Daniel 9

ಲೊಕಾಂಚ್ಯಾ ಸಾಟ್ನಿ ದಾನಿಯೆಲಾಚಿ ಮಾಗ್ನಿ

1 ಅಹೆಶ್ವೆರೊಶಾಚೊ ಲೆಕ್ ಮೆದ್ಯಾ ಕುಳಿಚೊ, ಕಸ್ದಿಯಾ ರಾಜ್ಯಾಚಿ ರಾಜ್ವಟ್ಕಿ ಕರ್ತಲೊ ದಾರಿಯಾಸ್ ರಾಜಾಚ್ಯಾ ರಾಜ್ವಟ್ಕಿಚ್ಯಾ ಪಯ್ಲೆಚ್ಯಾ ವರ್ಸಾತ್, 2 ಮಿಯಾ ದಾನಿಯೆಲ್, ಸಗ್ಳಿ ಶಾಸ್ತರಾ ಪರಿಕ್ಷಾ ಕರುನ್ ಬಗುನ್, ಸರ್ವೆಸ್ಪರಾನ್ ಜೆರೆಮಿಯಾ ಪರ್ವಾದಿಕ್ ದಿಲ್ಲ್ಯಾ ಗೊಸ್ಟಿ ಸಾರ್ಕೆ ಜರುಜಲೆಮ್ ಸತ್ತರ್ ವರಿಸ್ ಪತರ್ ಹಾಳ್ ಪಡಲ್ಲೊ ರಾವ್ಚೆ ಮನುನ್ ಕಳ್ವುನ್ ಘೆವ್ನ್, 3 ತನ್ನಾ ಮಿಯಾ ಉಪಾಸಿ ರಾವ್ನ್, ಚಿಲಾಚೆ ಫಟೆ ಲಪ್ಟುನ್ ಘೆವ್ನ್, ರಕ್ಕಾ ಪುಸುನ್ ಘೆವ್ನ್, ಸರ್ವೆಸ್ಪರ್ ದೆವಾಕ್ಡೆ ತೊಂಡ್ ವರ್‍ತಿ ಕರುನ್ ಮಾಗ್ನಿ ಕರುನ್ ಮಜತ್ ಮಾಗ್ಲೊ. 4 ಮಾಜ್ಯಾ ಸರ್ವೆಸ್ಪರ್ ದೆವಾಕ್ಡೆ ಮಾಜ್ಯಾ ಪಾಪಾಚ್ಯಾ ಮಾಪಿ ಸಾಟ್ನಿ ಅಸೆ ಮಾಗ್ನಿ ಕರ್ಲೊ, ಯೆ, ಮಾಜ್ಯಾ ಸರ್ವೆಸ್ಪರಾ, ಮೊಟೊ ದೆವ್ ಅನಿ ಭಯಂಕರ್ ಹೊಲ್ಲ್ಯಾ ದೆವಾ, ತುಕಾ ಪ್ರೆಮ್ ಕರುನ್ ತುಜ್ಯಾ ಕರಾರಾಕ್ನಿ ಅನಿ ಹುಕುಮಾಕ್ನಿ ಖಾಲ್ತಿ ಹೊವ್ನ್ ಚಲ್ತಲ್ಯಾಕ್ನಿ ದಿಲ್ಲಿ ಗೊಸ್ಟ್ ಪುರಾ ಕರ್ತಲೊ ತಿಯಾ, 5 ಅಮಿ ಚುಕ್ ಕರುನ್ ಬುರ್ಶಿ ಲೊಕಾ ಹೊವ್ನ್ ಚಲುನ್, ತುಕಾ ವಿರೊಧ್ ಹೊವ್ನ್ ಉಟುನ್ ತುಜ್ಯಾ ನೆಮಾಚ್ಯಾ ಸಾರ್ಕೆ ಚಲಿ ನಸ್ತಾನಾ ರಾವ್ನ್, 6 ಅಮ್ಚೊ ರಾಜಾ ಮುಖಂಡಾ ಜಾನ್ತಿ ಲೊಕಾ, ಪುರ್ವಜಾ ಅನಿ ಹುರಲ್ಲಿ ಲೊಕಾ ಹೆಂಕಾ ಸಗ್ಳ್ಯಾಕ್ನಿ ತುಜ್ಯಾ ವರ್‍ತಿ ಬೊಲಲ್ಲ್ಯಾ ತುಜ್ಯಾ ಸೆವಕಾಕ್ನಿ ಅನಿ ಪರ್ವಾದಿಯಾಕ್ನಿ ಕಾನ್ ದಿವ್ಕ್ ನಾ, 7 ಧನಿ, ತಿಯಾ ನಿತಿವಂತ್ ಹೊವ್ನ್ ಹಾಸ್ ಅಮಿ ತರ್ ಮರ್ಯಾದ್ ಸೊಡುನ್ ಚಲ್ತಲೆ ಹೊಯ್, ಅತ್ತಾ ಹಾಲಿ ಜುದೆವಾನಿ ಅನಿ ಜರುಜಲೆಮಾಚ್ಯಾ ಲೊಕಾನಿ ತುಕಾ ವಿರೊಧ್ ಹೊವ್ನ್ ಚುಕ್ ಕರಲ್ಲ್ಯಾ ಸಾಟ್ನಿ ತೆಂಕಾ ದೆಸಾತ್ನಾ ಡಕ್ಳುನ್ ಟಾಕುನ್ ಧುರ್ ಅನಿ ಜಗ್ಗೊಳ್ ಪಳ್ಸುನ್ ಗೆಲ್ಲಿ ಇಜ್ರಾಯೆಲ್ ಲೊಕಾ ಮರ್ಯಾದಿಕ್ ಗುರಿ ಹೊಲಾತ್. 8 ಧನಿ, ತುಕಾ ವಿರೊಧ್ ಹೊವ್ನ್ ಪಾಪ್ ಕರಲ್ಲ್ಯಾ ಸಾಟ್ನಿ, ಅಮಿ ಅನಿ ಅಮ್ಚಿ ರಾಜಾ, ಪುರ್ವಜಾ ಅನಿ ಮುಖಂಡಾ ಸಗ್ಳೆ ಮರ್ಯಾದ್ಗೆಡಿ ಹೊಲಾವ್. 9 ಸರ್ವೆಸ್ಪರ್ ಅಮ್ಚೊ ದೆವ್ ದಯಾ ದಾಕ್ವುನಾರೊ, ಅನಿ ಕ್ಷಮಾ ಕರ್ನಾರೊ ದೆವ್ ಹೊವ್ನ್ ಹಾಯ್; ಅಮಿ ತೆಕಾ ವಿರೊಧ್ ಹೊಲಾಂವ್ ನ್ಹಯ್. 10 ಅಮ್ಚ್ಯಾ ದೆವ್ ಸರ್ವೆಸ್ಪರಾಚಿ ಗೊಸ್ಟ್ ಆಯ್ಕುನಾವ್, ಅಮ್ಚಿ ಸೆವಕಾ ಪರ್ವಾದಿಯಾಚ್ಯಾ ವಯ್ನಾ ಅಮ್ಕಾ ದಾಕ್ವಲ್ಲ್ಯಾ ಬರ್ಯಾ ವಾಟೆನ್ ಚಲುಕ್ನಾವ್. 11 ಇಜ್ರಾಯೆಲ್ ಲೊಕಾನಿ ತುಜ್ಯಾ ಬರ್ಯಾ ಶಿಕಾಪಾಕ್ನಿ ಕಾನ್ ದಿನಸ್ತಾನಾ, ವ್ಹಾಂಕ್ಡ್ಯಾ ವಾಟೆನ್ ಗೆಲ್ಯಾನಿ, ತೆಜ್ಯಾ ವಯ್ನಾ ತುಜ್ಯಾ ಪಾಪಾಂಚಿ ಬುರ್ಶಿಕಾಮಾ ದೆವಾಚೊ ಸೆವಕ್ ಮೊಯ್ಜೆಚ್ಯಾ ನೆಮಾತ್ನಿ ತಿಯಾ ಆನ್ ಥವ್ನ್ ಹುಕುಮ್ ದಿಲ್ಲಿ ತರಾಸಾ ಅಮ್ಚ್ಯಾ ವರ್‍ತಿ ವೊತುನ್ ಹೊಲಾ, ಅಮಿ ತರ್ ದೆವಾಕ್ ವಿರೊಧ್ ಹೊವ್ನ್ ಚಲಲ್ಲೆಚ್ ಹೊವ್ನ್ ಹಾತ್. 