Dolabololo 7

1 'Ari ngowa’a nau’u na 'elingi 'ari demo-demo, re na sidaioranga awa 'oru ga’a ta siajele ḏua ra ngana. 2 No macako’o tari parenta, la ngana ḏuanga i’a 'ani 'ahu 'i sanangi. Na gogono la-la ino 'ari do-doto’o ma tero sa’olo na jaga 'ani la’o masiretene. 3 'Elingi tau-taunu 'ari do-doto’o gena-ge, re na gogono tani 'akala re sinyingara ma dara. 4 No kanau toma 'akala soro’unu so’o ne: <<Ngana 'ari ioronongoḏu>> re toma wo-waro lai ngido so’o ne: <<Gena-ge 'ani lese moi,>> 5 la enanga ni saolo ngana toma we-were’a su-sudala, toma we-were’a lelegu ga’a 'aḏi baja ngana reo demo-demo ga’a lai mami.

We-were’a nakala

6 Toma utu moi, ngoi to tatamo supu mete’e 'ari wala ma jangela, 7 re ngoi to oḏi’i ngowa-ngowa’a ga’a 'ahu ma wo-waro rimoi i’a mai ua, ḏua ngoi to oḏi’i ngowa’a ra-ramasa ie matengo gena-ge ra ananga manga sigolona, unanga gena-ge ga’a 'ai 'akala cua. 8 Unanga 'o tola’a i’a mete’e ngo’omo ma sola, ḏua 'o tagi jau i’a we-were’a gena-ge 'ami wala, 9 toma 'orasa lobi’i ino sa’i ri hafu. 10 Ḏua we-were’a matengo mo sapolo ga’a mapake 'ami pakeanga camari re 'ami 'akala boloto ua; 11 munanga mo ogoro tala yoḏu’u re mo di-diwiri, munanga mo tegoro toma wala ua, 12 kage-kage toma ngo’omo, kage-kage toma tana’a lapanga, co-cori toma ngo’omo ma ji’o munanga mo dola’a ngowa’a. 13 Ḏua munanga mo sibo’olo tubaie gena-ge re mo dume. 'Ami biono kama mara’a ua mo kanau ra unanga: 14 <<Ngoi balasu to gasa 'ari jou-jou salamata, re toma wangere nange-ne ngoi reta fangu 'ari jaji gena-ge. 15 Sababu gena-ge ngoi to supu tini totoma ngana. 16 Ngoi reta sela 'ari jungutu tari jingi’i, ḇa’a linen toma Mesir ino ga’a ma tana’a lai rousu. 17 'Ari jingi’i otu ngoi reta ḇianga reo bou-bounu ga’a ngowa’a 'aḏi si’aro’o mur, 'o gaharu re kayu manis. 18 Ino ngene wo otu ngi’i moi utu nange-ne singadolo ma daini i’a, ngene nyengara wa basono ma sanangi singadolo da-daini i’a. 19 Sababu 'ari nau’u 'o cua toma wala, unanga 'o tagi toma giḏanga, 20 Unanga 'o gasa pipisi tohe rimoi, re 'o ḏibo maha sebanga ngara loboro.>> 21 Munanga mo baja tubaie gena-ge reo duhu ma repe, munanga mo baja reo demo ma mami. 22 Ḏua tubaie ro mete’e munanga ma tero sapi ga’a ngowa’a ya tuda mau ya tola’a, ma tero ngowa’a haga 'aḏi sanga hukumu, 23 singadolo coimi madoto 'i cumu lapasa tai katere ma 'a’abala, ma tero namo ga’a soloro 'i jau i’a jojoḏi, tubaie gena-ge 'a waro ua unanga toma bodito ma dara.

24 Sababu gena, hei 'ari ngowa-ngowa’a, ni 'isene ngoi. Ni totoho 'ari duga re domolo. 25 Awa 'ani 'akala 'i mete’e we-were’a gena-ge 'ami bo-baja, no tagi disa munanga awa. 26 Sababu na-nau’u manga repe ḏua munanga ma’u sijira, re manga repe masala ga’a 'aḏi sengene sababu munanga. 27 Tagi tami wala, gena-ge mangale tagi toma ngowa-ngowa’a sengene manga ngi’i.