1 Obe wɔ di Sanbalat lanu alɛ buose ni oyoyiɛ nwu letofo yi, ɔblɔ lafiɛ nwɔ yakayaka osie kanya. Aatɛ Yuda batii kaasɔ, 2 di bakpɛntɛ wo nɔɔ ku Samaria bakpɛtɛ anu aabuɛ alɛ, "Obe lɛsaa di Yuda batii ba mmle di ɔnyɛɛ nnaa ni kɔbla nɛ? Babase oyoyiɛ lɛma nwu letofo? Babata seleɔta? Babaloo nwu otofo dii ninwii? Babafuo afuɔ nwu okplesa ɔwako nkpa kamɛ, di atɛnkudi ya beesiisa- beefiɛ nya ni fɛ mmle ate ni?"

3 Tobia, Amon otii nwu niawɛ ni di ɔlɔɔkɔ nɔɔ labuɛ alɛ, "Lɛsaa le bootofo nii-nse bia lepoo kamɛ ɔklá leyie nwu di suoto yi, ababiɛ afuɔ oyoyiɛ lɛma nwu antɛ kaasɔ!"

4 Oo Yaa loo, nu wo ɔlaa, diekye bɛɛtɛ wo kaasɔ. Munikĩisa atufa lɛma nwu fatika di mma bamu lɛma asintɛɛ. Yɔ ma fata fɛ kakpɛ kamɛ asaa di sɛlanle kasɔ suoto. 5 Tantitĩi lɛpɔɔ okpi lɛma ee fayɛɛsa sikpile lɛma fakyisa di anu lɛfɔ, diekye batookpete atufa di ayo batofotɛ lɛfɔ anu.

6 Nioso buase oyoyiɛ nwu letofo, di omuu lɛtaka ninwu ladu ni ɔfã, diekye batii nwu labla ɔkpɛ nwu ku otu lɛma omuu.

7 Kafɔɔ obe wɔ di Sanbalat, Tobia ku Arab batii, Amon batii ku Asdod batii lanu alɛ Yerusalem seyoyiɛ nwu ololaa ntɔɔkyɛ ni sitũ, ni nfɛ bootĩi ni sebo nwu kafɔɔ yi, ɔblɔ lafiɛ ma osie kanya. 8 Ni baasi baakũ kanwumbe alɛ bɔɔkyɛ manaakpɛko Yerusalem mankpee nwu kudu kafɔɔ nɛ. 9 Kafɔɔ buapɛ ɔlaa buata Yaa loo, ni buadiki banyuntɛ buase kakũ ku kakyɛ, alɛ buafuo difunaa le mmle odieko.

10 Kafɔɔ, batii ba di Yuda labuɛ alɛ, "Ɔnyɛɛ nfɛ koloo ɔkpɛ bablatɛ nwu, ayiɛkuu kpinwu kafɔɔ nte bulɔbafuo ni oyoyiɛ nwu ose letofo."

11 Diɛkyakaa ni kafɔɔ yi, balo loo labuɛ alɛ, "Fiɛ babatofo nii ee man-nya wo ni yi, nfɛ busi ma kaamɛ munlo ma mun-ta ɔkpɛ nwu ndiɛ ɔbla."

12 Ninfɛ di Yuda batii ba niasiɛ baakaako ma ni lawa baabatɔkɔ wo dialenkee lefosi alɛ, " Kakɔ lele biemunikĩi yi, babadieko wo."

13 Nioso ladiki batii bawo lase di oyoyiɛ wɔ niawakasɔ kualenkee ni sɛmaa, di aba ya niate ni temple, lase ma di ayo-ayo kanya, ku mpamii, akplɔ ku ataa lɛma. 14 Sɛmaa lanyu asaa lafenko nii, lataka layila ni latɔkɔ banɔɔfo-kplɛ, banɔɔfotii ku batii nwu bule nlɛ, "Bitan-yɛkɛ ma. Binyuma SAATE nwu, nnwɔ niemuɔ ni di lɛyɛkɛ nsi ni, biɛkpɛ bita basuɔtɔbi lee, babisuɔtɔbi lee ku babisankobi lee, basɔfɔ lee ku ayo lee."

15 Obe wɔ di balo loo lanu alɛ buye ni kanwumbe okũ lɛma nwu, di Yaa kafɔɔ ntɔɔkpɔtɔɔsa ka ni yi, bamuu loo buapɛ buakple buasifi oyoyiɛ nwu katofokɔ, obiala lasifi ɔkpɛ nɔɔ omu kamɛ.

16 Diayɔ ni di dii nwu nkpo diasifi nii, batii nii kakyɛ kanwii latɔɔbla ɔkpɛ nwu, ni baata kakyɛ bamba kafɔɔ laklee akplɔ, kubiafunsaa, kɔtaa ku akpɛsaa nɛ. Banɔɔfotii nwu layila Yuda batii nwu bamuu kamaa, 17 mba niatootofo ni oyoyiɛ nwu. Batii ba niatootuka ni leyo atofosaa labla ɔkpɛ lɛma ku kɔnɛɛ kunwii, baaklee kafɔɔ lɛkpɛsaa di kɔnɛɛ nyɔɔfa, 18 leyo-tofotɛ biala kafɔɔ lakpakũ kapamii di ɔfankyi nɔɔ di obe wɔ ɔɔbla ni ɔkpɛ. Kafɔɔ osuɔtɔ wɔ niatɔɔfɛ ni kakyukyue lawɛ di ɔkyɛ nii.

19 Ninfɛ labuɛ latɔkɔ banɔɔfo-kplɛ, banɔɔfotii ku batii bule nwu nlɛ, "Ɔkpɛ nwu mpɔ, kuɔblɛfɛ kafɔɔ, ni bɔɔblá baawo foo di oyoyiɛ nwu suoto nɛ. 20 Kakɔlele bienu kakyukyue nwu sɛlɔ, biɛbakyakaa di awo ninfa. Yaa loo kamakpɛ anta wo."

21 Nioso buakyɛ sitũ buatɔɔbla ɔkpɛ nwu ku batii kakyɛ ka niaklee ni akplɔ, nin-yɔ ni di kolesɛtũ lɛkpa kasale ninnaase di obe wɔ di awɛntrɛbi ndie nii. 22 Di obe nwu kamɛ kafɔɔ latɔkɔ batii nwu nlɛ, "Bita osuɔtɔ biala ku kyakaakotɛ nɔɔ asiɛ di Yerusalem kamɛ ku kakyɛ, di mmle biafuo ni banyuntɛ ole ku kakyɛ manle ni bakpɛntɛ kafɔɔ ku anu nwaa." 23 Ami ee basuɔtɔbi loo ee bakpɛmblatɛ nii ee banyuntɛ nwu di ɔkyɛ nii ditadiki akpeele loo di suoto; obiala laklee lɛkpɛsaa nɔɔ, bia nse ɛɛkyɛ ntu okusii.