1 "Nahorɛ paa bɔ meka mekyire ɛmɔ yeɛ ole kyɛ, ebiala bɔ ɔmva anoa nanu ngɔ mmoan tuin nanu, na ɔfa nekaa foforɛ fo kɔ nu ne, ɔte awieniɛ, na ɔfẽ nningyein. 2 Nakoso, bɔ ɔfa anoa nanu kɔ nu ne de, ye yeɛ ɔnea mmoan ne. 3 Ye de, bɔ ɔte anoa ne noa ne se ye, na mmoan ne tie ye konvi. Na ɔfa ye mmoan ne bɔbɔ dumaa frɛ bɛ, na odi bɛ nyunu fa bɛ fite. 4 Sɛ ɔfa ye mmoan namukoraati fite a, odi bɛ nyunu, na mmoan ne di ye si, ofikyɛ bɛse ye konvi. 5 Ɛwɔfoɛ de, bɛngoli ye si lle, mmom bɛkɔnwati bɛkofi ye nwo, ofikyɛ bɛnze ɛwɔfoɛ konvi."

6 Yesu buli bɛ anyandera, nakoso bannde bɔ ne ɔka kyire bɛ nabo. 7 Yeti, Yesu sa hane ye bieku kyɛ: "Nahorɛ paa bɔ meka mekyire ɛmɔ yeɛ ole kyɛ, me yeɛ nne mmoan nemɔ anoa ne. 8 Bɛ bɔ bɛlili me nyunu bɛwale namukoraati te awiefoɛ, na bɛfẽ nningyein; nakoso mmoan ne andie bɛ. 9 Me yeɛ nne anoa ne, ebiala bɔ ɔfa me nu kɔ nu ne, okonya ngoa, ɔkɔhɔ nu kɔwa, na okonya nekaa kodidi. 10 Awieniɛ de, ɔba a, né ɔbaawia nikye, ɔbaahu ebie, na ɔsɛkye nikye. Na me de mmale, kyɛbɔ ɔkɔyɛ a bekonya ngoa, na banya ye maa wabo so. 11 Me yeɛ nne mmoan-neafoɛ pa ne, mmoan-neafoɛ pa ne de, ɔfa ye ngoa to berɛ ma ye mmoan ne. 12 Paaniɛ ne de, nná ye yeɛ ɔnea mmoan ne ɔ, ná mmoan ne tte ye deɛ, yeti sɛ onwu kyɛ pataku ba a, ɔyakyi mmoan ne berɛ nwati maa pataku ne bakye bɛ, na ɔbɔ bɛ sande. 13 Paaniɛ ne nwati, ofikyɛ babɔ ye paa, na mmoan ne nwo nhia ye. 14 Me yeɛ nne mmoan-neafoɛ pa ne, mese me mmoan, na me mmoan koso se me, 15 kyɛbɔ mese Baba ne, na Baba ne koso se me nala; na mefa me ngoa meto berɛ mema mmoan ne. 16 Nne mmoan foforɛ bɔ benne tuin he anu. Odikyɛ mefa bɛ meba nu maa bɛbatie me konvi, ná bayɛ kue kõ, banya sona kõ bɔ ɔnea bɛ so ɔ. 17 Ɛhe ati yeɛ Baba ne dɔ me ne, ofikyɛ mefa me ngoa meto berɛ, kyɛbɔ ɔkɔyɛ a mesa kɔha ye bieku ɔ. 18 Ebiala ngora nne mvi me sa nu, me bɔbɔ yeɛ mefa meto berɛ ɔ. Nne tumi kyɛ mefa meto berɛ, na nne tumi kyɛ mesa mefa. Ahyɛdeɛ he yeɛ me Baba fa mane me ɔ."

19 Sɔ dwirɛ he ati, Yudafoɛ nanu sa hyɛle bieku. 20 Bɛ nu pee hane kyɛ: "Ole sunzummɔne, na wabɔ laen. Nzuati yeɛ ɛmɔtie ye ne?" 21 Nakoso ebiemɔ hane kyɛ: "Ebie bɔ sunzummɔne wɔ ye so ngɔhora ngɔha sɔ dwirɛ hemɔ. Sunzummɔne kɔhora kɔte anyesiniwaaniɛ nye?"

