1 ಯಹೊವಾ ಮೊಶೆನೆ, " ತು, ಆರೊನ, ನಾದಾಬ್, ಅಬಿಹು ವರಿ ಮ್ಹೊಟಾವೊಮಾ ಸತ್ತರ ಜ಼ನಾ ಮನಕ್ಹೊ ಆ ಡೊಂಗರ ಚಡಿನ ಯಹೊವಾಕನ ಐನ ದುರ ಹುಬ್ರೈನ ಅಡ್ಡ ಪಡಿನ ಆರಾಧನಾ ಕರು. 2 ಮೊಶೆ ಯಕ್ಲೊಜ ಯಹೊವಾಕನ ಔ ನೈತೊ ಬಿಜೊ಼ ಕುನಬಿ ನಜಿಕ ಔ ನೈ.ಉಗ್ರಲ ಮನಕ್ಹೊ ಡೊಂಗರ ಚಡುಜ ನೈ" ಕೈನ ಕದ್ಯೊ. 3 ಮೊಶೆ ಮನಕ್ಹೊಕನ ಐನ ಯಹೊವಾನಾ ಕ್ಹಾರಾ ವಾತೊನೆ ವರಿ ಆಜ್ಞಾವಿದಿಯೊನೆ ತಿಳಸಾನೆ ಮನಕ್ಹೊ ಕ್ಹಾರಾ, "ಯಹೊವಾನಾ ವಾತೊನೆ ಕ್ಹಾರಾ ಅನುಸರಸಿನ ಚಾಲಿಯೆಸ" ಕೈನ ಒಕ್ಕೊರಿಕ್ಹು ಉತ್ತರ ದಿದ್ಯೊ. 4 ಮೊಶೆ ಯಹೊವಾನಾ ಆಜ್ಞಾವೊನೆ ಲಿಕ್ಕಿನ ಪಾಟೆ ಉಟಿನ ತೆ ಡಪಮಗರನಾ ಹೆಟಾ ಯಜ್ಞವೆದಿ ಬಾಧಿನ ಇಸ್ರಾಯೆಲೊನಾ ಬಾರಾ ಕುಲೊನೆ ಬಾರಾ ದಗ್ಡಾನಾ ಕ್ಹಂಬಾ ಭಂದೈನ ಇಸ್ರಾಯೆಲೊನಾ ಜಾಂಜಿಮಾನೊನೆ.

5 ತುಮೆ ಯಹೊವಾನಾಹುತಿ ಸರ್ವಾಂಗ ಬಹೊಮ ಕರಿನ ಸಮಾದನನಾ ಯಜ್ಞನಾಹುತಿ ಬೈಲೊನೆ ಬಲಿ ದ್ಯೂ ಕೈನ ಅಪ್ಪಣ್ಣೆ ದಿದ್ಯೊ.

6 ಪಾಚಾತೊ ಮೊಶೆ ತೆ ರಗತಮಾ ಅರ್ದು ಕಾಡಿಲಿನ ಕುಂಡಾವೊಮಾ ಭರಿನ ಅರ್ದು ಯಜ್ಞವೆದಿಪರ ಮ್ಹೆಲ್ಯೊ. ವರಿ ತೆ ರಗತ ತಿಪರ ಚಿಪಡ್ಯೊ. 7 ತೆ ತಯಲ್ಪರ ನಿಬಂದ ಗ್ರಂಥನೆ ಕಾಡಿಲಿನ ಮನಕ್ಹೊನೆ ಐಕು ಆವಾ ವರಕ್ಹು ಓದ್ಯೊ.ತೆ ಐಕಿನ ಯಹೊವಾನಾ ಆಜ್ಞಾನಾ ಕ್ಹಾರಾ ಹಮೆ ಪಾಲ್ಸಿನ ವಿದೆಯೆ ಥಯೆಸ ಕದ್ಯಾ. 8 ತೆಳಾಮಾ ಮೊಶೆ ತೆ ರಗತ ಕಾಡಿಲಿನ ಮನಕ್ಹೊನಾ ಉಪ್ಪರ ಚುಪಡಿನ ಹಮ್ನಾ ತೆ ಗ್ರಂಥಮಾ ಕದಲ ಕ್ಹಾರು ಆಜ್ಞಾನಾ ಪ್ರಕಾರ ಯಹೊವಾ ತುಮಾರಾ ಕ್ಹಾತೆ ಕರಲಿದಲ ಒಡಂಬಡಿಕೆನೆ ಗಟ್ಟ ಕರಾನು ರಗತ ಆಜ ವ್ಹೈ. 9 ಮೊಶೆ ಆರೊನ್ ನಾದಾಬ್ ಅಬಿಹು ಕವಾನಾ ಇಸ್ರಾಯಲನಾ ಮ್ಹೊಟಾವೊಮಾ ಸತ್ತರ ಜ಼ನಾ ಮನಕ್ಹೊ ಡೊಂಗರನೆ ಚಡ್ಯಾ; 10 ತ್ಯುನೊನೆ ಇಸ್ರಾಯೆಲೊನಾ ಕ್ಹುದಾನೆ ದೆಕ್ಯಾ.ಇಂದ್ರ ನಿಲಮಣಿನಾ ಜಿಮಿನಾ ತಿನಾ ಪಾದಪಿಟ ಥಯುತು. 11 ತೆ ಇಸ್ರಾಯಲನಾ ತೆ ಮುಕಂಡೊನೆ ಕಯುಜ಼ ಕೆಟ್ಟ ಕರ್ಯೊ ನೈ; ತ್ಯುನೆ ಕ್ಹುದಾನೆ ದೆಕಿನ ಕ್ಹಾವಾ ಪಿವಾನು ಲಿದ್ಯಾ.

