1 Ninfɛ di oletatɛ-nɔɔfo Eliasib ku olebatatɛ wo nɔɔ lakyɛ baalaabla ɔkpɛ baase Bafoso Kayoko nwu letofo nɛ. Baakleklesa ni, baakpee akloo di aba ninya. Baatofo baalaadu bia lɛba le bɔɔlɛɛ ni leyo Takale Kɔlafa, ni baakleklesa nwu dialaadu kafɔɔ Hananel Leyo Takale nwu nɛ. 2 Yeriko basuɔtɔ latofo oyoyiɛ wɔ niatikanko nwu nii, ni di Imri obisuɔtɔbi Sakur kafɔɔ latofo di ɔlɔɔkɔ lɛma nɛ.

3 Hasena babisuɔtɔbi niase Kɔkpaku Kayoko nwu letofo. Baatika sewoso nini, baakpee akloo ku abɔɔsaa akɔnii ku abɔɔsaa sewoso di aba ninya. 4 Uria obisuɔtɔbi Meremot, aale ni Hakkos ɔwa nialolaa kakyɛ ka nintikanko nii. Nnwɔɔ kamaa Berekia obisuɔtɔbi Mesulam, aale ni Mesesabel ɔwa nialolaa, nnwɔɔ kamaa Bana obisuɔtɔbi Sadok kafɔɔ lalolaa. 5 Tekoa basuɔtɔ nialolaa kakyɛ ka niatikanko nii, kafɔɔ banɔɔfotii lɛma ditakpee nnɛɛ babla ɔkpɛ nwu di kanyu lɛma kalɔ.

6 Pasea obisuɔtɔbi Yoiada ku Besodeia obisuɔtɔbi Mesulam lalolaa Yesana Kayoko. Baatika sewoso nini, baakpee akloo ku abɔɔsaa akɔnii ku abɔɔsaa sewoso di aba ninya. 7 Mma kamaa, Gibeon ku Mispa basuɔtɔ nialolaa nwu- Melatia wɔ niakye ni Gibeon ku Yadon wɔ niakye ni Meronot- aba ya niasiɛ ni di Okle-kamaa abaa kanyayilatɛ otumi kalɔ nialolaa nfa. 8 Harhaia obisuɔtɔbi Usiel, niale ni koto sɛɛle asaablatɛ onwii lɛma, lalolaa kakyɛ ka niatikanko nii; ni di Hanania, nnɔnyi kɔnɔnkɔnɔ-bablatɛ onwii lɛma lalolaa di nninkpo sɛmaa nɛ. Baase Yerusalem letofo dialaadu Oyoyiɛ Blɛfɛɛ nwu. 9 Hur obisuɔtɔbi Rafaia, Yerusalem kale dikudi kakyɛ kanyayilatɛ lalolaa kakyɛ ka niatikanko nii. 10 Di otofo ɔkyakaa di nle mmle yi, Harumaf obisuɔtɔbi Yedaia lalolaa kakyɛ ka niakyɔɔ ni anu leyo nɔɔ, ni di Hasabneia obisuɔtɔbi Hatus lalolaa aatikanko nwɔ nɛ. 11 Harim obisuɔtɔbi Malkiya ku Pahat-Moab obisuɔtɔbi Hasub lalolaa kakyɛ bamba ku Ablobloyo Leyo Takale nwu. 12 Halohes obisuɔtɔbi Salum niale ni Yerusalem dikudi-kakyɛ kanyayilatɛ lalolaa kakyɛ ka niatikanko nii, ku babisankobi nɔɔ lɛkyakaako.

13 Hanun ku batii ba niasiɛ ni di Sanoa lalolaa Ɔtaata Kayoko nwu. Baase ni letofo, baakpee akloo nini ku abɔɔsaa nkɔnii ku abɔɔsaa sewoso di aba ninya. Baalolaa kafɔɔ oyoyiɛ nkpaa kakpe alafa-anɔɔ dialaadu Lefleku Kayoko nwu.

14 Rakab obisuɔtɔbi Malkiya wɔ niale ni Bet Hakerem kale dikudi tunletɛ nialolaa Lefleku Kayoko nwu. Aase ni letofo, aakpee akloo nini ku abɔɔsaa nkɔnii ku abɔɔsaa sewoso di aba ninya.

15 Kol-Hose obisuɔtɔbi Salum wɔ niale ni Mispa kale dikudi kanyayilatɛ niatofo Ntu Kataakɔ Kayoko nwu. Aase ni letofo, aaba ni, aakpee akloo ninya ku abɔɔsaa nkɔnii ku abɔɔsaa sewoso di aba ninya. Aalolaa kafɔɔ Lɛpanta oyoyiɛ nwu di Siloa di Ɔka Kɔba ɔlɔɔkɔ, dialaadu nkatakɔ be niesoo diekye ni Dawid Okpoo kplɛ nwu. 16 Nnwɔɔ kamaa yi, Asbuk obisuɔtɔbi Nehemia wɔ niale ni Bet-Sur kale dikudi-kakyɛ kanyayilatɛ lalolaa aalaadu lɛba le niakyɔɔ ni Dawid ɔkya anu, dialaadu Bakpɛtɛ Leyo ku lɛpanta le baakutu nii.

