1 Di obe wɔ di kanya ladu ni Sanbalat, Tobia, Gesem, Arab otii nwu ku balo loo nwu bule alɛ ntoose ni oyoyiɛ nwu letofo di obo kuonwii kafɔɔ ditabu kute ni ninnwu suoto- kuntɛ dialaadu ni di obe nwu kamɛ ninadikpee ni akloo di n-yoko nwu yi- 2 Sanbalat ku Gesem lakyesee mi kanya ka mmle alɛ: "Wa, fata bukyaka di sekponyii nwu onwii kamɛ di Ono kasɔ lakataa nwu."

Kafɔɔ baatookũ kanwumbe alɛ baabla mi dikpile. 3 Nioso lakpee ma batɔkyɛntɛ ku kanya didiki le mmle nlɛ: "Nkle ɔkpɛ kplɛ onwii kɔbla, nioso namafuo osoo ɔwa. Ɔkpɛ nwu dilɔbafuo oyila di obe wɔ kamadiɛ nwu nsoo nnwa ni ɔkyɛ lee." 4 Sɛna simu baakyesee mi kanya nwu kanwii nwu, obe biala kafɔɔ nta ma kanya didiki kanwii nwu.

5 Ninfɛ di lɛnɔnle yi, Sanbalat lakpee mi kyakaakotɛ nɔɔ ku kanya nwu kanwii nwu, aklee kafɔɔ kukũ ko manantĩi ni kanya di kɔnɛɛ nɔɔ, 6 baakpana kũ kaamɛ alɛ:

"Batoobuɛ di nnle nwu kamɛ- Gesem kafɔɔ lebuɛ alɛ kute nkpo- alɛ afɔ ku Yuda batii kokũ kanwumbe bilɛ bibakpee kudu, nioso biotofo oyoyiɛ nwu nɛ. Diɛkyakaa nii, di sɛlaa se mmle kanya yi, nfɛ fɔɔwa ma ɔka ɔbale 7 ni bia fatoodiki ɔlaa babuɛtɛtɛ falɛ bayie lɛkya di suoto lɛfɔ di Yerusalem: ‘Ɔka nkpe di Yuda!’ Nunua yi, ɔlaa wɔ mmle kamapɛ kunkple kunaadu ɔka; nioso wa, faata wo bukpee asi baawo."

8 Ni lakyesee nwɔ kanya didiki le mmle nlɛ: "Lɛsalɛsaa fɛle ɔlaa wɔ foobuɛ ni diete nkpo; disi lɛfɔ kamɛ ko foowola nwu fandiki."

9 Bamuu lɛma latookpee kɔnyaabe alɛ bɔɔyɛkɛsa wo, boonyu alɛ, "Nnɛɛ lɛma kamawakasɔ di ɔkpɛ nwu suoto, ninta alɛ ɔkpɛ nwu dilɔbaloo."

Kafɔɔ lapɛ ɔlaa nlɛ, "Nunua Yaa kpee nnɛɛ nii osie."

10 Dii ninwii lakyɛ Delaia obisuɔtɔbi Semaia, aale ni Mehetabel ɔwa leyo, nnwɔ baasɛɛ baakpee ni di nnwɔɔ omu nɔɔ leyo. Ni aabuɛ alɛ, "Ta bukyaka di Yaa leyo kamɛ, di olekatakɔ nwu kamɛ, faata busɛɛ olekatakɔ nwu n-yoko, diekye batii kɔwa fɔ ɔbalo- ku kakyɛ bɔɔwa fɔ ɔbalo."

11 Kafɔɔ labuɛ nlɛ, "Osuɔtɔ fɛ ami okle katoso nsifi? Ee otii fɛ ami okle kabuo di olekatakɔ alɛ ɔɔlaafũ nkpa nɔɔ? Namakyɛ!" 12 Latofo nlɛ Yaa ditakpee nwɔ kɔtɔ, kafɔɔ aabuɛ ɔlaa aatɛ di suoto nii ta Tobia ku Sanbalat niatɔɔ koto alɛ abla ni nkpo. 13 Baatɔɔ koto alɛ akpee mi lɛyɛkɛ di mmle kabla ni okpile di nle mmle ɔbla kamɛ, mantɛɛ leyooto kpile mankpɔnɔfɔsa mi.

14 Oo Yaa nii, nyuma Tobia ku Sanbalat, ta lɛsaa le batɔɔbla ni oso; nyuma kafɔɔ Yaa ɔlaa buɛtɛtɛ-sanko Noadia ku Yaa ɔlaa babuɛtɛtɛ ba ninkomiɛ alɛ bakpee mi ni difu.

15 Nioso oyoyiɛ nwu otofo laloo di Yuda batii kɔwɛntɛ ko manlɛɛ ni Elul, afosi-anyɔ dii nɔɔnle suoto, di ayi afosi-anɔɔ ayi anyɔ kamɛ. 16 Di balo loo bamuu lanu ni nle mmle yi, nnle be mmuu niɛmana wo diekyi ni layɛkɛ, nnɛɛ lafee ma, diekye baanya alɛ ku Yaa loo lɛkyakaako baabla ɔkpɛ wɔ mmle.

17 Diɛkyakaa nii, di obe nwu kamɛ yi, Yuda banɔɔfotii-kplɛ nwu latookyesee Tobia akũ kpinwu, kanya didiki kafɔɔ latookye Tobia ɔkyɛ kaatɔɔta ma. 18 Diekye batii kpinwu niawɛ ni di Yuda lasiɛ nwɔ di ntam kalɔ, ta ɔlɔ̀ nɔɔ niale ni Ara obisuɔtɔbi Sekania, di obisuɔtɔbi nɔɔ Yohanan kafɔɔ layɔ ni Berekia obisankobi Mesulam oso. 19 Diɛkyakaa ni yi, baatɔɔtɛɛ letofo di sɛsabla nɔɔ biene suoto, baatɔɔtɔkɔ nwɔ sɛlaa se nimbuɛ ni kafɔɔ. Ni di Tobia lakpana akũ aakyesee alɛ okpee mi lɛyɛkɛ nɛ.