22 Sɔ mmerɛ ne, né bɛdi Afahyɛ bɔ bɛfa bɛhyira Asɔre Awuro naso ne wɔ Yerusalem, na né ɔte ayirɛ mmerɛ, 23 né Yesu nate-nate asɔre awuro berɛ, né ɔnate Solomon varanda naso. 24 Yeɛ Yudafoɛ nemɔ pɛle ye nwo yiale ɔ, na bɛha bɛhyirele ye kyɛ: "Ɛma yɛnwondɛ yɛkodwu kyinzu? Sɛ wɔ yeɛ ɛle Kristo ne a, ka ye pen kyire yɛ." 25 Yesu ha hyirele bɛ kyɛ: "Maha mahyire ɛmɔ, nakoso ɛmɔnne benni. Nningyein bɔ meyɛ ye wɔ me Baba dumaa nu ne, odi me nwo adanzeɛ. 26 Nakoso ɛmɔnne benni, ofikyɛ nná me mmoan yeɛ ole ɛmɔ. 27 Me mmoan tie me konvi, mese bɛ, na bɛdi me si. 28 Ngɔma bɛ daa ngoa, na bɛngɔsɛkye lle, ná ebiala ngole bɛ ngɔfi me sa nu. 29 Bɔ me Baba afa ama me ne, ɔte piri tra nikye biala, ná ebiala nne berɛ bɔ ɔkɔhora kole bɛ kofi me Baba sa nu ɔ. 30 Mene Baba ne te kõ."

31 Yudafoɛ nemɔ sa sesale nyɔboɛ, kyɛ bɛkwaato bɛbɔ ye. 32 Yesu ha hyirele bɛ kyɛ: "Mayɛ nyumaa pa pee bɔ ofi me Baba berɛ mahyire ɛmɔ. Nyumaa nanu beni ti yeɛ ɛmɔ baaboro me nyɔboɛ ne?" 33 Yudafoɛ nemɔ yele ye noa kyɛ: "Nná nningyein pa bɔ ayɛ nati yeɛ yɛbaaboro wɔ nyɔboɛ ɔ, mmom abɔ mmusue; ofikyɛ ɛte sona, nakoso ɛyɛ wɔ nwo kyɛ ɛte nyameɛ." 34 Yesu ha hyirele bɛ kyɛ: "Nná ɛmɔ mmeraa nanu yeɛ bahworɔ kyɛ: ‘Ngane kyɛ, "Ɛmɔte nyameɛ" ’ ne? 35 Sɛ ɔfrɛle bɛ bɔ Nyameɛ dwirɛ ne wale bɛ berɛ* ne nyameɛ, na sɛ bɛsesã Tworɔnzɛm ne a ɔnyɛ ye a, 36 nzuati yeɛ me bɔ Baba ne ate me nwo, na wafa me wawa wiase ne, meka kyɛ ‘Nde Nyameɛ Awa’ a, ‘mabɔ mmusue’ ɔ? 37 Sɛ nná me Baba nyumaa yeɛ meyɛ a, nnɛmɔ dɛ́ me bɛdi. 38 Na sɛ Baba ne nyumaa yeɛ meyɛ, ná ɛmɔnne me benni po a, nyumaa ne de, ɛmɔle bɛli. Ɛhene kɔmaa ɛmɔ konwu ye, na ɛmɔ ate yebo kyɛ, Baba ne wɔ me nu, na me koso nwɔ Baba ne nu." 39 Yeti ahaa bɛkye ye, nakoso onwatili, na bɛ sa anga ye.

40 Na osa pɛle Yordan nzue ne hɔle nekaa bɔ né Yohane bɔ asu ne, na ɔɔtenane dɔ. 41 Ná mmeni pee wale ye nwo berɛ, na bɛhane kyɛ: "Yohane anyɛ nzɛngyerɛneɛ komapɛ po, nakoso bɔ ɔha fale biaa he anwo namukoraati te nahorɛ." 42 Na mmeni pee nyane gyidie wɔ ye nu.