1 Lomanga ga'a rousu gena-ge lebe hali reo harata repe,

ngowa'a ya'u sayanga ma jingi'i lebe rousu reo salaka re guraci.

2 Ngowa'a rema-enanga re ngowa'a ma dinga'unu ua 'aḏi ma tero;

ananga mo-moini, Ma JOU ya'u sidadi.

3 Na'o ngowa'a 'akala soro'unu 'aḏi oḏi'i bodito, ananga 'aḏi magogono,

mada'a ngowa-ngowa'a ga'a 'ahu ma wo-waro rimoi i'a mai ua, ananga gena-ge 'aḏi tagi togumu ua, ḏua 'aḏi sanga bahala. ✝

4 Ngogele di'a ngowa'a maholo re ngowa'a ga'a 'aḏi silamo'o re mojongo Ma JOU

gena-ge harata, sayanga ma jingi'i re 'ahu lai kiḏanga.

5 Dodowo'o re jojoḏi 'age toma ngo'omo di'a ngowa'a ga'a manga 'akala re sinyingara 'i seko-seko;

ngowa-ngowa'a ga'a mau palihara diri, balasu 'aḏi maki-kiḏanga toma ngowa'a gena-ge.

6 Doto'o ngowa 'olo di'a mete'e ngo'omo boloto,

ḏua singadolo 'orasa ananga 'aḏi piri'i, ananga 'aḏi masai'i ua toma ngo'omo gena-ge.

7 Ngowa'a rema-enanga 'aḏi kuasa toma ngowa'a ma dinga'unu ua,

ngowa'a ga'a mabanyatoro 'aḏi dadi budaka toma ngowa'a ga'a 'aḏi sibau pipisi.

8 Ngowa'a ga'a 'aḏi so'ana 'adili ua, ḏuanga i'a 'aḏi 'utu'u bodito,

re ma ḏo-ḏogumu, ananga manga kuasa 'i singi-ngiranga.

9 Ngowa'a ga'a manga 'akala re sinyingara la, ḏuanga i'a 'aḏi sanga barakati,

sababu ananga 'aḏi sibalangu ngo-ngoromo di'a ngowa'a ma dinga'unu ua.

10 Dusu'u ngowa'a ga'a 'aḏi situ-tuhu 'akala soro'unu, gena-ge no siiranga ma'u tolabe,

re sitogumu ma'u lawana re go'oro.

11 Ngowa'a ga'a 'aḏi dadalara 'akala re sinyingara 'ofi-'ofi,

re manga demo lai rousu madutu, 'aḏi dadi 'olana 'ai ḏagilomu.

12 Ma JOU 'ai la'o 'i dadanu wo-waro,

mada'a Unanga 'o sisala ngowa'a ga'a tukanga sihaga manga demo.

13 Ngowa'a pamalasa 'aḏi kanau: <<Rema singa toma wala ma ḏuḏunu!

ngoi enanga ri sengene toma ngo'omo ma dara!>>

14 We-were'a sudala 'ami madanga ma tero sa'olo duso'o lai ngido;

ngowa'a ga'a Ma JOU ya'u duruta, ananga ḏuanga i'a 'aḏi eta'a toma duso'o gena-ge.

15 Haga enanga 'i pata toma ngowa 'olo manga 'akala re sinyingara

mada'a ja-ja'olo do-doto'o, ḏuanga i'a 'i dusu'u manga haga gena-ge.

16 Ngowa'a ga'a 'aḏi sihaga ngowa'a ma dinga'unu ua di'a si'utungu manga diri

bolo pula'a bu-bula'a di'a ngowa'a rema-enanga, pa'i sirugi manga diri ḇato.

17 Na welanga 'ani ngau'u re 'isene ngowa'a 'akala soro'unu manga dolabololo-dolabololo ,

totoho la-la 'ari do-doto'o.

18 Sababu na'o no gogono do-doto'o gena-ge tani 'akala re sinyingara ma dara,

re mo-moini gena-ge 'i ḏu-ḏuanga ḏua tani 'uḏu ma betu'u, gena-ge 'i sisanangi ngana. *

19 Nange-ne ngoi to doto'o ra ngana, ya ra ngana,

la ngana 'ani ngo-ngaku nyengara ra Ma JOU.

20 'Au nga'ene ngoi reto lefo ḏua gena-ge ra ngana

rema duga re domolo re wo-waro,

21 di'a sidoto'o 'oru ga'a ba-banari re mode-mode'e,

la ngana nyengara no sangoro tero-tero toma ngowa'a ga'a soma'a ngana.

22 Awa na ra-rabasa ngowa'a lamahana, sababu ananga gena-ge 'aḏi lamahana,

re awa sito'u-to'u ngowa'a ma dinga'unu ua na'o 'orasa hakimi toma ngalana lamo'o,*

23 sababu Ma JOU 'o simete'e ananga manga hali,

re 'O sisengene ngowa'a ga'a ra-rabasa ananga.

24 Ma'u ḏagilomu awa reo ngowa'a ga'a capati ruta,

ma'u gasa awa ngowa'a ga'a tata-ruta,

25 la ngana awa no mete'e 'ai duhu gena-ge

re no 'a'a jojoḏi di'a 'ani diri masiretene.

26 Awa ngana no mete'e ngowa'a ga'a 'akoru,

re no jaji fangu ngowa'a lelegu manga banyatoro;

27 sababu ngowa'a ḏuanga i'a 'aḏi 'oro 'ani jingi'i mete'e tani 'aḏu,

na'o ngana kani 'oru rimoi i'a mai di'a na tuusu!

28 Awa no sijujuru tana'a ma bati ma siḏa,

ga'a 'ani ete re dotumu ya sitatapu ḏua.

29 No oḏi'i ḏua ngowa'a ga'a pahe 'aḏi 'a'a munara?

ananga ḏuanga i'a 'aḏi munara toma 'ola-'olana manga biono,

mada'a 'aḏi te'oso ua toma ngowa-ngowa'a somoara.