Êxodo 18

1 ಕ್ಹುದಾ ಮೊಶೆನೆ ತಿನಾ ಮನಕ್ಹೊ ಥಯಲ ಇಸ್ರಾಯೆಲೊನೆ ಮಹಾ ಉಪಕಾರೊನೆ ಕರಲ, ಯಹೊವಾ ಇಸ್ರಾಯೆಲೊನೆ ಐಗುಪ್ತ ದೆಶತಾ ಬಲೈಲಿನ ಆಯಲ, ವಿದ್ಯಾನ್ಯರ ಆಚಾರನೂ ಮೊಶೆನೊ ಮಾಮೊ ಥಯಲ ಇತ್ರೊವನ ಪುಚ್ಚ್ಯೊ. 2 ತೆಳಾಮಾ ಮೊಶೆನೆ ಮಾಮೊ ಥಯಲ ಇತ್ರೊವಕನ ದಿನ ವಳಾಯಲ ಮೊಶೆನಿ ಬೈಕೊ ಥಯಲ ಚಿಪ್ಪೊರಳನೆ, ತಿನಾ ಬೆ ಗಂಡ ಬಚ್ಚಾ಼ವೊನೆ ಬಲೈಲಿನ ಆಯೊ. 3 ತೆ ಬಚ್ಚಾವೊಮಾ ಯಕ್ಲಾನೆ "ಗೆರ್ಷೊಮ" ಕೈನ ನಾಮ ಮ್ಹೆಲ್ಯೊ. ಕಾ ಕದ್ಯಾಮ ಮೊಶೆ, " ಮಿ ಅನ್ಯ ದೆಶಮಾ ಪ್ರವಾಸಿ ಥಯೊಸ" ಕೈನ ಕದ್ಯೊ. 4 ತಿನಾ ಬಿಜಕ್ಲಾ ದಿಕ್ರಾನೆ ಮೊಶೆಬಿ, " ಮಾರೊ ಬಾನೊ ಕ್ಹುದಾ ಮನೆ ಸಹಾಯ ಥಯಲಕ್ಹು ಮನೆ ಫರೊಹನನಾ ತಲ್ವಾರನೆ ತಪ್ಪಸಿನ ವಚಾ಼ಡ್ಯೊ" ಅಮ್ಮ ಕೈನ, ತೆ ದಿಕ್ರಾನೆ " ಎಲೀಯೆಜರ್" ಕೈನ ನಾಮ ಮ್ಹೆಲ್ಯಾ. 5 ಮೊಶೆನೊ ಮಾಮೊ ಥಯಲ ಇತ್ರೊವನ ಮೊಶೆನಾ ಬಚ್ಚಾ಼ವೊನೆ, ವರಿ ತಿನಿ ಬೈಕೊನೆ ಬಲೈಲಿನ ಉಸಕನಿ ಜಿಮಿನಮಾ ಕ್ಹುದಾನಾ ಡೊಂಗರನಾ ಬಾಜು಼ ಉತ್ರಲ ಮೊಶೆಕನ ಆಯೊ. 6 ತೆ ಮೊಶೆನೆ, ತಾರೊ ಮಾಮೊ ಥಯಲ ಇತ್ರೊವ ಥಯಲ ಮಿ ತಾರಿ ಬೈಕೊನೆ, ತಾರಾ ಬೆ ಬಚ್ಚಾ಼ವೊನೆ ಬಲೈಲಿನ ತುಕನ ಆಯೊಸ" ಅಮ್ಮ ಕೈನ ಮೊಕಲ್ಯೊ. 