6 Nakoso kesaalae de, Kristo sa aha sɔfodwuma bɔ odi mu koraa tra bɛ deɛ ne, ofikyɛ ye yeɛ apam bɔ odi mu ne gyi ye so ɔ; na sɔ apam ne, ogyi bɔhyɛ ahoroɛ bɔ odi mu so. 7 Sɛ ne edwirɛ nne apam bɔ oli moa nanwo a, ahaa ye nwo nhia kyɛ bɛyɛ apam bɔ ɔtɔ so nyɔ. 8 Nakoso onwuni mvomsoɛ wɔ mmenia nanwo, yeti yeɛ ɔhane kyɛ:
" ‘Ɛmɔtie, ngyẽa bie ba,
na mene Israel awuro ne Yuda awuro kɔyɛ apam foforɛ,’
Awurade yeɛ waha ɔ.
9 ‘Ɔngɔyɛ kyɛ apam bɔ mene bɛ nana mɔ yɛle
mmerɛ bɔ nzosɔle bɛ sa nyele bɛ mvili Egypt aseɛ so ne.
Ofikyɛ banni me apam naso,
yeti me koso nyele me nye mmane bɛ,’
Awurade noa dwirɛ ɛne.
10 ‘Mmom apam he yeɛ mene Israel awuro kɔyɛ ye wɔ ngyẽa ne si ɔ,’
Awurade noa dwirɛ ɛne.
‘Ngɔfa me mmeraa ngowura bɛ ti anu,
na mahworɔ magua b’ahone nu.
Na ngɔyɛ bɛ Nyameɛ,
na bɛ koso bayɛ me maen.
11 Na bɛ nu biala ngohyire ye mmango anaa oliema kõ kyɛ:
"Nwu Awurade,"
ofikyɛ bɛ mukoraati, ofi akwalaa so bɔ ɔkwaadwu panyi so ne,
ebiala konwu me.
12 Na ngonwu bɛ awunvoin wɔ bɛ amumuyɛɛ nwo,
na bɛ bɔne koso, mengɔkaye ye kõ.’ "
13 Mmerɛ bɔ ɔhane "apam foforɛ" ne, okyire kyɛ apam bɔ oli moa ne ayɛ daa. Na nikye biala bɔ wayɛ daa, ná ɔpɛ nu ne, ɔngɔhyɛ okomini.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)