ದಾನಿ 8

ದಾನಿಯೆಲಾಚ್ಯಾ ದರ್ಶನಾತ್ ಟಗರ್ ಅನಿ ಪಾಲ್ವೊ

1 ಮಾಕಾ ಅದ್ದಿ ದಿಸಲ್ಲೆ ದರ್ಶನ್ ಸೊಡುನ್ ರಾಜಾ ಬೆಲ್ತೆಶಚ್ಚರಾಚ್ಯಾ ರಾಜ್ವಟ್ಕಿಚ್ಯಾ ತಿನ್ವ್ಯಾ ವರ್ಸಾತ್ಬಿ ಮಾಕಾ ದಾನಿಯೆಲಾಕ್ ಅನಿ ಎಕ್ ದರ್ಶನ್ ದಿಸ್ಲೆ. 2 ತ್ಯಾ ಸಪ್ನಾತ್ ಮಿಯಾ ಶೊಶನ್ ಮನ್ತಲ್ಯಾ ಶಾರ್‍ಹಾತ್ ಹೊತ್ತೊ, ಶೊಶನ್ ಶಾರ್ ಎಲಾಮ್ ಸಂಸ್ಥಾನಾಚಿ ರಾಜಧಾನಿ ಹೊವ್ನ್ ಹೊತ್ತೆ, ಉಲಾಯ್ ಮನ್ತಲ್ಯಾ ಕಾಲ್ಗಿಚ್ಯಾ ದಂಡೆಚ್ಯಾ ವರ್‍ತಿ ಮಿಯಾ ಇಬೆ ಹೊತ್ತೊ ಸಾರ್ಕೆ ದಿಸ್ಲೊ. 3 ಮಿಯಾ ಬಗ್ತಾನಾ, ದೊನ್ ಸಿಂಗಾಚೆ ಎಕ್ ಟಗರ್ ಕಾಲ್ಗಿಚ್ಯಾ ದಂಡೆಚ್ಯಾ ಜಗ್ಗೊಳ್ ಇಬೆ ಹೊತ್ತೆ, ತೆಚಿ ದೊನ್ ಸಿಂಗಾ ಲಾಂಬ್ ರಾಲ್ಯಾಬಿ ಎಕಾಕಿಂತಾ ಎಕ್ ಮೊಟೆ ಹೊತ್ತೆ ಅನಿ ತೆ ಮೊಟೆ ಸಿಂಗ್ ಬಾರಿಕ್ಲೆ ಸಿಂಗ್ ಉಗಾವಲ್ಲ್ಯಾ ಮನಾ ಉಗಾವಲ್ಲೆ. 4 ಮಿಯಾ ಬಗಿತ್ ರ್‍ಹಾತಾನಾ, ತೆ ಟಗರ್ ದಿಸ್ ಬುಡ್ತಲ್ಯಾ ದಿಕ್ಕಾಕ್, ಉತ್ತರ್ ಅನಿ ದಕ್ಷಿನ್ ದಿಕ್ಕಾಕ್ ಅಪ್ನಾಚ್ಯಾ ಸಿಂಗಾನಿ ಮಾರಿತ್ ಹೊತ್ತೆ, ತೆಜ್ಯಾ ಇದ್ರಾಕ್ ಖಲೆ ಜನಾವರ್ಬಿ ಇಬೆ ರಾವ್ಕ್ ಹೊಯ್ನಾ, ಖಲ್ಯಾ ಜನಾವರಾಕ್ನಿ ಚುಕ್ವುನ್ ಘೆವ್ಕ್ ಹೊವ್ಕ್ ನಾ, ತೆ ಅಪ್ನಾಚ್ಯಾ ಮನಾಕ್ ಯೆಲೆ ಸಾರ್ಕೆ ಅಪ್ನಾಕ್ ಅಪ್ನಿ ಬಡಾಯ್ ಬೊಲಿತ್ ಹೊತ್ತೆ. 