1 Di afosi-anyɔ dii naafa di kɔwɛntɛ nwu kamɛ yi, Israel batii lasi dikudi, baatoonii kanya, baatoonyukũ aboko baatookpete kudu di asi lɛma. 2 Mba niale ni Israel banantii lablasa suoto lɛma di bafɔɔ bamuu suoto. Baayila di aba lɛma, ni baadiki sikpile lɛma ku bate lɛma amumu baabuɛ nɛ. 3 Ni baayila di nfũ baawɛ nii, ni baaka di SAATE Yaa lɛma Kufiofa Kukũ kamɛ di abombo atiɛ di dii nwu, ni baayɔ abombo atiɛ bamba baatoodiki sikpile lɛma baatoobuɛ, ni baatoosumu SAATE Yaa lɛma nɛ. 4 Lewi batii ba niayila ni di nkatakɔ nwu suoto niale- Yesua, Bani, Kadmiel, Sebania, Buni, Serebia, Bani ku Kenani- mma nialɛɛ SAATE Yaa lɛma nwu ku sɛlɔ siene nɛ. 5 Ni di Lewi batii nwu- Yesua, Kadmiel, Bani, Hasabneia, Serebia, Hodia, Sebania ku Petahia- labuɛ alɛ: "Bitaka biyila biɛtansa SAATE Yaa lee, nnwɔ ninkpe ni diɛyɔ ni di nua diesifi ni dinaa ni kaloo."

"Lɛtɔtrɔ ninle dibu leyooto lɛfɔ nwu, batakatɛsa ni katoo dilenkee lɛtɔtrɔ ku katansa kamuu. 6 Lete lɛfɔ ninle SAATE nwu. Afɔ niabla osi, bia osi nwu niɛtaka katoo dilenke nii, ku awɛntrɛbi nsiɛkɔ ninya mmuu, kasɔ ku asaa ya amuu ninsi ni ninka, lekpo ku asaa ya amuu ninsi ni nini kaamɛ. Afɔ niɛta lɛsaa biala nkpa, ni di batii dikudi di osi nsumu fɔ nɛ.

7 "Afɔ ninle SAATE Yaa, nnwɔ niadiki ni Abram, faakpaa nwɔ faadieko ni di Ur di Kaldea, ni faatɔɔ leyooto falɛ Abraham nɛ. 8 Faanya otu nɔɔ falɛ kuale onukwale kuata fɔ, ni faabla kanya ninii ku nnwɔɔ falɛ fabayɔ Kanaan batii, Hiti batii, Amori batii, Perisi batii, Yebusi batii ku Girgasi batii kasɔ nwu fanta banantii nɔɔ nɛ. Fatɔɔbla di ntam lɛfɔ nwu kanya, diekye fate tinini.

9 "Faanya bawa loo dibuo di Egipte; faanu kaku owii lɛma di Lekpo Sɛɛle. 10 Faabla atuosaa ya niabla ni ɔkpɛ ku sɛkpɛ se niabla ni ɔkpɛ di Farao suoto, di banɔɔfotii nɔɔ bamuu ku kasɔ nɔɔ batii bamuu suoto, diekye faatofo suoto katoo ɔtakatɛsa asaa ya di Egipte batii labla ma nii. Faabla leyooto faata suoto lɛfɔ, dite diɛbadu ni miɛ dii le mmle. 11 Faasɛ lekpo nwu di anu lɛma, di mmle baafe ni ninni kamɛ di kasɔ kosole suoto, kafɔɔ faafuki batikankotɛ lɛma nwu faakpete di nkyofokɔ nwu, fɛle difuɔ di ntu kplɛ kamɛ. 12 Faaleko ma katũ ku lelokonkyɛ takale di anu nwaa, kakyɛ kafɔɔ ku ɔtɔ takale, alɛ kuata ma lɛkpa di osuku wɔ baakyɛ ni suoto.

13 "Faasoo faakye Sinai Kobokote faawa; faakakatɛ faakyeko osi faata ma. Faata ma sɛsaabla ku afiofa ya ninkaatɛ, eewo ni kafɔɔ, ku sisuku ku ablasaa ya ninlɛ nii. 14 Faata ma baatofo Lɛnyɛɛtɛyi klekle lɛfɔ nwu, ni faata ma ablasaa, sisuku ku afiofa diafe ni di kpɛmblatɛ lɛfɔ Mose suoto nɛ. 15 Di kɔka lɛma kamɛ yi, faata alesaa lakye osi aata ma, di otukɔnsɔ lɛma kamɛ yi, faata ntu ladie di difuɔnkpaa kamɛ diata ma; faatɔkɔ ma falɛ batɔɔkyɛ baalaayɔ kasɔ ka faatakatɛ ni kɔnɛɛ lɛfɔ katoo faaka ntam falɛ fabayɔ fanta ma nii.