12 ಅಬಕ್, ಅಮ್ಚ್ಯಾ ದೆವಾನ್ ಅಮ್ಚ್ಯಾ ವರ್‍ತಿ ಮೊಟ್ಟೊ ತರಾಸ್ ಯೆಯ್ ಸಾರ್ಕೆ ಕರುನ್, ಅಮ್ಕಾ ಅನಿ ಅಮ್ಚ್ಯಾ ವರ್‍ತಿ ಅಧಿಕಾರಿಯಾಕ್ನಿ ಗಾಳಿಯಾ ದಿವ್ನ್ ಸಾಂಗಲ್ಲಿ ಗೊಸ್ಟಿಯಾ ಫುರಾ ಕರ್ಲಾ. ಜರುಜಲೆಮಾಕ್ ಹೊಲ್ಲೊ ಅಸ್ಲೊ ತರಾಸ್ ಜಿಮ್ನಿ ವರ್‍ತಿ ಖಯ್ಬಿ ಕನ್ನಾಬಿ ಹೊವ್ಕ್ ನಾ ನ್ಹಯ್. 13 ಹಿ ಸಗ್ಳಿ ತರಾಸಾ ಮೊಯ್ಜೆಚ್ಯಾ ನೆಮಾತ್ನಿ ಲಿವಲ್ಲ್ಯಾ ಸಾರ್ಕೆಚ್ ಅಮ್ಚ್ಯಾ ವರ್‍ತಿ ಯೆಲಾತ್; ಖರೆ ಅಮಿ ಅಮ್ಚಿ ಬುರ್ಶಿ ಚಾಲ್ನುಕಿ ಸೊಡುನ್ ತುಜೆ ಖರೆಪಾನ್ ಬಗುನ್ ಚಲಿಸಾರ್ಕೆ ಅಮ್ಚೊ ದೆವ್ ಸರ್ವೆಸ್ಪರಾಚಿ ದಯಾ ಮಾಗುಕ್ ನಾವ್. 14 ತಸೆ ಹೊವ್ನ್, ಸರ್ವೆಸ್ಪರಾನ್ ತೊ ತರಾಸ್ ಬಗಟ್ಲ್ಯಾರ್ಬಿ ಅಮ್ಚ್ಯಾ ವರ್‍ತಿ ಯೆಯ್ ಸಾರ್ಕೆ ಕರ್ಲಾ, ಅಮ್ಚೊ ಸರ್ವೆಸ್ಪರ್ ಧನಿ ಅಪ್ನಿ ಕರ್‍ತಲ್ಯಾ ಸಗ್ಳ್ಯಾ ಕಾಮಾತ್ನಿ ನಿತಿವಂತ್ ಹೊವ್ನ್ ಹಾಯ್, ಖರೆ ಅಮಿ ತೆಚಿ ಗೊಸ್ಟ್ ಆಯ್ಕುಕ್ ನಾವ್. 15 ಅಮ್ಚ್ಯಾ ದೆವಾ ಸರ್ವೆಸ್ಪರಾ, ತುಜ್ಯಾ ಭುಜೆಚಿ ಬಳ್ ದಾಕ್ವುನ್, ತುಜ್ಯಾ ಲೊಕಾಕ್ನಿ ಇಜಿಪ್ತಾಕ್ನಾ ಭಾಯ್ರ್ ಕಾಡುನ್ ಅಜುನ್ ಪತರ್ ಬರೆ ನಾವ್ ಘೆಟಲ್ಲೊ ತಿಯಾ, ಅತ್ತಾ ಅಮ್ಕಾ ದಯಾ ದಾಕ್ವು, ಅಮಿ ಪಾಪ್ ಕರುನ್ ಬುರ್ಶಿ ಲೊಕಾ ಹೊವ್ನ್ ಚಲ್ಲ್ಯಾಂವ್. 