1 Di Yuda batii kɔwɛntɛ kuɛnsinle lawa nii, di Israel batii nfɛ nsi ni di sekpoo lɛma kamɛ yi, bamuu lasi fɛ otii onwii di Ntu Kayoko kaflɔnkɔ anu. Ni baatɔkɔ kũyetɛ Esra alɛ adieko Mose Kufiofa kukũ ko di SAATE nwu lakpana aata ni Israel awako nɛ.

2 Nioso oletatɛ Esra lawako kufiofa kukũ nwu di Yuda batii kɔwɛntɛ kuɛnsinle dii kasale suoto di kasiisakɔ nwu anu, baale ni basuɔtɔ ku basanko ku mba bamuu niafuo ni kasɔ onu. 3 Ni di Esra laka Kukũ nwu osie kanya diayɔ ni di olesɛ dialaase di kakũ, aayila aakyɔɔ ni anu Ntu Kayoko nwu di basuɔtɔ, basanko ku mba niafuo ni kasɔ onu anu nɛ. Ni di batii nwu bamuu lalolaa atoko bakyɔɔ baanu Kufiofa Kukũ nwu nɛ.

4 Kũyetɛ Esra nwu layila di sewoso akpa takale ya baabla baata ni dii nwu ole. Matitia, Sema, Anaia, Uria, Hilkia ku Maseia layila nwɔ di ɔletanɛɛkyɛ; Pedaia, Misael, Malkiya, Hasum, Hasbadana, Sakaria ku Mesulam kafɔɔ layila nwɔ di ɔmɛntukyɛ.

5 Esra latikiti kukũ nwu. Batii nwu bamuu lafuo nwɔ ɔtɔɔnya, diekye aayila aataka katoo aalenkee ma; aatootikiti kũ nii, batii nwu bamuu lataka baayila. 6 Ni di Esra latansa SAATE nwu, Yaa kplɛ nwu, ni di batii nwu bamuu latakatɛsa nnɛɛ lɛma baatuna alɛ, "Diwa kaanya! Diwa kaanya!" Ninfɛ baawakasɔ baakpee anu kaasɔ baasumu SAATE nwu nɛ.

7 Lewi batii nwu- Yesua, Bani, Serebia, Yamin, Akub, Sabetai, Hodia, Maseia, Kelita, Asaria, Yosabad, Hanan ku Pelaia- latoodiki Kufiofa nwu kasɔ baatɔɔta batii nwu di obe wɔ baayila ni ninfa nɛ. 8 Baaka baakyeko Yaa Kufiofa Kukũ nwu kamɛ, baakpasa kũ kamɛ, baatoodiki kũ kasɔ alɛ batii nwu kanu lɛsaa le bɔɔka ni kasɔ.

9 Ninfɛ di Nehemia abaa kanyayilatɛ, oletatɛ ku kũyetɛ Esra ku Lewi batii ba nintoodiki ni sɛlaa nwu kasɔ latɔkɔ bamuu lɛma alɛ, "Dii le mmle lɛbla klekle diɛta SAATE Yaa lee. Bitanwi sɛnyaami ee biawi kaku." Diekye batii nwu bamuu latoowi kaku di obe wɔ baatoonu ni kufiofa nwu sɛlaa.

10 Ni di Nehemia labuɛ alɛ, "Bitɔɔkyɛ biɛlaale alesaa ya ninsi lɛla, bienyi nta mɛnɛfɛle, biɛyɔ awo kafɔɔ bikyesee mba ninanwɛ lɛsalɛsaa bawa ni. Dii le mmle lɛbla klekle diɛta SAATE loo. Bitambuo sɛnyaami, diekye suoto lɛyɔɔ le niekye ni SAATE nwu nfũ ninle ye osie nɛ."

11 Lewi batii nwu lakpee batii nwu bamuu kɔnɛɛ kaafutu, baatoobuɛ alɛ, "Bilo, diekye nle mmle nle dii klekle. Bitambuo sɛnyaami."

12 Ninfɛ di batii nwu bamuu lakyɛ baasifi baalaale baanyi, baayɔ alesaa awo baakyɛnko mba dinaa ni alɛ baanya suoto lɛyɔɔ kplɛ nɛ. Diekye nfɛ baanu sɛlaa se baaka baata ma ni kasɔ.

13 Di kɔwɛntɛ nwu dii nyɔɔfa suoto yi, ayo nwu kamɛ banɔɔfo bamuu, diakyakaa ni di olebatatɛ ku Lewi batii, labamana kũyetɛ Esra nwu baakyi baakyɔɔ kufiofa nwu sɛlaa atoko nwaa. 14 Baanya alɛ bɛɛkpana di kufiofa nwu kamɛ, nko di SAATE nwu labuɛ aafenko ni di Mose suoto, alɛ Israel batii basiɛ ni di akpanta kamɛ di kɔwɛntɛ kuɛnsinle lɛma nwu dii nwu ole kamɛ, 15 baayie kafɔɔ ɔlaa wɔ mmle lɛkya baakyakasa nwu kafɔɔ bafenko di sekpoo lɛma ku Yerusalem kamɛ alɛ: "Bidie bikyɛ akpenkpe kale nwu biɛlaakplesa nnɔnyi awoso sɛla, lepoo kamɛ nnɔnyi awoso sɛla, kɔlɛɛfɔ sɛla, sɛkaafɛ ku oyududu awoso sɛla biwako biɛbapɛ akpanta"- fɛ mmle bɛɛkpana ni.

16 Nioso batii nwu ladie baakyɛ baalaawako sewosola nwu, ni baapɛ akpanta baata suoto lɛma di mma bamu ayo akyá osi, di nflɔnkɔ lɛma, di Yaa leyo kaflɔnkɔ, ku kaflɔnkɔ ka niate ni di Ntu Kayoko ku nka niate ni di Efraim Kayoko. 17 Batii ba bamuu niakye ni sɛlanle kamɛ baawa ni lapɛ akpanta baasiɛ nya kaamɛ. Diayɔ ni di Nun obisuɔtɔbi Yosua obe kamɛ dialase ni di dii nwu yi, Israel batii diile dii nwu fɛ nle mmle okle. Ni baanya suoto lɛyɔɔ kplɛ nɛ.

18 Dii biala, diɛyɔ ni di dii kasale diɛlaase ni di dii yɛntɛle yi, Esra nka sɛlaa ankyeko Yaa Kufiofa Kukũ nwu kamɛ. Ayi akuɛnsĩ baale dii nwu, ni di dii nɛnle, di ɔsaabla nwu kanya yi, baasi.