16 "Kafɔɔ mma, bawa loo latakatɛ suoto katoo, baabla otokopĩ, ni batabla di afiofa lɛfɔ kanya nɛ. 17 Baasĩ atoko ɔkyɔɔ, batanyuma kafɔɔ sɛkpɛ se niabla ni ɔkpɛ faabla ni di kamɛ lɛma. Baabla otokopĩ, ni di ɔtaka oyila lɛma kamɛ baadiki kanyayilatɛ di mmle bapɛmankple mansifi ni sɛlanle lɛma kamɛ nɛ. Kafɔɔ Yaa wɔ nin-yɔ ankyɛ ni fale, fan-le ni sibualɛ, faanya ni nyaami kafɔɔ, ɔblɔ lɛfɔ nte buɛɛ di lɛbɔmbɔ lɛfɔ kafɔɔ mpɔ nii. Nioso fatadiɛ ma nnɛɛ, 18 bia di obe wɔ baabla ni lɛnankyuebi-suɔtɔ letembi baata ni suoto lɛma baabuɛ ni alɛ, ‘Nnya yaa lee, nnwɔ niakpaa ye aadieko ni di Egipte kasɔ,’ ee di obe wɔ baabla ni abusufɔɔsaa kpile nwu.

19 "Ta nyaami kplɛ lɛfɔ ɔnya oso fatadiɛ ma nnɛɛ di ɔfafuu nwu. Lelokonkyɛ takale nwu ditadiɛ ma ɔkpaa di osuku lɛma ku anu-nwaa, ee ɔtɔ takale nwu kudiɛ ɔkpa ku kakyɛ di osuku wɔ babakyɛ ni suoto. 20 Faata Ninwuna lɛfɔ biene latuo ma asaa. Fatadiki mana lɛfɔ di nnya lɛma kamɛ, ni faata ma ntu di otukɔnsɔ oklee lɛma kamɛ nɛ. 21 Alɛɛ afosi-ana amu faakle ma di ɔfafuu kamɛ; lɛsalɛsaa ditafĩ ma, akpeele lɛma ditabɛbɛɛ ee nkpaa lɛma difufu.

22 "Faata ma sɛka nlekɔ ku nnle, bia faayɔ aba ya niakyo ni nsɔ faata ma. Baafũ Hesbon ɔka Sihon kasɔ ku Basan ɔka Og kasɔ. 23 Faabla banantii lɛma lapɔ fɛle awɛntrɛbi di kolo, ni faakpaa ma faawako kasɔ ka faatɔkɔ ni bate lɛma falɛ babuo baalaayɔ ni nɛ. 24 Banantii lɛma lakyɛ baalaayɔ kasɔ nwu. Faatososa Kanaan batii ba niasiɛ ni di kasɔ nwu di anu lɛma. Faayɔ Kanaan batii nwu faakpee di nnɛɛ lɛma, manko baka lɛma ku kasɔ nwu batii, alɛ baabla ma mmle beenyu alɛ dilɛ dita ma nii. 25 Baafũ sekpoo kplɛ siene ku nsɔ biene lɛma; baafũ ayo ya niayii ni pɔ ku asaa nwaa ateate amuu, ntu abiɔ ya baatookutu bɛɛtɛ ni, awɔsɔ afe, nnɔnyi awoso afe ku awosobi awoso afe di lɛpɔ kamɛ. Baale baamiɛ baabla mɔnɔmɔnɔ nwaa; baanya suoto lɛyɔɔ osie kanya di dibiene kplɛ lɛfɔ nwu suoto.

26 "Kafɔɔ baabla otokopĩ, baataka baayila fɔ di suoto; baakyisa kufiofa lɛfɔ baatɛ di sɛmaa lɛma. Baalo ɔlaa babuɛtɛtɛ lɛfɔ ba nianyu alɛ bookplesa ma manwako ni ɔkyɛ lɛfɔ; baabla abusufɔɔsaa kpile nwu. 27 Nioso faayɔ ma faakpee di balo lɛma nnɛɛ, mba nianyinka ma nii. Kafɔɔ baatoonyinka ma nii, baawi baalɛɛ fɔ. Faanu ma sɛlɔ faakyeko osi, ni di nyaami ɔnya lɛfɔ kplɛ kamɛ faata ma badikitɛ ba niafũ ma baakyeko ni balo lɛma nnɛɛ nɛ.

