1 Yeti ɔfolo ɛleɛn ne, na osa hɔle ye bɔbɔ ye kuro. 2 Na bɛfale ebie bɔ wabubu la bɛen so bɛbrɛle ye. Yesu nwuni bɛ gyidie ne, ɔha hyirele bubuaniɛ ne kyɛ: "Mma, ka w’ahone to wɔ kunu, bafa wɔ bɔne bahyɛ wɔ." 3 Afei, né atwerɛfoɛ nemɔ bie keka kyire bɛ nwo kyɛ: "Akoaa he ka mmusue dwirɛ." 4 Yesu nwuni adwene bɔ otira bɛ ne, ɔhane kyɛ: "Nzuati yeɛ ɛmɔ anya adwemmɔne wɔ ɛmɔ ahone nu ne? 5 Beni yeɛ ɔyɛ mmerɛ ɔ? Kyɛ ɛkɔha kyɛ, ‘Bafa wɔ bɔne bahyɛ wɔ,’ anaa ɛkɔha kyɛ, ‘Dwɔso na nate.’ 6 Nakoso, bɔ ɔkɔyɛ na ɛmɔ anwu kyɛ sona Awa ne le tumi wɔ aseɛ he aso kyɛ ɔkora fa bɔne kyɛ ne," ɔha hyirele bubuaniɛ ne kyɛ: "Dwɔso, fa wɔ bɛen, na kɔ awuro." 7 Na ɔdwɔso hɔle ye awuro. 8 Mmenia ne nwuni ɛhe ne, esuronyi hane bɛ, na bɛhyɛle Nyameɛ bɔ ɔfale sɔ tumi ne mane sona né anuonyam.

9 Yesu fili berɛ, na ɔkɔ ne, onwuni biaa bie bɔ bɛfrɛ ye Mateo, né ɔte nekaa bɔ bɛdide toɔ ne. Yeɛ ɔha hyirele ye kyɛ: "Baali me si." Na ɛberɛ nala, odwɔso lili ye si.

10 Yesi ne, mmerɛ bɔ Yesu wɔ Mateo awuro odidi ne, bɛ bɔ bɛdide toɔ ne abɔnefoɛ pee wale berɛ, na bɛne ye, ne ye asuafoɛ ne tole asaa didili. 11 Farisifoɛ nemɔ nwuni ɛhe ne, bɛha bɛhyirele ye asuafoɛ nemɔ kyɛ: "Ɛmɔ kyerɛkyerɛniɛ ne, nzuati yeɛ ɔne bɛ bɔ bɛdide toɔ ne abɔnefoɛ didi ne?" 12 Yesu tele ɛhe ne, ɔha hyirele bɛ kyɛ, "Bɛ bɔ bɛte apɔ ne, benhia dɔktaniɛ, bɛ bɔ bɛnde apɔ ne mmom yeɛ behia dɔktaniɛ ɔ. 13 Ɛmɔhɔ beesua bɔ edwirɛ he kyire ɔ: ‘Mekuro anwunvoin, ɔtte afɔleɛ.’ Nná ateneneefoɛ ti yeɛ mmale ɔ, mmale kyɛ mebaafrɛ abɔnefoɛ."

14 Yesi ne, Yohane asuafoɛ ne wale ye berɛ, na bɛbisale ye kyɛ: "Nzuati yeɛ Farisifoɛ nemɔ yɛ akɔngyere, na w’asuafoɛ nemɔ de, bɛnyɛ bie ne?" 15 Yesu ha hyirele bɛ kyɛ: "Brienzua bɔ ɔbaagya ne wɔ ye nnamvo mɔ nwo ne, ɔkɔyɛ sɛɛ ne bɛ wora abɔ? Nakoso mmerɛ bie kɔwa bɔ bɛkɔfa brienzua bɔ ɔbaagya ne bɛkɔhɔ, sɔ mmerɛ ne, bɛkɔyɛ akɔngyere. 16 Ná ebiala nne berɛ bɔ ɔfa ɛtena monɛ ta atadeɛ daa nu ɔ, ofikyɛ ɛtena monɛ ne kɔte kofi daa nanu, na ɔba sɔ a, atadeɛ ne kɔte piri kɔtra daa ne. 17 Afei koso, bɛmva nzãa foforɛ bengua nzãa bɔtɔ daa nu. Sɛ bɛyɛ sɔ a, bɔtɔ ne kɔpakye maa nzãa ne kohwie kogua, ná nzãa bɔtɔ ne koso kɔsɛkye. Yeti bɛfa nzãa foforɛ bɛgua nzãa bɔtɔ monɛ nu, na ye munyɔ né anzɛkye."

