1 'Isene! 'Akala soro'unu 'i maga-garo'o,

re wo-waro di'a 'ahu, no dadi pahe enanga 'i si'isene ma iḏingi.✝

2 enanga gena-ge 'i made-de'oso toma sau-sau ma re'u toma ngo'omo ma 'uḏu,

re toma ngo'omo-ngo'omo ma ji'o, enanga 'i made-de'oso;

3 toma limau ma ngala-ngalana lamo'o magagoro ma biono,

toma ngo'omo osama, enanga ma iḏingi lai siḏi.

4 <<Hei, ngowa-ngowa'a nau'u, ngoi to kanau ra ngini;

toma manusia manga ngowa-ngowa'a, ni totoho la-la ino 'ari duga re domolo!

5 Hei ngini ngowa-ngowa'a ga'a 'ahu ma wo-waro rimoi i'a mai ua, ni madoto'o, la ni dadi pahe,

hei ngowa'a ga'a 'aḏi emono wo-waro; ni balasu ya sahe tani 'akala re, la ni sanga 'akala la-la.

6 Ni 'isene, sababu ngoi ḏuanga i'a to kanau mangale hali-hali ga'a lai ngido,

re to welanga 'ari madanga di'a to kanau demo-demo ma banari.

7 'Ari yai'i 'i kanau 'ori i'a ma banari,

re sa-sakala gena-ge 'ari madanga ma bo-bosono.*

8 'Ari demo-demo mo-moini 'i 'adili,

bale moi i'a mai ua 'i liba bolo rapu.

9 'Ari demo-demo mo-moini 'i te-tero di'a ngowa'a pahe remanga wo-waro,

demo-demo gena-ge 'i banari di'a ngowa'a ga'a sanga wo-waro.

10 Ni dawongo 'ari do-doto'o ga'a lebe lamo'o reo salaka,

re ni dawongo wo-waro ga'a lebe lamo'o reo guraci madutu.

11 Sababu 'akala soro'unu lebe lamo'o i'a reo parmata,

'oru ḇato ga'a ngowa'a ya nyafusu, enanga 'i site-tero yoḏu'u reo 'akala soro'unu.

12 Ngoi nena-ne 'akala soro'unu, to tegoro mamete'e reo pahe,

re ngoi to sanga wo-waro re 'akala soro'unu.

13 Silamo'o re mojongo Ma JOU, gena-ge ma ngale emono ga'a ma jira;

ngoi to emono momole, ngowa'a ga'a mahie diri,

manga de'oso re ḏegoro ma jira,

re madanga romanga reo demo ma sa-sakala.

14 Ngoi nena-ne rema duga re domolo re di-dibanga,

ngoi nena-ne wo-waro lai ngido, ngoi nena-ne rari kuasa.

15 Sababu ngoi, 'ola-'olana 'aḏi siḏagi manga parenta,

re ngowa-ngowa'a la-lamo'o 'aḏi sitantukanga hukumu 'adili.

16 Sababu ngoi, ngowa'a la-lamo'o 'aḏi kuasa

re ḏi'i ngowa'a ga'a remanga lomanga re bi-biri'i, mo-moini gena-ge 'aḏi siḏagi parenta rema 'adili.

17 Ngoi to dadalara ngowa'a ga'a 'aḏi dadalara ngoi;

re ngowa'a ga'a mode-mode'e disa ngoi, tantu ḏua 'aḏi sanga ngoi.

18 'Age ra ngoi 'ori i'a rana re ngowa'a 'aḏi silamo'o ngini

re ḏi'i harata ga'a tatapu re 'adili.

19 'Ari bu-bula'a lebe rousu i'a reo guraci, re lebe rousu i'a ḏi'i reo guraci madutu,

re 'ari hasili lebe rousu i'a reo salaka madutu

20 Ngoi to tagi toma ngo'omo ba-banari,

to hele toma ngo'omo 'adili,

21 re to siwarisi harata di'a ngowa'a ga'a dadalara ngoi,

re to siromanga manga harata ma ngi'i reo 'ori i'a rana.

22 Ma JOU 'o sidadi ngoi sa'olo 'Ai munara ma jomolo,

ma tero Unanga 'ai do-dadi ma mulaingi toma 'ua re 'au wali moju.

23 'orasa 'ua re 'au wali moju, Unanga ri tuhu ngoi ḏua

toma 'orasa ma mulaingi, wakutu dungia cua moju.

24 Wakutu ngoloto 'i sidadi nyangu, ngoi Unanga ri sibuoro ḏua,

wakutu 'o ḇanyo-ḇanyo ma la'o 'i cua moju, ngoi ma enanga ḏua,

25 wakutu 'o kie-kie 'i cua moju,

wakutu 'o sau-sau 'i te'oso nyangu, Ngoi Unanga ri sibuoro ḏua

26 Ma JOU 'o sidadi nyangu tana'a re picaru-picaru,

bolo tana'a ma korou'u ma mulaingi.

27 Wakutu Unanga 'o sidadi diwanga, Ngoi 'age ḏua

re toma 'orasa Unanga 'o sigare bati diwanga re ngoloto,

28 wakutu Ma JOU 'o sigare kakamo toma ngawa-ngawa,

re wakutu 'a welanga ḇanyo ma la'o toma ngoloto ma 'aḏu, enanga 'i 'uisi supu,

29 wakutu Unanga 'a sitantukanga ngoloto ma bati,

la ḇanyo ya palene awa Unanga 'ai parenta,

re wakutu Ma JOU 'o sigare dungia ma bagini-bangini.

30 Ngoi ra Unanga 'ai gagoro ma tero Unanga 'ai ngowa'a ga'a Unanga ri dadalara,

wange moi-wange moi ngoi nena-ne Unanga 'ai sanangi ma ngi'i.

re to maḇisa-ḇisa ra Unanga 'ai biono.

31 Ngoi to maḇisa-ḇisa ra Unanga 'ai dungia,

re to sanangi toma manusia.

32 Sababu gena-ge, hei 'ari ngowa-ngowa'a nau'u, ni 'isene ngoi:

Na'o ni mete'e 'ari ngo'omo, ngini ḏuanga i'a ni bara'utungu.

33 Mete'e 'ari do-doto'o re ngini ni dadi 'akala soro'unu;

awa ngini ni sipa-pake ua enanga.

34 Bara'utungu ngowa-ngowa'a ga'a 'aḏi 'isene ngoi

ga'a wangere ma jelele i'a 'aḏi totoma tari wala ma ngalana,*

re 'aḏi ḏegoro totoma tari ngalana lamo'o*.✝

35 Sababu ngowa'a ga'a 'aḏi sanga ngoi, ananga gena-ge 'aḏi sanga 'umuru kiḏanga,

re Ma JOU 'o dawongo ananga.

36 Mada'a ngowa'a ga'a 'aḏi sanga ngoi ua, ananga gena-ge 'aḏi rugi masiretene;

ngowa'a mo-moini ga'a emono ngoi, ananga 'aḏi nyafusu sengene.>>