5 ದಕ್ಷಿನ್ ದಿಕ್ಕಾಕ್ನಾ ಜಗಾಕ್ ಪಾಂಯಾಕ್ ಲಾಗಿ ನಸ್ತಾನಾ, ದಾಟುಕ್ ಲಾಗಲ್ಲೊ ಎಕ್ ಪಾಲ್ವೊ ಬಗಟ್ಲೊ ತೆಜ್ಯಾ ಡೊಳ್ಯಾಂಚ್ಯಾ ಮದ್ದಿ ಎಕ್ ಸಿಂಗ್ ಹೊತ್ತೆ. 6 ಮಿಯಾ ಉಲಾ ಕಾಲ್ಗಿಚ್ಯಾ ದಂಡೆಚ್ಯಾ ವರ್‍ತಿ ಬಗಟಲ್ಲ್ಯಾ ಟಗ್ರಾಕ್ಡೆ ತೊ ಪಾಲ್ವೊ ಯೆವ್ಕ್ ಲಾಗಲ್ಲೊ, ತೊ ಪಾಲ್ವೊ ಲೈ ರಾಗಾನಿ ಟಗ್ರಾಕ್ ಮಾರುಚೆ ಮನುನ್ ಪಳುಕ್ ಲಾಗಲ್ಲೊ. 7 ತೊ ಪಾಲ್ವೊ ಲೈ ರಾಗಾನ್ ತ್ಯಾ ಟಗ್ರಾಕ್ಡೆ ಪಳ್ತಲೆ ಮಿಯಾ ಬಗಟ್ಲೊ, ತೆಜ್ಯಾ ವಯ್ನಾ ತೆಕಾ ಮಾರುನ್ ತೆಚಿ ದೊನಿ ಸಿಂಗಾ ಮೊಡುನ್ ಟಾಕ್ಲ್ಯಾನ್, ತೆಜ್ಯಾ ವಾಂಗ್ಡಾ ಝಗ್ಡೊ ಕರುಕ್ ಬಳ್ ನತ್ತಿ, ತೆನಿ ಟಗ್ರಾಕ್ ಜಿಮ್ನಿ ವರ್‍ತಿ ಪಾಡ್ವುನ್ ತುಡ್ವುಲ್ಯಾನ್, ತೆಜ್ಯಾಕ್ನಾ ಟಗ್ರಾಕ್ ಸೊಡ್ಸುನ್ ಘೆವ್ಕ್ ಕೊನ್ಬಿ ನತ್ತೆ. 8 ತ್ಯಾ ಪಾಲ್ವ್ಯಾನ್ ಅಪ್ನಾಕುಚ್ ಅಪ್ನಿ ಲೈ ಬಡಾಯ್ ಕರುನ್ ಘೆಟ್ಲ್ಯಾನ್, ಖರೆ ತಸೆ ರ್‍ಹಾತಾನಾಚ್ ತೆಚೆ ಮೊಟೆ ಸಿಂಗ್ ಮೊಡುನ್ ಪಡ್ಲೆ, ಅನಿ ತೆಜ್ಯಾ ಜಾಗ್ಯಾ ವರ್‍ತಿ ಉಟುನ್ ದಿಸ್ತಲಿ ಚಾರ್ ಸಿಂಗಾ ಉಗ್ವುನ್, ಮಳ್ಬಾಂಚ್ಯಾ ಚಾರಿ ದಿಕ್ಕಾಕ್ನಿಬಿ ಪಗ್ಳಲ್ಲಿ. 9 ತಾತುರ್ಬಿ ಎಕಾತ್ ಅನಿ ಎಕ್ ಬಾರಿಕ್ ಸಿಂಗ್ ಉಗ್ವುನ್, ಲೈ ಮೊಟೆ ಹೊವ್ನ್ ವಾಡ್ಲೆ ದಿಸ್ ಉಗಾವ್ತಲ್ಯಾ ಅನಿ ದಕ್ಷಿನ್ ದಿಕ್ಕಾಕ್ ಅನಿ ಸುಂದರ್ ದೆಶಾತುಚ್ ಲೈ ಬಳಾಚೆ ಹೊಲಿ. 