16 ಸರ್ವೆಸ್ಪರಾ, ತುಜ್ಯಾ ಸಗ್ಳ್ಯಾ ಬರ್ಯಾ ಕಾಮಾತ್ನಿ ಸಮಾ ಹೊಯ್ ಸರ್ಕೆ ತುಜೆ ಶಾರ್ ಅನಿ ಪವಿತ್ರ್ ಮಡ್ಡಿ ಹೊವ್ನ್ ಹೊತ್ತ್ಯಾ ಜರುಜಲೆಮಾಚ್ಯಾ ವರ್‍ತಿ ಹೊತ್ತೊ ತುಜೊ ರಾಗ್ ಅನಿ ತುಜಿ ರಾಗಾಚಿ ಆಗ್ ದಯಾಕರುನ್ ಕಾಡ್ ಅಮ್ಚ್ಯಾ ಅನಿ ಅಮ್ಚ್ಯಾ ಪುರ್ವಜಾಂಚ್ಯಾ ಪಾಪಾಂಚ್ಯಾ ವಯ್ನಾ ಜರುಜಲೆಮ್ ಅನಿ ತುಜಿ ಲೊಕಾ ಅಜು ಭಾಜುಚ್ಯಾ ಲೊಕಾಂಚ್ಯಾ ಶರಾಪಾಕ್ನಿ ಗುರಿ ಹೊಲಾತ್ ನ್ಹಯ್. 17 ಅಮ್ಚ್ಯಾ ದೆವಾ, ಅತ್ತಾ ತುಜ್ಯಾ ಸೆವಕಾಚಿ ಮಾಗ್ನಿ ಅನಿ ಸ್ತುತಿ ಆಯ್ಕ್; ಹಾಳ್ ಹೊಲ್ಲ್ಯಾ ತುಜ್ಯಾ ಪವಿತ್ರ್ ಗುಡಿಕ್ ಖುಶಿಚ್ಯಾ ತೊಂಡಾನ್ ಅನಿ ಬರ್ಯಾಪಾನಾನುಚ್ ಬಗ್. 18 ಮಾಜ್ಯಾ ದೆವಾ, ಕಾನ್ ದಿವ್ನ್ ಆಯ್ಕ್, ತುಜೆ ನಾವ್ ಘೆಟಲ್ಲ್ಯಾ ಶಾರಾಕ್ ಅನಿ ಅಮ್ಚ್ಯಾ ಹಾಳ್ ಪಡಲ್ಲ್ಯಾ ಗಾಂವಾಕ್ನಿ ಡೊಳೆ ಉಗ್ಡುನ್ ಬಗ್, ಅಮಿ ಬರ್ಯ್ಯಾ ಲೊಕಾಂಚ್ಯಾ ಸಾರ್ಕೆ ನ್ಹಯ್, ತುಜ್ಯಾ ಮೊಟ್ಟ್ಯಾ ದಯಾ ವರ್‍ತಿ ವಿಶ್ವಾಸ್ ಥವ್ನ್ ಅಮ್ಚಿ ಮಾಗ್ನಿಯಾ ತುಜ್ಯಾ ಇದ್ರಾಕ್ ಥವ್ಲಾವ್, 19 ಧನಿ, ಆಯ್ಕ್! ಧನಿ, ಕ್ಷಮಾ ಕರ್, ಧನಿ ಆಯ್ಕ್, ಕಾಮ್ ಕರುಕ್ ತಡೊ ಕರುನಕ್ಕೊ! ಮಾಜ್ಯಾ ದೆವಾ, ತುಜಿ ಲೊಕಾ, ಅನಿ ಶಾರ್ ತುಜ್ಯಾ ನಾವಾಚೆ ಹೊಲ್ಲ್ಯಾ ಸಾಟ್ನಿ ರಾಕುನ್ ಘೆ!

