1 Ngowa-ngowa’a ga’a pa’i mafikiri 'ai diri masiretene,

'aḏi nyanyaḏi 'ahu ma wola i’a,

re 'aḏi rubutu ngowa’a ga’a manga di-dibanga.

2 Ngowa’a ga’a 'aḏi emono wo-waro, ananga 'aḏi nyafusu ua wo-waro lai ngido

mada’a 'aḏi nyafusu pa’i 'aḏi sijarita manga 'akala ma sanga.

3 Na’o ngowa’a 'aḏi 'a’a kajahatana, ngowa’a ya’u sipa-pake ua,

re na’o ngowa’a 'aḏi 'a’a 'ori i’a ga’a sipula’a mara’a, ngowa’a ḏuanga i’a ya’u sije-jengere.

4 Ngowa’a manga demo ma tero sa’olo ḇanyo ga’a lai ngido,✝18:4 Dol. 20:5

'akala soro’unu ma cimi ma tero sa’olo ḇanyo 'uisi kama togumu ua.

5 Rousu ua na’o ngini ni pa’ala kaci moi toma ngowa’a kajahatana,

re ni dawongo ua ngowa’a loasa re banari.

6 Ngowa’a ga’a 'aḏi emono wo-waro, ananga gena-ge manga demo-demo 'i sibaolo ma’u tolabe,

re ananga manga madanga 'i aworo ngowa’a ya’u ca’olo.

7 Ngowa’a ga’a 'aḏi emono wo-waro, ananga gena-ge 'aḏi sijira manga diri sababu manga madanga masiretene,

manga demo-demo gena-ge ma tero sa’olo jojoḏi di’a ananga masiretene.

8 Ngowa’a tukanga fitana, ananga manga demo ma tero sa’olo ngo-ngoromo ga’a lai sa’i,

ga’a ngowa’a 'aḏi nyafusu ya nyamolo.✝18:8 Dol. 26:22

9 Ngowa’a ga’a pamalasa toma munara,

ananga raḏi dadi ioronongoḏu toma ngowa’a tukanga sijira.

10 Ma JOU 'ai lomanga ma tero sa’olo manara ga’a lai te’e,

ngowa’a loasa re banari 'aḏi wiḏi toma ngi’i gena-ge, la 'aḏi sanga salamata.

11 Limau ga’a te’e di’a ngowa’a rema-enanga, enanga gena-ge manga harata,

re 'aḏi magoro ino harata gena-ge ma tero gegelo dounu ga’a lai gau’u.

12 Ngowa’a ga’a momole, ananga ḏuanga i’a 'aḏi eta’a,

mada’a ngowa-ngowa’a maholo, ananga ḏuanga i’a ngowa’a ya’u silamo’o.

13 Na’o ngini ni sangoro siḏa, mada’a ni 'isene mo-moini nyangu,

gena-ge haga re ni sipula’a mara’a.

14 Ngowa’a manga 'akala re sinyingara, enanga nga’unu 'i tahana susa re sangisara,

mada’a matengo i’a mai ua nga’unu 'o si-la 'akala re sinyingara ga’a 'i rapo’o.