1 Di obe owo sɛmaa basuɔtɔ ku basɔfɔ lɛma lafaa osie kanya baayila di babilɛma-suɔtɔbi Yuda batii suoto. 2 Bawo latoobuɛ alɛ, "Awo ku babisuɔtɔbi loo ku babisankobi loo mpɔ; dikpeni buɔwɛ alesaa, di mmle bubale munsiɛ ni nkpa."

3 Bawo latoobuɛ alɛ, "Buɔyɔ afe loo, awosobi loo afe ku ayo loo buose kamaa buofũ alesaa di kɔka obe kamɛ."

4 Babamba kafɔɔ lakple baatoobuɛ alɛ, "Ɔfɛnsa buɔfɛnsa ato buɔta ɔka akpooto di afe ku awosobi afe loo suoto. 5 Nu di suoto sina sinwii ku ntɔ nnwii bule fɛ okpoo loo batii yi, di babi loo kafɔɔ nlɛ fɛ balema, kafɔɔ buayɔ babisuɔtɔbi loo ku babisankobi loo buata sɛlanle ole. Batoole katũ bɛɛbla babisankobi loo bawo balanle kofokofoko, kafɔɔ awo bunaa ɔnyɛɛ kuonwii, diekye afe loo ku awosobi loo afe nle batii bamba ale."

6 Obe wɔ lanu ni lɛfaa ku sɛlaa lɛma nwu yi, ɔblɔ lafiɛ mi osie kanya. 7 Labu ma disi, ni layɔ ɔlaa di banɔɔfo-kplɛ ku banɔɔfotii nwu suoto nɛ. Ni latɔkɔ ma nlɛ, "Biotufu okpoo lee omu batii ato!" Nioso lalɛɛ batii nwu lasiisa dikudi lablako ɔlaa nwu ɔkpɛ 8 ni labuɛ nlɛ: "Fɛ mmle butookpee ni okyiini yi, butɔɔya babiloo Yuda batii ba baasunsũ baata ni batii ba ninanle ni Yuda batii buokplesa buɔwako. Nunua nfɛ biosunsũ babilee-suɔtɔbi, mankple mansunsũ ma manta wo!" Baalo kanana, diekye batawɛ ɔlaa kuonwii baabuɛ nii.

9 Nioso lakyɛ sitũ latɔkɔ ma nlɛ, "Lɛsaa le biɔbla ni diɛlɛ. Bilaakyɛ di Yaa loo lɛyɛkɛ kamɛ, alɛ bulɔbata osuku balo loo ba ninanle ni Yuda batii bama wo? 10 Ami ku babiloo-suɔtɔbi ku batii nii kafɔɔ kɔta batii koto ku atitabi manfɛnsa. Kafɔɔ bita ato otufu nwu kuse! 11 Bikplesa afe, awosobi afe, nnɔnyi awoso afe ku ayo lɛma bita ma wla, ku ato ya biotikasa minta ma bilɛ bata ni- ale ni dikyuu kɔlafa le di koto, atitabi, nta fɔle ku nnɔnyi suoto."

12 Ni di Batunletɛ nwu labuɛ alɛ, "Bubakplesa munta ma. Bulɔbasinkaalɛ kafɔɔ lɛsalɛsaa di ɔkyɛ lɛma bukyaakaa. Bubabla fɛ mmle feebuɛ nii."

Ninfɛ lalɛɛ olebatatɛ nwu, lata banɔɔfotii-kplɛ ku banɔɔfotii nwu laka ntam alɛ bababla di nle baabuɛ alɛ bababla ni suoto nɛ. 13 Ni latũkunsa kafɔɔ akpeele-wua nii nwu labuɛ nlɛ, "Yaa atũkunsa otii biala ninambla ni di ntam be mmle suoto adiki di leyo ku lɛsaawɛ nɔɔ kamɛ. Nkpo baatũkunsa otii nwu okle badiki aate ofukuti nɛ!"

Di nle mmle yi, batii nwu bamuu latuna alɛ, "Diwa kaanya," baatansa SAATE nwu kafɔɔ. Ni di batii nwu labla fɛ mmle baaka ni ntam kanya nɛ.

14 Kafɔɔ, diɛyɔ ni di Ɔka Artasasta alɛɛ afosi-anyɔ kamɛ, di obe wɔ baadiki mi alɛ nle ni abaa-ɔnɔɔfo lɛma di Yuda kasɔ suoto, diɛlaase ni di alɛɛ afosi-atiɛ lɛlɛɛ nyɔɔfa nɔɔ- di lefosi alɛɛ-anyɔ nintɔbafe nii yi- ami ee babiloo-suɔtɔbi kuonwii loo ditale alesaa ya manta ni abaa-ɔnɔɔfo. 15 Kafɔɔ abaa kanyabayilatɛ kasale- mba niawɛ ni fiɛ di ami lawa ni- latukasa batii nwu atoo nutũle ni baafũ koto fututu afosi-ana baakyakaa di alesaa ku nta baakyeko ɔkyɛ lɛma nɛ. Bakyakaakotɛ lɛma kafɔɔ lanyinka lanyika ni baatika di batii nwu suoto. Kafɔɔ ami dibu le layɔ lata ni Yaa oso ntabla nkpo. 16 Kafɔɔ yi, layɔ suoto nii lata di oyoyiɛ wɔ mmle ɔkpɛ ɔbla suoto. Bakpɛmblatɛ nii bamuu lasi ninfa baata ɔkpɛ nwu; butafũ ni kasɔ kukanwii. 17 Diɛkyakaa nii, Yuda batii ku banɔɔfotii kɔlafa afosi-anɔɔ ku mba kafɔɔ niawa ni ɔkyɛ loo baakye ni nnle be niɛmana wo diekyi ni lale alesaa di leyo nii nɛ. 18 Alesaa ya manwa mantɛɛ ni dii biala niale, nankyue-suɔtɔ onwii, bafoso ba ninsi ni lɛla nwaa bakuɔ ku bakɔɔkɔ bawo, nta kafɔɔ nta ateate kpinwu di ayi lefosi biala kamɛ. Di n-ya mmle amuu kamɛ yi, diidii ntakaalɛ alesaa ya manta ni abaa-ɔnɔɔfo, diekye asaa nwu ofũ lale atoo nutũle di batii ba mmle suoto.

19 Oo Yaa nii, nyuma mi ku sibualɛ, di asaa ya amuu ntɔbla lɛta ni batii ba mmle.