18 Ogu so ɔka sɔ dwirɛ ne, panyi bie wale berɛ, na obuli ndwerɛ wɔ ye nyunu hane kyɛ: "Kesaalae de, medɛ́ medi kyɛ mma brasua ne awu, nakoso bra, na baafa wɔ sa gua ye so, ná ɔkɔwa ngoa nu." 19 Yesu dwɔsole, na ɔne ye asuafoɛ nemɔ lili ye si. 20 Na brasua bie bɔ mogya atu ye afoɛ 12 fale ye si, na ɔfale ye sa sɔle ye atadeɛ* ne noa. 21 Edwirɛ bɔ ne ɔka yeɛ ole kyɛ: "Sɛ mefa me sa mesɔ ye atadeɛ nanu mbaen po a, me nwo kɔtɔ me." 22 Yesu kakyile ye nwo, ná onwuni ye ne, ɔha hyirele ye kyɛ: "Baa brasua, ka w’ahone to wɔ kunu! Wɔ gyidie amaa wɔ nwo atɔ wɔ." Na sɔ mmerɛ nala, maame ne nwo tɔle ye.

23 Afei Yesu wurale panyi n’awuro berɛ, na onwuni bɛ bɔ bɛhu awɛen, ne mmenia bɔ bɛsu ne, 24 Yesu ha hyirele bɛ kyɛ: "Ɛmɔfite, ofikyɛ abayaa ne wulli, wala." Bɛtele ɛhe ne, bɛhyɛle yebo bɛserele ye. 25 Mmenia ne fitele ne, ɔhɔle nekaa bɔ abayaa ne la ne, na ɔsɔle ye ne sa nu maa ɔdwɔsole. 26 Nahorɛ nu, ɛhe anwo dwirɛ trɛ hɔlɛ mandanu berɛ mukoraati.

27 Yesu fili berɛ, na ɔkɔ ne, anyesiniwaafoɛ nyɔ bie lili ye si, na né bɛteɛtea nu kyɛ: "David awa, nwu yɛ anwunvo." 28 Ɔhɔle awuro nanu ne, bɛwale ye berɛ, yeɛ Yesu bisale bɛ kyɛ: "Ɛmɔdɛ bɛdi kyɛ ngɔhora ngɔyɛ ɛhe?" Na bɛhane kyɛ: "Yoo! Awurade." 29 Yeɛ ɔfale ye sa hane bɛ nye ne, na ɔhane kyɛ: "Kyɛbɔ ɛmɔ gyidie te ne, ɔyɛ sɔ ma ɛmɔ." 30 Na bɛ nye ne tele. Nakoso Yesu bɔle bɛ kɔkɔ kyɛ: "Ɛmɔnea yé, na ebiala ande ye nwo dwirɛ." 31 Nakoso bɛfitele ne, bɛbɔle ye nwo dawure wɔ mandanu berɛ mu.

32 Bɛ́fi berɛ bɛkɔ ne, bɛfale ɛmumu bie bɔ sunzummɔne wɔ ye so bɛbrɛle ye; 33 Yesu tule sunzummɔne ne fili ye nu nala, ɛmumu ne dwudwole. Na ɔyɛle mmenia ne nwanwa maa bɛhane kyɛ: "Ɛhe de, ebie silli Israel lle." 34 Nakoso Farisifoɛ nemɔ hane kyɛ: "Sunzummɔne panyi ne tumi yeɛ ɔfa tu sunzummɔne ɔ."

35 Yesu hyinini nguro ne nnamue nemɔ nu, ohyirehyirele mmenia nemɔ wɔ bɛ sua bɔ beyia nu nemɔ nu, na ɔhane Ahennie nanwo nzɛmba ne. Ɔsale bɛ bɔ bɛnde apɔ ne bɛ bɔ bayɛ mmerɛ namukoraati anwonyerɛ. 36 Onwuni mmeni lɔen ne, bɛyɛle ye anwunvo, ofikyɛ ne bayɛ kyɛ mmoan bɔ bapire-pira bɛ bayakyi bɛ berɛ, bɔ belle ebiala bɔ ɔnea bɛ ne. 37 Yeti, ɔha hyirele ye asuafoɛ nemɔ kyɛ: "Ɛboo nanu nningyein bɔ odikyɛ yɛpɛ ne sone, nakoso bɛ bɔ bɛyɛ adwuma ne te kaa. 38 Yeti, ɛmɔsrɛ ɛboo ne Wura ne kyɛ, ɔma adwumayɛfoɛ pee bra, ná bɛɛpɛ bie."