12 ಯಹೊವಾ ಮೊಶೆನೆ ತು ಡೊಂಗರ ಚಡಿನ ಐನ ಮಾರಾ ಬಾಜು಼ಮಾಜ ರ‍್ಹೆ; ತು ತೆ ಧರ್ಮೊನಾ ಶಾಸ್ತ್ರೊನೆ ಆಜ್ಞಾವೊನೆ ಮನಕ್ಹೊನೆ ಕೌ ಕೈನ ಮಿ ತೆ ತಿನೆ ಬರದಲ ಶಿಲಾಶಾಸನೊನೆ ತುನೆ ದ್ಯುಸ ಕೈನ ಕದ್ಯೊ. 13 ಮೊಶೆ ತಿನೊ ಶಿಶ್ಯೊ ಥಯಲ ಯೆಹುಶುವಾನಾ ಕ್ಹಾತೆ ಉಟಿನ ಕ್ಹುದಾನಾ ಡೊಂಗರನಾ ಉಪ್ಪರ ಗಯೊ. 14 ಅನೆ ಪೈಲಾ ತೆ ಮ್ಹೊಟಾವೊನೆ "ಮಿ ಫರಿನ ತುಮೊಕನ ಆಯೆಲಕ್ಕಾ ತುಮೆ ಯ್ಹಾಜ ಕಾಯ್ದೊ. ಆರೊನ ವರಿ ಹುರನ ತುಮೊಕನ ರ‍್ಹವಸ. ಕಿನೆಬಿ ವ್ಯಾಜ್ಜನಾ ಪಕ್ಷನೆ ತ್ಯುನಾ ಕ್ಹಾಮಾ ಜಾ಼ವಾದೆ ಕೈನ ಕದ್ಯೊ. 15 ಮೊಶೆ ಡೊಂಗರ ಚಡ್ಯೊ. ವರಿ ಹಬಾಳನೂ ಮ್ಹಾಡ ಡೊಂಗರನೆ ಝಾಕಿಲಿದ್ಯುತು. 16 ಯಹೊವಾನು ಉಜಾಳು ಸಿನಾಯ ಡೊಂಗರನಾ ಉಪ್ಪರ ವ್ಹತ್ತು ವರಿ ತೆ ಹಬಾಳನೂ ಮ್ಹಾಡ ಛೆ ದಿನ್ನ ಲಕ್ಕಾ ಡೊಂಗರನೆ ಝಾಕಿಲಿದ್ಯುತು. ಕ್ಹಾತವಾ ದಿನ್ನಮಾ ಯಹೊವಾ ಹಬಾಳನಾ ಮ್ಹಾಡಮಾತೊ ಮೊಶೆನೆ ವದ್ರಿನ ಬಲಾಯೊ. 17 ಯಹೊವಾನೂ ಉಜಾಳು ಡೊಂಗರನಾ ತುದಿಮಾ ಲಾಗಾನಿ ಆಗ ನಿಂಗತ ಇಸ್ರಾಯೆಲೊನೆ ದಿಕ್ಹ್ಯು. 18 ಮೊಶೆ ತೆ ಹಬಾಳನಾ ಮ್ಹಾಡಮಾ ಗೈನ ಡೊಂಗರ ಚಡ್ಯೊ. ತೆ ತೆ ಡೊಂಗರಪರ ಚಾಳಕ್ಹ ದಿನ ದಿನ್ನ ರಾತ ತೆ ಡೊಂಗರಪರಜ ವ್ಹತ್ತೊ.