17 Nnwɔɔ kamaa, Bani obisuɔtɔbi Rehum layila di Lewi batii kanya baalolaa oyoyiɛ nwu. Nnwɔɔ kamaa, Hasabia wɔ niale ni Keila kale dikudi-kakyɛ kanyayilatɛ lalolaa aata kale dikudi nɔɔ. 18 Nnwɔɔ kamaa, Hanadad obisuɔtɔbi Binui niale ni Keila kale dikudi-kakyɛ nyɔɔfa kanyayilatɛ layila di kale lɛma basuɔtɔ kanya baatofo oyoyiɛ nwu. 19 Nnwɔɔ kamaa, Yesua obisuɔtɔbi Eser wɔ niale ni Mispa kanyayilatɛ lalolaa oyoyiɛ nwu kakyɛ bamba, diayɔ ni di lɛba le niakyɔɔ ni akpɛsaa katɛkɔ nkatakɔ anu dialaadu ni oyoyiɛ nwu lɛkɔ. 20 Nnwɔɔ kamaa, Sabai obisuɔtɔbi Baruk layɔ okyĩini aalolaa kakyɛ bamba, diayɔ ni di lɛkɔ nwu dialaadu ni oletatɛ-nɔɔfo Eliasib leyo kayoko. 21 Nnwɔɔ kamaa, Uria obisuɔtɔbi Meremot, aale ni Hakos ɔwa, lalolaa kakyɛ bamba, diayɔ ni di Eliasib leyo kayoko dialaase ni di kayɛntɛkɔ nini.

22 Olebatatɛ ba niakye ni nsɔ be niakaako ma ni lalolaa oyoyiɛ wɔ niakaako nwɔ nii. 23 Mma kamaa, Benyamin ku Hasub lalolaa oyoyiɛ nwu di leyo lɛma anu; ni di mma kamaa, Maaseia obisuɔtɔbi Asaria wɔ niale ni Anania ɔwa lalolaa oyoyiɛ nwu di leyo nɔɔ ɔlɔɔkɔ nɛ. 24 Nnwɔɔ kamaa, Henadad obisuɔtɔbi Binui lalolaa kakyɛ bamba, diayɔ ni di Asaria leyo dialaase ni di oyoyiɛ nwu lɛkɔ ku leyokɔ, 25 ni di Usai obisuɔtɔbi Palal labla ɔkpɛ aakyɔɔ anu oyoyiɛ nwu lɛkɔ ku leyo takale nwu niatuunii diakye ni lɛkayo nwu katoo diakaako ni asaa banyuntɛ kaflɔnkɔ. Nnwɔɔ kamaa, Paros obisuɔtɔbi Pedaia 26 ku olekatakɔ bakpɛmblatɛ ba niasiɛ ni di Ofel akpenkpe nwu lalolaa baalaadu lɛba le niakyɔɔ ni Ntu Kayoko anu diofe ni di kufĩ katunkɔ ku leyo takale tuuniile nwu.

27 Mma kamaa, Tekoa batii lalolaa kakyɛ bamba, diayɔ ni di leyo takale kplɛ tuuniile nwu dialaadu di Ofel oyoyiɛ.

28 Diayɔ ni di Pɔnkɔ Kayoko diesifi nii, olebatatɛ nialolaa oyoyiɛ nwu, obiala di leyo nɔɔ nimu anu. 29 Mma kamaa, Imer obisuɔtɔbi Sadok lalolaa oyoyiɛ wɔ niakyɔɔ ni leyo nɔɔ anu. Nnwɔɔ kamaa, Sekania obisuɔtɔbi Semaia wɔ niale ni kayoko nyuntɛ di Kufĩ Katunkɔ Kayoko lalolaa oyoyiɛ nwu. 30 Nnwɔɔ kamaa, Selemia obisuɔtɔbi Hanania ku Hanun wɔ niale ni Salaf obisuɔtɔbi kuɔnle, lalolaa kakyɛ bamba. Mma kamaa, Berekia obisuɔtɔbi Mesulam lalolaa oyoyiɛ wɔ niakyɔɔ ni ayo nɔɔ ya aasiɛ ni anu. 31 Nnwɔɔ kamaa, Malkiya, koto sɛɛle asaablatɛ onwii lɛma, lalolaa oyoyiɛ nwu dialaadu olekatakɔ bakpɛmblatɛ leyo ku asaa basunsũtɛ, diakyɔɔ ni Kanyunyu Kayoko anu, dialaadu leyo le di leyokɔ osi. 32 Di leyo le di leyokɔ ku Bafoso Kayoko obo yi, koto sɛɛle asaablatɛ ku asaa basunsũtɛ nialolaa oyoyiɛ nwu.