1 Me Paul, nde Yesu Kristo akoaa bɔ bafrɛ me kyɛ mmanyɛ somafoɛ. Baye me kyɛ nga Nyameɛ nzɛmba 2 bɔ ɔnate adiifoɛ nemɔ so hyɛle ye nwo bɔ wɔ Tworɔ Krongron nanu ne. 3 Sɔ nzɛmba ne fa Ɔwa nanwo, na bɛwole ye anwoɔnaen nu kyɛ David bosoniɛ, 4 nakoso bɛnate honhom bɔ ɔte krongron né tumi so bɛtingyele ye bɛfili ewue nu, na ɛhene amaa wala ali kyɛ ɔte Nyameɛ awa. Na ye yeɛ ole y’Awurade Yesu Kristo. 5 Na yɛnate ye so yeɛ yanya adom ne asomafoɛ adwuma ne, kyɛbɔ ɔkɔyɛ a, ye dumaa ti, maen mukoraati nate gyidie naso kɔyɛ sotie. 6 Na ɛmɔ koso, ɛmɔboka bɛ bɔ bafrɛ bɛ kyɛ bɛyɛ Yesu Kristo deɛ naso.

7 Mefa krataa he mekɔma Nyameɛ adɔfo bɔ bafrɛ bɛ maa baayɛ akrongronfoɛ bɔ bɛwɔ Roman namukoraati:

Adom ne asomdwie bɔ ofi yɛ Baba Nyameɛ ne y’Awurade Yesu Kristo berɛ ha ɛmɔ.

8 Bɔ oli moa koraa ne, nnate Yesu Kristo so meda Nyameɛ ase mema ɛmɔ mukoraati, ofikyɛ gyidie bɔ ɛmɔlɛ ye ne, bɛka ye nwo dwirɛ wɔ wiase mukoraati. 9 Na Nyameɛ bɔ mefa me honhom mesõ ye, na meka Ɔwa nanwo nzɛmba ne di m’adanzeɛ kyɛ, daa biala mekaye ɛmɔ wɔ me mbaeɛ nu. 10 Ná mesrɛ ye daa kyɛ, sɛ ɔkɔyɛ yé, na ɔte Nyameɛ pɛ a, afei de ngɔhora ngɔɔnea ɛmɔ boso. 11 Ofikyɛ mafe ɛmɔ paa, na mepena kyɛ menwu ɛmɔ na mema ɛmɔ honhom nu akyɛdeɛ bie maa ɛmɔyɛ se. 12 Kyire kyɛ, mene ɛmɔ mukoraati, ebiala kɔfa ye gyidie kɔhyɛ ye mmango nguraen. 13 Aliemaa mɔ, mepena kyɛ ɛmɔnwu ye kyɛ, mmerɛ pee yeɛ mayɛ m’adwene kyɛ ngɔwa ɛmɔ berɛ, kyɛbɔ ɔkɔyɛ a ngonya aba bie ngofi ɛmɔ berɛ, kyɛbɔ nyane ye wɔ maen bɔ waha nemɔ berɛ ne. Nakoso basi me atee tonn maa waadwu ɛnɛ. 14 Mema Greekfoɛ ne bɛ bɔ bɛtte Greekfoɛ kerɛ, na mema anyanzafoɛ ne ngwaseafoɛ koso kerɛ, 15 yeti me nye aboro paa kyɛ ngɔɔha nzɛmba ne ngohyire ɛmɔ bɔ ɛmɔ wɔ Roman ne.

16 Ná menvɛle nzɛmba nanwo; nahorɛ dwirɛ yeɛ ole kyɛ, ɛhe yeɛ ɔte Nyameɛ tumi bɔ ɔfa dɛ́ ebiala bɔ ole gyidie ne ngoa ɔ; Yudaniɛ yeɛ oli moa, yeɛ afei Greekniɛ. 17 Ofikyɛ nzɛmba nanu yeɛ bɛnwu Nyameɛ tenenee bɔ ɔnate gyidie so ne, na bɛ bɔ bɛle gyidie ne yeɛ bɛnwu ye ɔ, ofikyɛ bahworɔ kyɛ: "Gyidie yeɛ ɔkɔmaa teneneeniɛ konya ngoa ɔ."