7 ಮೊಶೆ ತಿನೊ ಮಾಮೊ ಥಯಲ ಕ್ಹಾಮೊ ಆವಾನೆ ಗೈನ ತಿನೆ ಔಳಿಲಿನ ಮಟ್ಟಿ ದಿದ್ಯೊ. ತ್ಯುನೆ ಪರಸ್ಪರ ಯೊಗ ಕ್ಷೆಮನೆ ವಿಚಾರ ಕರಲ್ಪರ ಗುಡಾರನಾ ಮ್ಹೈ ಗಯಾ. 8 ತೆ ಥಯಲ್ಪರ ಮೊಶೆ ಯಹೊವಾ ಇಸ್ರಾಯಲನಾ ಪರವಾಗಿ ಫರೊಹನನೆ, ಐಗುಪ್ತೊನೆ ಕರಲಕ್ಹಾರು, ವಾಟಮಾ ತುಮೊನೆ ಉಂಟ ಥಯಲ ಕ್ಹಾರಾ ಕಷ್ಟೊನೆ, ಯಹೊವಾ ತೆ ಕಷ್ಟೊಕ್ಹು ತಪ್ಪಸಲ ತಿನಾ ಮಾಮಾನೆ ಕದ್ಯೊ. 9 ಯಹೊವಾ ಐಗುಪ್ತೊನಾ ಹತೊಕ್ಹು ಇಸ್ರಾಯೆಲೊನೆ ಛೊಡೈನ ತ್ಯುನೊನೆ ಉಪಕಾರ ಕರಲಕ್ಹು ಇತ್ರೊವನ ಕುಷಿ ಥಯೊ. 10 ಇತ್ರೊವನ, "ಐಗುಪ್ತನಾ ಹತೊಮಾತೊ, ಫರೊಹನನಾ ಹತ್ತಕ್ಹುಬಿ ತುಮೊನೆ ಛೊಡಾಲಕ್ಹು ಯಹೊವಾನೆ ಸ್ತೊತ್ರಾ! ಇಸ್ರಾಯೆಲೊನೆ ಗುಲಾಮಗಿರಿಮಾತೊ ವಚಾ಼ಡಲ ಯಹೊವಾನೆ ಸ್ತೊತ್ರ! 11 ಯಹೊವಾ ತಿನಾ ಮನಕ್ಹೊನೆ ತ್ಯುನಾ ಹತೊಕ್ಹು ಛೊಡೈನ, ತೆ ಐಗುಪ್ತೊ ಕಯಾ ವಿಷಯಮಾ ಗರ್ವಪಡ್ದಾಸತೊ ತೆ ವಿಷಯಮಾ ತ್ಯುನೊನೆ ಬಗ್ಗಾಯಲಕ್ಹು ಯಹೊವಾ ಕ್ಹಾರಾ ಕ್ಹುದಾವೊತಿ ಮ್ಹೊಟೊ ವೈಕೈನ ಹಮ್ನಾ ತಿಳದಿಲಿದ್ಯೊಸ ಕೈನ ಕದ್ಯೊ. 12 ತೆ ನೈಸೊ ಮೊಶೆನೊ ಮಾಮೊ ಥಯಲ ಇತ್ರೊವನ ಕ್ಹುದಾನೆ ಸರ್ವಾಂಗ ಹೊಮ ಯಜ್ಞೊನೆ ಸಮರ್ಪಸ್ಯೊ. ಆರೊನ, ಇಸ್ರಾಯಲನಾ ಮ್ಹೊಟಾವೊನೆ ತಿನಾ ಕ್ಹಾತೆ ಕ್ಹುದಾನಾ ಸನ್ನಿದಿಮಾ ಬೊಜನ ಕಾರಾನಾ ಹುತಿ ಆಯಾ.