28 "Kafɔɔ nfanwu baawɛ ɔwɛ ni ɔnyɛɛ ɔtɛ yi, baakple baabla akpilesaa di anu lɛfɔ. Ninfɛ faadiɛ ma nnɛɛ faata balo lɛma alɛ baale sɛka di suoto lɛma nɛ. Kafɔɔ baakple baawi baalɛɛ fɔ ni yi, faanu faakyeko osi, ni di nyaami lɛfɔ ɔnya kamɛ, faadiki ma di obe lele kamɛ nɛ.

29 "Faatɔkɔ ma falɛ bapɛbakple baale kufiofa lɛfɔ nwu, kafɔɔ baatakatɛsa suoto katoo, baasĩ sɛsaabla lɛfɔ. Baabla okpile di asaa otuo lɛfɔ nwu suoto, di otii kamasiɛ ni nkpa nse ɛɛkyɔɔ nya ni atoko. Baawɛ onunsie baakyisa mmaa lɛma baata fɔ, baabla otokopĩ, baasĩ kafɔɔ atoko ɔkyɔɔ. 30 Faawɛ otu faata ma di alɛɛ kpinwu kamɛ. Di Ninwuna lɛfɔ kamɛ fantɔkɔ ma ɔtanlolaa ɔbla lɛma diefe ni di ɔlaa babuɛtɛtɛ lɛfɔ suoto. Kafɔɔ batayɔ nwu ole, nioso faayɔ ma faakpee di nnle be nikaako ma ni nnɛɛ. 31 Kafɔɔ di nyaami lɛfɔ ɔnya kplɛ nwu oso fatalo ma ee fadiɛ ma nnɛɛ, diekye sibualɛ letɛ ku nyaami-nyatɛ Yaa fale.

32 "Nioso nunua, Oo Yaa loo, kplɛ, sientɛ ku Yaa yɛkɛle wɔ ninkle ni kanya ninii lɛbɔmbɔ nɔɔ nwu, tanta nimiina le mmle nimuu ninanfĩ ni lawa di anu lɛfɔ- nimiina le nintɔɔwa wo ni di suoto, di baka ku batunletɛ loo suoto, di olebatatɛ ku Yaa ɔlaa babuɛtɛtɛ loo suoto, di bate loo ku batii lɛfɔ bamuu suoto, diayɔ ni di Asiria baka obe kamɛ diɛbase ni di miɛ. 33 Di asaa ya amuu nintɔɔwa wo ni di suoto yi, faate tinini; faabla di onukwale ole kanya, di awo butalolaa buabla nii. 34 Baka loo, batunletɛ loo, olebatatɛ loo ku bate loo ditakyɛ di kufiofa lɛfɔ kanya; batayɔ nwu ole di sɛsaabla lɛfɔ suoto ee di ɔlaa osĩ wɔ faata ma nii. 35 Bia obe wɔ baawɛ ni di sɛka kale lɛma kamɛ, baatɔɔnya ni suoto lɛyɔɔ di dibiene kplɛ lɛfɔ le faata ma ni di kasɔ ka blɛfɛɛ ku kasɔ ka ninlɛ ni nwaa faata ma nii, batasumu fɔ ee bakyi di asaa kpile lɛma ɔbla sisuku suoto.

36 "Kafɔɔ nyu lo, awo balanle nfɛ bule miɛ, balanle di kasɔ ka faata ni bawa loo, di mmle baafuo ka ni awosobi ku asaa biene bamba ya kɔɔta ni ole. 37 Ta sikpile loo oso yi, asaa ya kpinwu manwɛ ni di kasɔ nwu nsifi baka ba fɛɛyɔ feese ni kaanya lo ɔkyɛ. Boole sɛka di suoto loo ku babɔkɛɛ loo suoto fɛ mmle dilɛ dita ma nii. Busi di nimiina kplɛ kamɛ.

38 "Di n-ya mmle amuu kamɛ yi, buɔbla kanya ninii kanwii, buakpee ka di kɔkpana kamɛ, di batunletɛ loo, Lewi batii loo ku olebatatɛ loo lase ni anɛɛfo lɛma ninkũ suoto."