18 Na mmenia bɔ bɛnate atee bɔ ɔttemaye so bɛsi nahorɛ né atee ne, bɛye Nyameɛ yaa ne ali bɛfi anwuro betia bɛ bɔne ne bɛ nningyein bɔ ɔndengyɛ namukoraati, 19 ofikyɛ nikye biala bɔ odikyɛ bɛnwu ye bɛfa Nyameɛ nwo ne, ɔla bɛ nyunu pefee, Nyameɛ amaa banwu ye pefee. 20 Ná ye suban ahoroɛ bɔ anyeɛ ngora nnwu ye, bɔ yeɛ ole ye tumi bɔ ɔwɔ berɛ daa ne Nyameɛ deinn bɔ ɔte ne, wala ali pefee fi mmerɛ bɔ ɔbɔle wiase ne, na nningyein bɔ wabɔ ne yeɛ ɔmaa bɛnwu ye ɔ. Yeti bɛlle nikye biala bɔ bɛfa bɛye bɛ nwo noa ɔ. 21 Ɔwɔ nu, né bɛse Nyameɛ, nakoso bannhyɛ ye anuonyam kyɛ Nyameɛ, na banna ye ase. Mmom nningyein bɔ mvasoɛ nne so yeɛ ne bɛdwene ye nwo ɔ, na bɛ tianu adwene yɛle awosii. 22 Né bɛnwa bɛse nworɛ, nakoso bɛyɛle ngwaseafoɛ, 23 na anuonyam bɔ odikyɛ bɛfa bɛma Nyameɛ bɔ ɔmborɔ ne, bɛmaa ɔyɛle kyɛ anuonyam bɔ bɛfa bɛma nningyein bɔ ɔporɔ te kyɛ sona, nnomaa, ngaka bɔ bɛ gya nná, ne ngaka bɔ bɛtwe bɛ nwo ase statu.

24 Na ɔnate kyɛ bɛpena kyɛ bɛdi b’akɔnnɔ si nati, Nyameɛ yakyile bɛ mane bra-bɔne, kyɛbɔ ɔkɔyɛ a, bɛkogua bɛ nipadua nanwo fiɛ. 25 Ofikyɛ nahorɛ bɔ ɔfa Nyameɛ nwo ne, bɛfa bɛsesane ngondombo, bɛlili abɔdeɛ ni, ná kyɛ ahaa bɛkɔsõ Ɔbɔadeɛ ne, abɔdeɛ mmom yeɛ bɛsõne bɛ ɔ. Ná Ɔbɔadeɛ ne yeɛ anuonyam ha ye daa, daa. Amen!

26 Ɛhe ati, Nyameɛ yakyile bɛ mane nnaa nwo akɔnnɔ bɔ ɔyɛ tɛ, ná bɛ mmrasua nemɔ ne bɛ mmango mmrasua nyane nnaa nu kyɛfa bɔ otia abɔdeɛ nu nhyehyɛɛ. 27 Na sɔ ala yeɛ mmrienzua nemɔ koso yakyile nnaa bɔ bɛne mmrasua kɔla ne, na benyane akɔnnɔ bɔ enu yɛ se bɛmane bɛ nwo, mmrienzua ne mmrienzua yɛle nningyein bɔ ɔyɛ tɛ, na benyane bɛ bɔne nanwo akatua.

28 Na ɔnate kyɛ né bɛnguro kyɛ benya Nyameɛ nwo nimdeɛ bɔ odi mu nati, Nyameɛ koso yakyile bɛ mane adwene bɔ ɔmvata, kyɛ bɛyɛ nningyein bɔ ɔttemaye. 29 Yeti nningyein bɔ ɔndengyɛ ngome yeɛ bɛyɛ ɔ: amumuyɛɛ, aborɛ, anyeborolɛ, ne bɔne. Na ahoɔyaa, awudie, manzoin, nnaka-nnaka, ne adwemmɔne ali bɛ ti. Bɛdi nzekure, 30 bɛ noa yɛ yea, bɛtane Nyameɛ, bɛmmu nikye, bɛte dwɛɛ, bɛhoɔhoa bɛ nwo, bɛdwene adwemmɔne, na bɛndie b’awofo dwirɛ. 31 Bɛnde dwirɛ bo, ɛne bɛ yɛ apam a ɔnyɛ yé, bɛnnwu anwunvoin, na bɛ ti anu yɛ se. 32 Ɔwɔ nu, sɔ mmenia hemɔ se Nyameɛ mmeraa ne paa kyɛ bɛ bɔ bɛyɛ sɔ ne, ewue yeɛ ɔfata bɛ ɔ. Nakoso nná ɛyɛlɛ ngome yeɛ bɛkɔsõ bɛyɛ ɔ, mmom bɛsosɔ bɛ bɔ bɛyɛ sɔ naso.