ನ್ಯಾಯಪತಿನೆ ನೆಮ್ಸಲ

13 ಅಗಲ್ಯಾ ದಿನ್ನೆ ಮೊಶೆ ಮನಕ್ಹೊನೆ ನ್ಯಾಯಾ ಕರಾನಾಹುತಿ ಬೈಟಲ ಪಾಟತಾ ಕ್ಹಾಂಜ಼ಲಕ್ಕಾ ಮನಕ್ಹೊ ತಿನಾ ಬಾಜು಼ಮಾಜ ಹುಬ್ರಯಾತಾ. 14 ಮೊಶೆ ಮನಕ್ಹೊನಾಹುತಿ ಕರಲ ಕ್ಹಾರು ಮಾಮೊ ದಿಕಿನ ತಿನೆ, " ತು ಶ್ಯಾನೆ ಮನಕ್ಹೊನಾಹುತಿ ಅಕ್ಲೊ ಪ್ರಯಾಸ ಕರಾಡೊಸತೊ? ಪಾಟತೊ ರಾತಲಕ್ಕಾ ನ್ಹ್ಯಾಜ ಹುಬ್ರೈನ ತು ಯಕ್ಲೊ ನ್ಯಾಯಾ ಕರಾನೆ ಬೈಟಲ ಕಾವೈ? ಕೈನ ಪುಚ್ಚ್ಯೊ. 15 ಮೊಶೆ ತಿನಾ ಮಾಮಾನೆ, "ಎ ಮನಕ್ಹೊ ಕ್ಹುದಾನು ನ್ಯಾಯ ಐಕಾನಾಹುತಿ ಮಕನ ಆವಸ, 16 ತಿಮ್ಮಜ಼ ತ್ಯುನಾಮಾ ಲಡೈ ಸು ಥೈತಬಿ ಮಕನ ಆವಸ. ಮಿ ವಿಚಾರ ಕರಿನ ತ್ಯುನೊನೆ ನ್ಯಾಯಾ ಕರಿನ ಕ್ಹುದಾನಾ ಆಜ್ಞಾ ವಿದಿಯೊನೆ ಸಾರುಸ" ಕೈನ ಕದ್ಯೊ. 17 ತೆ ಐಕಿನ ಮೊಶೆನೊ ಮಾಮೊ ತಿನೆ, " ತು ಕರಾನು ಆ ಕಾರ್ಯ ವಿದಾನ ಚೊಕೊ ನವೈ. 18 ಆ ಕಾಮ ಘನ್ನು ಕಷ್ಟ ರ‍್ಹಯಲ ವ್ಹೈ. ತಾರಾ ಯಕ್ಲಾಕ್ಹು ತಿನೆ ನೈ ಚಲಾವಾನೆ ಥಾತು. ತು ತಾರಾ ಕ್ಹಾತೆ ರ‍್ಹವಾನಾ ಆ ಮನಕ್ಹೊ ಕ್ಹರಿಮಾಜ ತ್ರಾಸನೆ ಮ್ಹೈ ಥಾವೊಶಿ. 19 ಆ ವಾತನೆ ಐಕ. ಮಿ ತುಮೊನೆ ಯಕ್ಕ ಆಲೊಚನೆ ಕೌಸ ವರಿ ಕ್ಹುದಾ ತಾರಾ ಕ್ಹಾತೆ ರ‍್ಹವಾದೆ ತು ಮನಕ್ಹೊನೆ, ಕ್ಹುದಾನೆ ವಚ್ಮಾ ರ‍್ಹಯಲ ಮನಕ್ಹೊನಾ ಲಡೈವೊನೆ ಕ್ಹುದಾಕನ ಲೌ. 20 ತು ಕ್ಹುದಾನಾ ಆಜ್ಞಾ ವಿದಿಯೊನೆ ಸಾರಿನ, ತ್ಯುನೆ ಚಾಲಾನಿ ವಾಟನೆ, ಕರಾನಾಹುತಿ ಕಾಮೊನೆ ತ್ಯುನೊನೆ ತಿಳಸು. 21 ತೆನೈಸೊ ತು ಮನಕ್ಹೊಮಾ ಸಮರ್ಥರೊ, ಭಕ್ತೊ, ನಂಬಿಗಸ್ತೊ, ಲಂಚಮಟನಾ ಥಯಲ ದಾಣ್ಗಾವೊನೆ ಇನಿಲಿನ ತ್ಯುನೊನೆ ಹಜಾ಼ರ ಮನಕ್ಹೊನಾ ಉಪ್ಪರಬಿ, ಕ್ಹೊ ಮನಕ್ಹೊನಾ ಉಪ್ಪರಬಿ, ಐವತ್ತ ಮನಕ್ಹೊನಾ ಉಪ್ಪರಬಿ, ದಕ್ಹ ಮನಕ್ಹೊನಾ ಉಪ್ಪರಬಿ ಅದಿಕಾರಿಯೊ ಕೈನ ನೆಮಸು. 22 ತ್ಯುನೆಜ಼ ಕೆಳಮಾಬಿ ಮನಕ್ಹೊನೆ ನ್ಯಾಯಾ ತಿರಸಾದೆ. ತ್ಯುನೆ ಮ್ಹೊಟಾ ಲಡೈಯೊನೆ ತುಕನ ಲಾವಾದೆ. ನ್ಹಾನಾ ಲಡೈಯೊನೆ ತ್ಯನೆಜ ಛೊಡಾವದೆ. ತ್ಯುನೆ ತಾರಾ ಕ್ಹಾತೆ ಆ ವಜನ ಉಚಾವಕ್ಹು ತ್ಯುನೆ ಹಲಕು ಥಾವಸ. 23 ಕ್ಹುದಾ ತುನೆ ಅಮ್ಮ ಕರಾನಾಹುತಿ ಅಪ್ಪಣೆ ದಿದ್ಯಾಮ, ತು ಆ ಕಾಮನಾ ಹೊರೆನೆ ನಿರ್ವಸಾನೆ ಸಾದ್ಯ ಥಾವಸ. ಆ ನೈಸೊ ಆ ಮನಕ್ಹೊ ಕ್ಹಾರಾ ಸಂತುಷ್ಟ ಥೈನ ತ್ಯುನಾ ತ್ಯುನಾ ಘರೊಯೆ ಜಾ಼ವಸ" ಕೈನ ಕದ್ಯೊ.

24 ಮೊಶೆ ತಿನಾ ಮಾಮಾನಾ ವಾತೆ ಒಪ್ಪಿಲಿನ ತೆ ಕದಲ ನಂಗತ ಕ್ಹಾರುಜ಼ ಕರ‍್ಯೊ. 25 ಮೊಶೆ ಇಸ್ರಾಯೆಲೊಮಾ ಸಮರ್ಥವಾಲವೊನೆ ಇನಿಲಿನ ಹಜಾ಼ರ ಮನಕ್ಹೊನಾ ಉಪ್ಪರಬಿ, ಕ್ಹೊ ಮನಕ್ಹೊನಾ ಉಪ್ಪರಬಿ, ಐವತ್ತ ಮನಕ್ಹೊನಾ ಉಪ್ಪರಬಿ, ದಕ್ಹ ಮನಕ್ಹೊನಾ ಉಪ್ಪರಬಿ, ಅದಿಕಾರಿಯೊನೆ ನೆಮಸ್ಯೊ. 26 ಔನೆ ಕೆಳಾಮಾಬಿ ಮನಕ್ಹೊನೆ ನ್ಯಾಯಾ ತಿರಸಾಲಾ ಥೈನ ಮ್ಹೊಟಾ ಲಡೈಯವೊನೆ ಮೊಶೆಕನ ಲಾತಾ, ನ್ಹಾನಾ ಲಡೈವೊನೆಬಿ ತ್ಯುನೆಜ಼ ತಿರಸತಾ ಆಯಾ. 27 ತೆ ಥಯಲ್ಪರ ಮೊಶೆ ತಿನಾ ಮಾಮಾನೆ ಅಪ್ಪಣೆ ದೆತಾಮಾ, ತೆ ತಿನಾ ಸ್ವಂತ ಗಾಮೆ ಫರಿನ ಗಯೊ.