10 ತೆ ಬಾರಿಕ್ಲೆ ಸಿಂಗ್ ಲೈ ಮೊಟ್ಟೆ ಹೊವ್ನ್ ಮಳ್ಬಾಕ್ ಪಾವ್ನ್ ಥೈ ಹೊತ್ತ್ಯಾ ಚುಕ್ಕಿಯಾಕ್ನಿ ಪಾಡ್ವುಲ್ಯಾನ್, ಅನಿ ಹುರಲ್ಲ್ಯಾ ಉಲ್ಲ್ಯಾ ಚುಕ್ಕಿಯಾಕ್ನಿ ಜಿಮ್ನಿ ವರ್‍ತಿ ಪಾಡ್ವುನ್ ತುಡ್ವುಲ್ಯಾನ್. 11 ಅನಿ ತೆ ಬಾರಿಕ್ಲೆ ಸಿಂಗ್ ಲೈ ತಾಕ್ತಿಚೆ ಹೊವ್ನ್ ಚುಕ್ಕಿಯಾಂಚ್ಯಾ ಅಧಿಪತಿಕ್ ವಿರೊಧ್ ಹೊವ್ನ್ ತೆಕಾ ಸದ್ದಾಚಿ ಹೊಮ್ ಬಲಿ ಗಾವಿನಾ ಸಾರ್ಕೆ ಕರ್ಲ್ಯಾನ್, ಅನಿ ಲೊಕಾ ತ್ಯಾ ಚುಕ್ಕಿಯಾಂಚ್ಯಾ ಅಧಿಕಾರಿಕ್ ಆರಾದನ್ ಕರ್ತಲೊ ಜಾಗೊ ನಾಸ್ ಕರ್ಲ್ಯಾನ್. 12 ಅನಿ ನಿತಳ್ ಜಾಗ್ಯಾಕ್ ಪಾಡ್ವುನ್ ಸದಾಚಿ ಬಲಿಯಾ ನಾ ಕರುಕ್ ಸಾಟ್ನಿ ಬುರ್ಸ್ಯಾ ಪಾನಾಚೊ ಎಕ್ ಸಯ್ನ್ ಉತ್ರುಕ್ ಲಾವ್ನ್, ಖರೆ ಪಾನ್ ಜಿಮ್ನಿ ವರ್‍ತಿ ಪಾಡ್ವುನ್, ಅಪ್ನಾಚ್ಯಾ ಮನಾಕ್ ಬರೆ ದಿಸ್ತಲೆ ಕರುನ್ ವಾಡ್ವಳ್ಕಿ ಹೊಲೆ. 13 ತನ್ನಾ ಎಕ್ ದೆವ್ ಧುತಾನ್ ಬೊಲ್ತಲೆ ಆಯ್ಕಲ್ಲೊ, ತೆಚ್ಯಾ ವಾಂಗ್ಡಾ ಅನಿ ಎಕ್ ದೆವ್ ಧುತ್ ಬೊಲುನ್, ಸದ್ದಾಬಿ ಬಲಿಯಾ ಇಬೆ ಕರಸ್ತಲೆ, ದೆವಾಕ್ ಲೈ ಬುರ್ಸೆ ಕರ್‍ತಲೆ, ಪವಿತ್ರ್ ಜಾಗೊ ಆನಿ ದೆವಾಚ್ಯಾ ಲೊಕಾಕ್ನಿ ತುಡ್ವುತಲೆ, ಮನ್ತಲ್ಯಾ ಸಪ್ನಾಚಿ ಕಾಮಾ ಕವ್ಡೊ ಎಳ್ ಚಲ್ತಾ? ಮನುನ್ ಇಚಾರ್‍ತಾನಾ, 14 ತನ್ನಾ ತೆನಿ ತೆಕಾ, "ದೊನ್ ಹಜಾರ್ ತಿನ್ಸೆ ದಿಸ್ ಅನಿ ಸಾಂಜ್ ಅನಿ ಸಕ್ಕಾಳ್ ಪತರ್ ತೆ ಚಲ್ತಾ, ಮಾನಾ ಪವಿತ್ರ್ ಜಾಗ್ಯಾಕ್ ಪರ್‍ತುನ್ ಭಾಂದುನ್ ಹೊತಾ" ಮನುನ್ ಜವಾಬ್ ದಿಲ್ಯಾನ್.

