1 'Akala soro'unu 'i simomi'i 'ami wala,✝ re side'oso ma ngasu'u ngai tumudingi. 2 Munanga remo tola'a haiwani re sidodahe 'anggur di'a laya, re sidodahe ngo-ngoromo. 3 Re munanga remo soma'a falalomu-falalomu we-were'a 'aḏi tagi siajele toma ngi'i-ngi'i kau'u toma limau: 4 <<Ngini ngowa-ngowa'a ga'a 'ahu ma wo-waro rimoi i'a mai ua, ino ni tuḏu 'ane!>> re munanga mo kanau toma ngowa'a ga'a manga 'akala cua: 5 <<Ino, ni oromo 'ari ngo-ngoromo, re ka'e 'anggur ga'a ngoi ta sidodahe ḏua. 6 Sieanga 'ahu ma haga, la ngini ḏuanga i'a ni 'ahu, re mete'e 'ahu ga'a rema wo-waro lai ngido.>>

7 Ngowa-ngowa'a ga'a 'aḏi doto'o ngowa'a matengo ga'a 'o situ-tuhu 'akala soro'unu, ngowa'a matengo gena-ge ḏuanga i'a 'o sipula'a mara'a ananga, re ngowa'a ga'a 'aḏi ḇangata ngowa'a kajahatana, ananga gena-ge ḏuanga i'a 'aḏi do-doana ngana. 8 Awa no ḇangata ngowa'a ga'a 'aḏi situ-tuhu 'akala soro'unu, ananga gena-ge ḏuanga i'a 'aḏi emono ngana. Mada'a na'o no ḇangata ngowa'a 'akala soro'unu, ananga gena-ge 'aḏi dadalara ngana. 9 No pula'a duga re domolo toma ngowa'a 'akala soro'unu re ananga ḏuanga i'a 'aḏi lebe 'akala soro'unu. No doto'o ngowa'a loasa re banari re ananga manga wo-waro 'i ganapu madogo-dogo.

10 Silamo'o re mojongo Ma JOU, gena-ge 'akala soro'unu ma mulaingi,

re nana'o Unanga ga'a 'Ofi-'Ofi ma pari cua, gena-ge wo-waro lai ngido.

11 Ma sababu ngoi*, ngana 'ani 'umuru 'i dogo kiḏanga,

re 'ani 'ahu ma musungu 'i madogo-dogo.

12 Na'o ngana 'ani 'akala soro'unu, gena-ge di'a ngana masiretene,

na'o ngana no situ-tuhu 'akala soro'unu, ngana masiretene no rugi.

13 Ngowa'a were'a ma pake ua munanga 'ami demo repe;

munanga gena-ge were'a ga'a 'ahu ma wo-waro rimoi i'a mai ua re kami mara'a ua.

14 Munanga gena-ge mo tegoro tami wala ma ngalana,

re toma kurusi toma ngi'i-ngi'i kau'u toma limau,

15 re munanga mo aro'o ngowa-ngowa'a ga'a tola'a i'a

re 'aḏi tagi toma ngo'omo boloto,

16 <<Ngini ngowa-ngowa'a ga'a 'ahu ma wo-waro rimoi i'a mai ua, ino ni tuḏu 'ane!>>

re munanga mo kanau toma ngowa'a ga'a manga 'akala cua,

17 <<Ḇanyo ga'a wa tori'i, wa basono mami;

re ngo-ngoromo ga'a wa oromo ma go-gogono, wa basono lebe sa'i.>>

18 Mada'a ngowa'a gena-ge 'a waro ua, mangale da'a rema ngowa-ngowa'a sengene manga guḏumingi

re ngowa'a ga'a raḏi sapolo ra munanga ananga gena-ge raḏi osama toma ngowa'a senge-sengene manga ngi'i.