo-waro masiretene lai ngido. 6 No 'elingi Ma JOU, wakutu no 'a'a 'oru ḇato, la Unanga ḏuanga i'a 'O sinyanyasele 'ani 'ahu. 7 Awa no magoro ino 'ani wo-waro kau'u; Mojongo Ma JOU re no maki-kiḏanga toma kajahatana 8 Gena-ge 'i dadi sou'u di'a site'e 'ani lese re sisanangi 'ani 'akala re sinyingara. 9 Silamo'o Ma JOU rani harata re gasa 'ani jou-jou tani tana'a ma hasili mo-moini ga'a ma mulaingi ra Unanga, 10 la 'ani titila mo-moini 'i romanga pai-pai'i reo guḏa ma hasili, re 'ani tampayanga 'i romanga singadolo pa'ala reo 'anggur ma ḇanyo.

11 'Ari ngowa'a nau'u, awa no itomo Ma JOU 'ai do-doto'o, re no ruta awa na'o Unanga 'o ḇangata ngana. 12 Sababu Ma JOU 'o sihukumu ngowa'a ga'a Unanga 'a dadalara, ma tero sa'olo ḇaḇa matengo 'o ca'olo 'ai ngowa'a nau'u ga'a unanga 'a dadalara. 13 Bara'utungu ngowa'a ga'a sanga 'akala soro'unu, re ngowa'a ga'a sanga wo-waro di'a 'ahu, 14 Sababu enanga ma 'utungu lebe lamo'o reo salaka, re ma hasili lebe hali reo guraci. 15 'Akala soro'unu ma ijana lebe kau'u reo maḏi ga'a ma ijana hali-hali, enanga lebe kau'u reo 'ani 'akala ma mau mo-moini. 16 Enanga ma giama kuwiḏa 'i pula'a 'umuru kiḏanga, re ma giama ma kuḇali 'i pula'a ḏe-ḏegoro re harata. 17 Enanga ma ngo'omo 'i sigasa toma 'ahu sanangi, duga re domolo mo-moini 'i gasa toma 'ahu pai-pai'i. 18 Unanga sa'olo ate ga'a pula'a 'ahu di'a ngowa-ngowa'a ga'a 'aḏi macako'o ra unanga, ngowa'a guna ḇato ga'a ya cigi, ananga ḏuanga i'a 'aḏi sanangi.

19 Rai 'akala soro'unu, Ma JOU ro sidadi dungia,

Rai wo-waro lai ngido, Unanga gena-ge ro 'a'a diwanga.

20 Rai wo-waro Unanga 'o sidadi ḇanyo mala'o la-lamo'o toma tana'a ma dara 'i pelete'e re 'i 'uisi supu,

re 'o kakamo 'i sapolo gagini re besa'a da'u diwanga tala toma dungia.

21 Sababu gena-ge, 'ari ngowa'a nau'u! No macako'o namo-namoto toma 'akala soro'unu re wo-waro. Na eanga awa fara ḏiḏi gena-ge, 22 dadi enanga ḏuanga i'a 'i sipula'a 'umuru kiḏanga re sirousu 'ani 'ahu ma tero rate tani camala. 23 Dadi 'ani 'ahu ma ḏo-ḏagi rema salamata, re 'ani rou kama pele'e ua. 24 Na'o ngana no tagi otu, no otu kama mojongo ua, re 'ani tingidu ḏuanga i'a 'i rousu i'a utu moi siwangere. 25 Ngana ḏuanga i'a no mojongo ua bahala ga'a 'i sapolo toma siwaro ua ma dara, re na'o bodito 'i nga'unu ngowa'a kajahatana. 26 Sababu Ma JOU ḏuanga i'a 'o saolo ngana, re Unanga 'a silalo'o 'ani rou toma jojoḏi.

Duga re domolo di'a ga'a ma la-la 27 Awa no itomo na'o ngowa'a 'aḏi golo'o riono ra ngana, momongolo ua ngana nyengara na si'a'a. 28 Awa no soma'a 'ani ḏagilomu totoma singadolo da-daini i'a, momongolo ua ngana nyengara no riono unanga wangere nange-ne. 29 Awa 'ani 'akala re sinyingara 'i cira tani ḏagilomu, momongolo ua unanga 'o tegoro co-cori re 'o ngaku ngana. 30 Awa no ma'u tolabe ra guna ḇato ga'a ma sababu 'i cua, na'o unanga kama 'a'a cira ua ra ngana. 31 No kuranga 'akala awa toma ngowa'a ga'a 'aḏi 'a'a kajahatana, re awa mete'e ananga manga 'ahu ma ngo'omo. 32 Sababu Ma JOU 'o emono ngowa'a ga'a manga 'ahu ma ngo'omo ga'a seko-seko, mada'a Unanga ma'u ḏagilomu la reo ngowa'a ga'a manga 'ahu 'i boloto. 33 Ma JOU sikutuki ngowa'a kajahatana manga wala, mada'a Unanga 'o sibarakati ngowa'a loasa re banari manga ngi'i. 34 Ma JOU 'o sipa-pake ua ngowa'a ga'a 'aḏi situ-tuhu 'akala soro'unu, ananga gena-ge ga'a 'aḏi momole, mada'a Unanga 'o dadalara ngowa-ngowa'a ga'a 'aḏi maholo. 35 Ngowa-ngowa'a ga'a 'akala soro'unu, ngowa'a ya'u silamo'o; mada'a ngowa'a ga'a 'aḏi emono wo-waro, ngowa'a ya'u sipula'a mara'a.