1 Odikyɛ mehoɔhoa me nwo, ɔwɔ nu, mvasoɛ biala nne so, nakoso mebaaha anisoadehu ne nikye bie bɔ Awurade ye hyirele me nanwo dwirɛ. 2 Mese ebie wɔ Kristo nu bɔ afoɛ buru-ne-nná ɛhe, bɛfale* ye bɛhɔle anwuro bɔ ɔtɔ so nza naso. Sɛ né ɔte anwoɔnaen nu oo, sɛ ɔtte anwoɔnaen nu oo, ɛhene de, menze, Nyameɛ yeɛ ɔse ɔ. 3 Amba, mese sɔ sona ne. Sɛ né ɔte anwoɔnaen nu oo, sɛ ɔtte anwoɔnaen nu oo, ɛhene de, menze, Nyameɛ yeɛ ɔse ɔ. 4 Bɛfale ye bɛhɔle paradise, na ɔtele edwirɛ bɔ bɛngora ye ka, ɔne bɔ bɛmma atee mma sona nga. 5 Sɔ sona ne yeɛ ngɔfa ye ngɔhoɔhoa me nwo ɔ, na me bɔbɔ de, mengɔ-hoɔhoa me nwo, sana bɔ meyɛ mmerɛ wɔ nu ne. 6 Na sɛ mepena kyɛ mehoɔhoa me nwo a, ɛhene ngyire kyɛ nnne adwene, ofikyɛ ngɔha nahorɛ. Nakoso mengɔyɛ sɔ, na wamma ebie ammu me kyɛ metra kyɛbɔ onwu me ne, anaa bɔ ɔte fi me berɛ ne, 7 ɔnate anisoadehu bɔ ɔyɛ nwanwa bɔ nyane ye nati.

Yeti, bɔ ɔkɔyɛ ne mamma me nwo so maa wammo so ne, bama me bowue bie wɔ me nwonaen nu, Satan bɔfoɛ kyɛ ɔbobɔ me, kyɛbɔ ɔkɔyɛ a mengɔma me nwo so maa ɔngɔbo so ɔ. 8 Nzrɛle Awurade pɛn nza kyɛ, ɔma ofi me so. 9 Nakoso ɔha hyirele me kyɛ: "M’adom bɔ ɔwɔ wɔ so ne sone, ofikyɛ me tumi yɛ adwuma yé wɔ ebie nu mmerɛ bɔ wayɛ mmerɛ ne." Yeti, ngɔfa anigye ngɔhoɔhoa me nwo wɔ me mmerɛyɛ nwo, na wamaa Kristo tumi ne atena me so. 10 Na Kristo ti, me nye gye ye nwo kyɛ mayɛ mmerɛ, bɛbɔ me alapaa, wahia me, mmenia tane me nye, ná me nwo ahyere me ɔ. Ofikyɛ meyɛ mmerɛ a, yeɛ menya anwoserɛ ɔ.

11 Mayɛ kwasea,* nakoso, ɛmɔ yeɛ ɛmɔ amaa wawa ye sɔ ɔ, ofikyɛ ɛmɔ yeɛ odikyɛ ahaa ɛmɔ kamvo me ɔ. Na sɛ nnde hwee po a, sɔ asomafoɛ atitire ne de, nikye biala nne berɛ bɔ bɛfa bɛtra me ɔ. 12 Nningyein bɔ okyire paa kyɛ nde somafoɛ ne, mvale animia paa nyɛle ye wɔ ɛmɔ berɛ; nzɛngyerɛneɛ, anwanwadeɛ, ne nningyein bɔ tumi wɔ nu. 13 Ye de, nzu yeɛ nyɛ mmane asafo ahoroɛ nemɔ bɔ ɛmɔ de, ɛmɔ anya bie ɔ? Me haw ngome, yeɛ mamva mangua ɛmɔ so ɔ. Mesrɛ ɛmɔ, mvomsoɛ he de, ɛmɔfa bɛhyɛ me.

14 Ɛmɔnea, pɛn nza so ɛhe yeɛ mayɛ krado kyɛ meba ɛmɔ berɛ ɔ, na mengɔfa me haw mengɔgua ɛmɔ so. Nná ɛmɔ ahodeɛ yeɛ mepena ɔ, mmom ɛmɔ bɔbɔ yeɛ mepena ɛmɔ ɔ, ofikyɛ nná mmaa yeɛ odikyɛ bɛpena nningyein bɛgua b’awofo berɛ ɔ, mmom awofo yeɛ odikyɛ bɛpena nningyein bɛma bɛ mmaa mɔ ɔ. 15 Na me de, ɛmɔ* ti, ɔkɔyɛ me fɛ kyɛ ngɔfa bɔ nne ye biala ngɔma, ná mafa me mumua ne po maboka so. Kyɛbɔ medɔ ɛmɔ paa ne, nzuati yeɛ ɛmɔ de, ɛmɔ nnɔ me sɔ ne? 16 Ɔwɔ nu kyɛ, manyɛ adesoa biala mamma ɛmɔ, nakoso ɛmɔnwa me nye ate soma, na nnaka-naka yeɛ mva nyane ɛmɔ ɔ. 17 Mmenia bɔ nzomane bɛ ɛmɔ berɛ ne, aso mvale bɛ so nnidili ɛmɔ nwo? 18 Nzrɛle Tito, na mmaa ɔne aliemaa kõ wale ɛmɔ berɛ. Tito didili ɛmɔ nwo anaa? Daabi. Aso nná honhom komapɛ nu yeɛ yɛnate ɔ? Na nná agyire komapɛ nala yeɛ yɛtuli ɔ?

19 Sɔ mmerɛ he amukoraati, ɛmɔ adwene yɛ ɛmɔ kyɛ yɛye yɛ nwo noa yɛkyire ɛmɔ anaa? Kristo nu yeɛ yɛdwudwo wɔ Nyameɛ nyunu ɔ. Nakoso adɔfo, ɛmɔ ngɔsoɛ ti yeɛ yɛyɛ ɛhe mukoraati ne. 20 Bɔ mesuro yeɛ ole kyɛ sɛ meba a, annea ne mannwu ɛmɔ wɔ atee bɔ mekuro so, na ɛmɔ koso, annea né ɛmɔ anwu me yé. Na mmom ngɔwa ne, né manzoin, ahoɔyaa, ɛyaa, ngondii, bɛ gyasi ndii nu pepɛlɛ, nzekure, ahomasoɛ, ne basabasa yeɛ ɔwɔ ɛmɔ nu ɔ. 21 Ebia meba bieku a, me Nyameɛ kɔbrɛ me ase wɔ ɛmɔ nyunu, ná mmeni pee bɔ bɛyɛle bɔne, ná banzakra b’adwene wɔ bɛ bra-bɔne, adwamammɔ, ne ahohwibra nwo ne, annea a, ngoli bɛ nwo aworaborɛ.