ಗಾಬ್ರೆಲ್ ದೆವ್ ಧುತಾನ್ ದರ್ಶನ್ ವಿವರನ್ ಕರಲ್ಲೆ

15 ಮಿಯಾ ದಾನಿಯೆಲಾನ್, ತೆ ದರ್ಶನ್ ಬಗುನ್ ಅರ್ಥ್ ಕರುನ್ ಘೆವ್ಚೆ ಮನುನ್ ಕಟ್ಪಟ್ ಕರಿತ್ ರ್‍ಹಾತಾನಾ, ಮಾಜ್ಯಾ ಇದ್ರಾಕ್ ಮಾನ್ಸಾಚ್ಯಾ ಗತಿನ್ ಹೊತ್ತೆ ಎಕ್ಲೊ ಯೆವ್ನ್ ಇಬೆ ರಾಲೊ. 16 ತನ್ನಾ ಉಲಾಯ್ ಕಾಲ್ಗಿಚ್ಯಾ ದಂಡೆಂಚ್ಯಾ ಮದ್ದಿ ವರ್‍ತಿ ಮಾನ್ಸಾಚ್ಯಾ ಗತಿನ್ ಎಕ್ ಧನ್ ಗಾಬ್ರೆಲ್ ಹೆಕಾ ತ್ಯಾ ದರ್ಶನಾಚೊ ಅರ್ಥ್ ಸಾಂಗ್, ಮನ್ತಲೆ ಮಾಕಾ ಆಯ್ಕೊ ಯೆಲೆ. 17 ತಸೆಚ್ ತೊ ಮಾಜ್ಯಾ ಜಗ್ಗೊಳ್ ಯೆಲೊ ತೊ ಮಾಜ್ಯಾ ಜಗ್ಗೊಳ್ ಯೆತಾನಾಚ್ ಮಿಯಾ ಡಬ್ಬ್ ಪಡ್ಲೊ, ತನ್ನಾ ತೆನಿ ಮಾಕಾ ಮಾನ್ಸಾಚ್ಯಾ ಲೆಕಾ ಹೆ ಆಕ್ರಿಚ್ಯಾ ಎಳಾರ್ ಘಡ್ತಲೆ ಹೊತ್ತೆ ದರ್ಶನ್ ತುಕಾ ಕಳುನ್ ರಾಂವ್ದಿತ್ ಮಟ್ಲ್ಯಾನ್. 18 ತೊ ಮಾಜ್ಯಾ ವಾಂಗ್ಡಾ ಬೊಲಿತ್ ರ್‍ಹಾತಾನಾ, ಮಿಯಾ ಖಯ್ ಹಾಯ್ ಮನುನ್ ಕಳಿ ನಸ್ತಾನಾ ಪಡ್ಲೊ, ತನ್ನಾ ತೆನಿ ಮಾಕಾ ಅಪ್ಡುನ್ ಉಟ್ವುನ್ ಇಬೆ ಕರ್ಲ್ಯಾನ್, 19 ಅಬಕ್, ದೆವ್ ಅಪ್ನಾಚೊ ರಾಗ್ ದಾಕ್ವುತಾನಾ ತ್ಯಾ ಎಳಾರ್ ಹೊತಲೆ ಹೊತ್ತೆ ಮಿಯಾ ತುಕಾ ಸಾಂಗ್ತಾ, ಹೆ ದರ್ಶನ್ ಆಕ್ರಿಚ್ಯಾ ಯೆಳಾಚ್ಯಾ ವಿಶಯಾತ್ ಕಳ್ವುತಾ. 20 ತಿಯಾ ಬಗಟಲ್ಲಿ ತಿ ದೊನ್ ಸಿಂಗಾಚೊ ಎಕ್ ಟಗರ್ ಮಟ್ಲ್ಯಾರ್, ಮೆದ್ಯಾ ಅನಿ ಪರ್ಸಿಯಾಂಚೆ ರಾಜಾ. 21 ಪಾಲ್ವೊ ಮಟ್ಲ್ಯಾರ್ ಗ್ರಿಕಾಂಚೊ ರಾಜಾ, ಅನಿ ದೊನ್ ಡೊಳ್ಯಾಂಚ್ಯಾ ಮದ್ಲೆ ಸಿಂಗ್ ಮಟ್ಲ್ಯಾರ್, ಪಯ್ಲೆಚೊ ರಾಜಾ. 