ಗಾಬ್ರೆಲ್ ಧುತಾನ್ ಪರ್‍ವಾದನ್ ವಿವರನ್ ಕರಲ್ಲೆ

20 ಮಿಯಾ ತೊಂಡ್ ಉಗ್ಡುನ್ ಮಾಗುನ್ಗೆತ್, ಮಾಜೊ ಅನಿ ಮಾಜ್ಯಾ ಇಜ್ರಾಯೆಲ್ ಲೊಕಾಂಚೊ ಪಾಪ್ ತುಜ್ಯಾಕ್ಡೆ ಸಾಂಗುನ್ಗೆತ್ ಮಾಜ್ಯಾ ದೆವಾಚಿ ಗುಡಿ ಪರ್‍ತುನ್ ಭಾಂದ್ತಲ್ಯಾ ವಿಶಯಾತ್ ಮಾಜ್ಯಾ ಸರ್ವೆಸ್ಪರಾ ದೆವಾಕ್ಡೆ ಮಾಗ್ನಿ ಕರಿತ್ ರ್‍ಹಾತಾನಾ, 21 ಪಯ್ಲೆ ಮಾಜ್ಯಾ ದರ್ಶನಾತ್ ದಿಸಲ್ಲೊ ಗಾಬ್ರೆಲ್, ಲೈ ಗಡ್ಬಡಿನ್ ಹುಡ್ಕುನ್ಗೆತ್ ಯೆವ್ನ್ ಸಕ್ಕಾಳಾಚ್ಯಾ ಮಾಗ್ನಿಚ್ಯಾ ಬಲಿ ಭೆಟ್ವುತಲ್ಯಾ ಎಳಾರ್ ಮಾಜ್ಯಾಕ್ಡೆ ಯೆವ್ನ್, 22 ಮಾಜ್ಯಾಕ್ಡೆ ಅಸೆ ಬೊಲುನ್ ಶಿಕಾಪ್ ಕರ್ಲ್ಯಾನ್, ದಾನಿಯೆಲಾ ತುಕಾ ಬುದ್ದಿಚೆ ಶಿಕಾಪ್ ಕರುಕ್ ಸಾಟ್ನಿ ಮಿಯಾ ಅತ್ತಾ ಯೆಲೊ. 23 ತುಜಿ ಮಾಗ್ನಿ ಶುರು ಹೊತಾನಾಚ್ ಮಾಕಾ ದೆವಾಚೊ ಹುಕುಮ್ ಹೊಲ್ಲೊ, ತೆ ತುಕಾ ಸಾಂಗುಕ್ ಮನುನ್ ಮಿಯಾ ಅತ್ತಾ ಯೆಲೊ, ತಿಯಾ ದೆವಾಕ್ ಲೈ ಮೆಚ್ಕಿಚೊ, ಹಿ ದೆವಾಚಿ ಗೊಸ್ಟ್ ಚಿಂತುನ್ ಬಗ್, ಅನಿ ಹೆ ದರ್ಶನ್ ಬಗ್, 24 ಬುರ್ಸೆ ಪಾನಾಕ್ ಆಕ್ರಿ ದಾಕ್ವುತಲೆ ಪಾಪಾಕ್ನಿ ಸೊಡ್ತಲೆ ಅಪ್ವಾದಾ ಕರ್‍ತಲೆ ಬರೊ ದೆವಸ್ಪಾನಾಚೊ ಎಳ್ ತಯಾರ್ ಕರ್‍ತಲೆ ದರ್ಶನ್ ಅನಿ ಪರ್ವಾದಿಚ್ಯಾ ಗೊಸ್ಟಿಕ್ ಛಪ್ಪೊ ಮಾರುನ್ ಘಟ್ ಕರ್‍ತಲೆ ಲೈ ನಿತಳ್ ಹೊತ್ತ್ಯಾಕ್ ಅಭಿಶೆಕ್ ಕರ್‍ತಲೆ ಹೆ ಸಗ್ಳೆ ಹೊತಲ್ಯಾ ಅದ್ದಿ ತುಜ್ಯಾ ಲೊಕಾಕ್ನಿ ಅನಿ ನಿತಳ್ ಶಾರಾಕ್ ಸತ್ತರ್ ವಾರಾ ಕಳ್ದುಚೆ ಮನುನ್ ನಿರ್ದಾರ್ ಹೊಲಾ. 