1 Hai 'ari ngowa'a nau'u, na dawongo 'ari do-doto'o-do-doto'o, re na gogono tani 'akala re sinyingara ma dara 'ari duga re domolo. 2 'Ani ngau'u balasu 'i mangono di'a totoho la-la 'akala soro'unu re 'ani 'akala re sinyingara 'i makutale sanga wo-waro di'a 'ahu. 3 'Ari ngowa'a nau'u, no golo'o ri-riono toma wo-waro lai ngido, re no disa makutale wo-waro di'a 'ahu, 4 Disa enanga gena-ge ma tero no disa guraci, re na kunu'i enanga gena-ge sa'olo no disa ḏiḏiwongo. 5 Re na'o so'o gena, ngana ḏuanga i'a no waro mangale silamo'o re mojongo Ma JOU re ngana ḏuanga i'a no sanga wo-waro lai ngido mangale Ma Jou'ongu Madutu. 6 Sababu Ma JOU ga'a 'O pula'a 'akala soro'unu, re no sanga wo-waro di'a 'ahu re sahe wo-waro lai ngido ra Unanga. 7 Unanga 'o pula'a duga re domolo toma ngowa'a ga'a manga 'ahu 'i boloto, Unanga ma tero ta-taini ga'a saolo ngowa'a ga'a manga de'oso re ḏegoro kama rapu ua. 8 Ma JOU 'o jaga ngowa-ngowa'a ga'a manga 'ahu ma ḏo-ḏagi 'i 'adili, re 'O saolo ananga ga'a 'elingi Unanga.

9 'Ari ngowa'a nau'u, na'o no mete'e 'ari mau, ngana ḏua na waro 'oru ga'a 'adili, boloto re la-la. Gena-ge 'ori i'a ma la-la tani 'ahu ma dara. 10 Ngana ḏua no dadi ngowa'a 'akala soro'unu, re 'ani wo-waro ḏua si'a'a 'ani 'akala sanangi. 11 'Akala soro'unu ḏuanga i'a 'i kaḏiarata ngana, wo-waro di'a 'ahu ḏuanga i'a 'i jaga ngana, 12 la ngana no sikiḏanga toma ngo'omo ma jira, re no kiḏanga toma ngowa'a-ngowa'a sa-sakala, 13 ananga gena-ge ga'a sisoi'i tala 'ahu ma ngo'omo ga'a boloto, re 'aḏi mete'e ngo'omo hafu-hafu romanga reo ḏosa, 14 ngowa-ngowa'a gena-ge ga'a 'aḏi sanangi sababu 'a'a kajahatana, re 'aḏi maroa-roanga sababu 'aḏi sihaga ngowa'a, 15 re ananga ga'a manga 'ahu ma ngo'omo ga'a seko-seko, re ḏi'i manga de'oso re ḏegoro 'i boloto ua,

16 la ngana no sikiḏanga toma we-were'a su-sudala, re toma we-were'a nakala ga'a manga bo-baja lai mami madutu. 17 Munanga ma sisoi'i tala 'ami na'u re ma sidaioranga 'ami jaji ra Ma Jou'ongu Madutu. 18 Na'o no tagi tami wala, gena-ge ma tero ngana no tagi toma kubu. Na'o no tagi ra munanga mi ngi'i ma tero no tagi toma ngowa'a sengene manga ngi'i. 19 Ngowa'a ga'a tagi ra munanga, matengo i'a mai ua 'aḏi maḏibo toma ngo'omo salamata, ananga ya sanga riwara manga 'ahu ma ngo'omo. 20 Sababu gena-ge 'ari ngowa'a nau'u, mete'e ngowa'a la-la manga 'ahu ma ngo'omo, re tatapu no tagi toma ngowa'a loasa re banari manga ngo'omo. 21 Sababu, ngowa'a ga'a manga 'ahu 'i boloto, ananga gena-ge ḏuanga i'a 'aḏi ḏegoro tana'a ga'a Ma JOU ro sijaji, re ngowa'a ga'a manga de'oso re ḏegoro kama rapu ua, ananga gena-ge 'aḏi tegoro tau-taunu toma ngi'i gena-ge, 22 Mada'a ngowa'a kajahatana ḏuanga i'a 'aḏi sanga dusu'u toma tana'a gena-ge, re ngowa'a ga'a tukanga sihaga, ananga gena-ge 'aḏi sanga upa'a sisupu toma ngi'i gena-ge.