22 ತಿ ಸಿಂಗಾ ಮೊಡಲ್ಲ್ಯಾ ತನ್ನಾ ತೆಚ್ಯಾ ಜಾಗ್ಯಾರ್ ಚಾರ್ ಸಿಂಗಾ ಉಗಾವಲ್ಲ್ಯಾ ವಿಶಯಾತ್ ಕಾಯ್ ಮಟ್ಲ್ಯಾರ್, ತ್ಯಾ ದೆಸಾಕ್ನಾ ಉಟುನ್ ಯೆತಲೆ ಚಾರ್ ರಾಜ್ವಾಡೆ; ಖರೆ ಅದ್ಲ್ಯಾ ರಾಜಾಕ್ ಹೊತ್ತ್ಯಾ ತವ್ಡಿ ತಾಕತ್ ತೆಂಕಾ ರ್‍ಹಾಯ್ನಾ. 23 ತ್ಯಾ ರಾಜ್ಯಾಚ್ಯಾ ಆಕ್ರಿಚ್ಯಾ ಎಳಾರ್, ಬುರ್ಸ್ಯಾ ಲೊಕಾಂಚೆ ಬುರ್ಸೆಪಾನ್ ಭರ್ತಾ, ತೆಂಚ್ಯಾ ಸಾಟ್ನಿ ಎಕ್ ನಿಶ್ಟುರ್ ಮನಾಚೊ ಅನಿ ಬುರ್ಸ್ಯಾ ಬುದ್ದಿಚೊ ರಾಜ್ವಟ್ಕಿಕ್ ಯೆತಾ. 24 ತೊ ಬಳಾಚೊ ಹೊವ್ನ್ ರ್‍ಹಾತಾ, ಖರೆ ಸ್ವತ್ಯಾಚ್ಯಾ ಬಳಾನ್ ನ್ಹಯ್, ತೊ ಲೈ ಹಾಳ್ ಕರುನ್ ವಾಡ್ವಳ್ಕಿ ಹೊವ್ನ್, ಅಪ್ನಾಚಿ ಆಶ್ಯಾ ಫುರಾ ಕರುನ್ ಘೆತಾ, ಬಳಾಚ್ಯಾ ಅನಿ ದೆವಾಚ್ಯಾ ಲೊಕಾಕ್ನಿ ನಾಸ್ ಕರ್ತಾ. 25 ಅನಿ ತೊ ರಾಜಾ ಅಪ್ನಾಚ್ಯಾ ಬುದ್ದಿನ್ ಪಸ್ವುನ್, ಮನಾತುಚ್ ಫುಗುನ್, ಆರಾಮಾನ್ ಹೊತ್ತ್ಯಾ ಲೊಕಾಕ್ನಿ ನಾಸ್ ಕರುನ್, ಧನಿಯಾಂಚ್ಯಾ ಧನಿಯಾಕ್ನಿ ವಿರೊಧ್ ಹೊವ್ನ್ ಉಟ್ತಾ, ಖರೆ ತೊ ಕೊನಾಚೊ ಹಾತ್ ಲಾಗಿನಸ್ತಾನಾ ನಾಸ್ ಹೊವ್ನ್ ಜಾತಾ. 26 ದರ್ಶನಾತ್ ದಿಸಲ್ಲ್ಯಾ ಸಕ್ಕಾಳ್ ಅನಿ ಸಾಂಜೆಚ್ಯಾ ವಿಶಯಾತ್ ಖರೆಚ್ ಹಾಯ್ ಖರೆ ತೆ ದರ್ಶನ್ ಘುಟ್ಟಾಚೆ ಹೊವ್ನ್ ರಾಂವ್ದಿತ್ ತೆ ಘಡ್ತಲೊ ಎಳ್ ಅಜುನ್ ಲೈ ಧುರ್ ಹಾಯ್, ಮಟ್ಲ್ಯಾನ್. 27 ತನ್ನಾ ದಾನಿಯೆಲ್ ಮಿಯಾ, ಉಲ್ಲಿ ದಿಸಾ ಸಿಕ್ ಹೊವ್ನ್ ಹಾತ್ರಾನಾತ್ ಪಡಲ್ಲೊ, ಮಾನಾ ಮಿಯಾ ಉಟುನ್ ಅನಿ ಪರ್‍ತುನ್ ರಾಜಾಚಿ ಸೆವಾ ಕರುಕ್ ಲಾಗ್ಲೊ, ಖರೆ ದರ್ಶನಾಚ್ಯಾ ವಿಶಯಾತ್ ಭ್ಹಿಯಾಲೊ, ತೆ ಮಾಕಾ ಅರ್ಥ್ ಹೊಯ್ ಸಾರ್ಕೆ ನತ್ತೆ.