25 ಹೆ ತಿಯಾ ಮನಾತ್ ಕಳ್ವುನ್ ಘೆ ಜರುಜಲೆಮ್ ಭಾಂಧುನ್ ಹೊಂವ್ದಿತ್, ಮನ್ತಲಿ ದೆವಾಚಿ ಗೊಸ್ಟ್ ಯೆತಲ್ಯಾ ದಿಸಾತ್ನಿ ಅಭಿಶೆಕ್ ಹೊಲ್ಲೊ ಧನಿ ಯೆಯ್ ಪತರ್ ಸಾತ್ ದಾ ಸಾತ್ ವರಿಸ್ ರ್‍ಹಾತಾ, ತೆಕಾ ಚವ್ಕಾ ಅನಿ ರುಂದಿ ರ್‍ಹಾತಾತ್, ತೊ ಎಳ್ ಲೈ ತರಾಸಾಚೊ ಹೊವ್ನ್ ರ್‍ಹಾತಾ. 26 ಸಾಟಾರ್ ದೊನ್ ವಾರ್ ಕಳದ್ಲ್ಯಾ ಮಾನಾ ಅಭಿಶೆಕ್ ಕರುನ್ ಹೊಲ್ಲೊ ಎಕ್ಲೊ ಬಾರ್ಯ್ ಪಡ್ತಾ, ತೆಕಾ ಕಾಯ್ಬಿ ರ್‍ಹಾಯ್ನಾ ಭುತ್ತುರ್ ಗುಸ್ತಲ್ಯಾ ಧನಿಚೆ ಶಾರ್ ಅನಿ ಪವಿತ್ರ್ ಗುಡಿಕ್ ಹಾಳ್ ಕರ್‍ತಾತ್, ಲೈ ಭರುನ್ ಯೆಲ್ಲ್ಯಾ ಹೊಂವಾರ್ಯಾ ವಯ್ನಾ ಶಾರ್ ಹಾಳ್ ಹೊತಾ, ಆಕ್ರಿ ಪತರ್ಬಿ ಝಗ್ಡೊ ಹೊತಾ, ನಾಸ್ ಹೊತಲೆ ಖರೆಚ್ ಹೊಯ್. 27 ಧನಿ ಎಕ್ ವಾರಾಕ್ ಹೊಯ್ ಸಾರ್ಕೆ ಲೈ ಲೊಕಾಂಚ್ಯಾಕ್ನಾ ಘಟ್ ಕರಾರ್ ಕರುನ್ಗೆತಾ, ಬಲಿ ಆರಾದನ್ ಸಗ್ಳಿ ಇಬೆ ಕರ್ತಾ, ಎಕ್ ಘಾತ್ಕೊ ಮಾನುಸ್ ಬುರ್ಸೆ ಸಗ್ಳೆ ಗಾಡಿ ಕರುನ್ಗೆವ್ನ್ ಹುಡುನ್ಗೆವ್ನ್ ತೆಕಾ ಚುಕ್ವಿ ನಸ್ತಾನಾ ಹೊತಲ್ಯಾ ಹೊಂವಾರ್ಯಾನ್ ಬುಡ್ವಿ ಪತರ್ ತೊ ಹಾಳ್ ಕರುನ್ಗೆತುಚ್ ರ್‍ಹಾತಾ.