Atos 16

16 Mbá mbiꞌi rí nakuáxo̱ꞌ gútha̱n-jáñíí Ana̱ꞌlóꞌ, a̱ꞌkhue̱n ni̱ga̱ti̱ya̱a̱ꞌ mbáa dxáꞌgú inaxo̱ꞌ, tsí gíꞌdaa mbáa gíñá ꞌguéen tsí naꞌne rí mba̱ꞌyoo̱ dí ñajuun rí ma̱ri̱gá. Maphú mba̱a̱ mbúkha̱a̱ naꞌnii̱ rí mudaa ña̱ꞌñii̱, ga̱jma̱á numuu rí ndaꞌyoo̱ dí ñajuun rí ma̱ri̱gá. 17 Ikhaa dxáꞌgú tsúꞌkhue̱n na̱ka̱ tsu̱da̱ꞌxo̱ꞌ gajmiáxo̱ꞌ Páblo̱, jamí nandxaꞌwée̱ xáꞌnii: «Xa̱bo̱ tsíge̱ꞌ ñajúún yumbée Ana̱ꞌlóꞌ Mikhuíí, jamí nuthanlaꞌ xáne ma̱goo ma̱jríñáaꞌlaꞌ».

18 Jamí phú mbaꞌa mbiꞌi naꞌne dxáꞌgú rúꞌkhue̱n, asndo rí ni̱ga̱nú mbiꞌi rí nijiꞌnáa Páblo̱ iꞌnii̱. A̱ꞌkhue̱n nitangayii Páblo̱ niꞌthúun gíñá ꞌguéen tsúꞌkhue̱n: «Na̱xna̱-ñájwaanꞌ ga̱jma̱á ski̱yu̱u̱ꞌ mbiꞌyuu Jesukrísto̱ rí ma̱ta̱tsi̱ꞌñáá dxáꞌgú tsúꞌkhue̱n». Jamí núkho̱ máꞌ nigájna̱a gíñá ꞌguéen ná xuyuu dxáꞌgú.

19 Ído̱ ndiyáá ña̱ꞌñii̱ rí nánguá xó mudaa̱ mbúkha̱a̱ ga̱jma̱á numuu dxáꞌgú, a̱ꞌkhue̱n ni̱rtuwii̱n Páblo̱ ga̱jma̱á Síla̱s, jamí nigóo̱ judii̱n ná inúú xa̱bo̱ ñajun, ná rixo̱o̱ xuajen. 20 Jamí ído̱ ni̱xna̱xíi̱n ná inúú xa̱bo̱ tsí nu̱xu̱da̱a̱ꞌ awan, a̱ꞌkhue̱n nithee̱n: «Tsíge̱ꞌ ñajúún xa̱bo̱ judío̱, jamí nune̱-majnga̱a̱ idxu̱ún xa̱bo̱ xuajñalóꞌ. 21 Xúꞌkhue̱n máꞌ nusngáa̱ rí ra̱gíꞌmaa mu̱drígúlóꞌ ni máꞌ ra̱jáꞌyoo rí mu̱ꞌne̱-mbáníílóꞌ, numuu rí xa̱bo̱ Róma̱ ñajwanlóꞌ».

22 A̱ꞌkhue̱n mbá ꞌnduꞌ ni̱gímbú-mijnáa xa̱bo̱ xuajen kajngó muxnáa̱ Páblo̱ ga̱jma̱á Síla̱s. Xómáꞌ tsí ñajúún xa̱bo̱ ñajun nixna-ñajun rí mu̱thon-ri̱ya̱ꞌ xtíñúu̱, jamí rí mi̱xpáthuu̱n ga̱jma̱á xkuíya̱. 23 Ído̱ wámbúu̱n ni̱xpa̱thúu̱n mi̱ndaꞌkho, a̱ꞌkhue̱n xa̱bo̱ ñajun nixna-ñajun rí magóo̱ géjwa̱nꞌ, jamí nixná-ñájwíi̱n xa̱bo̱ tsí na̱ña̱wu̱u̱n géjwa̱nꞌ rí ma̱ña̱wúu̱n mújúu̱n. 24 Jamí ikhaa̱ ído̱ nidxawuu̱n rí xkuaꞌnii waꞌxná-ñájwíi̱n, a̱ꞌkhue̱n nixudii̱n ná géjwa̱nꞌ rí i̱tha̱án awúún, xúꞌkhue̱n máꞌ nixudaa̱ nakhúún ná iñúu ixe̱ ji̱ñu̱u̱ rí naruꞌwá-ti̱gi̱in xa̱bo̱.

25 I̱ndo̱ó máꞌ numuu rí ído̱ neꞌne tikhuu mbroꞌon, Páblo̱ ga̱jma̱á Síla̱s nuthán-jáñíi̱ Ana̱ꞌlóꞌ, nuni̱i̱ ajmúú inuu Ana̱ꞌlóꞌ, jamí i̱ꞌwíin xa̱bo̱ tsí traꞌi̱in ná géjwa̱nꞌ nu̱dxawúu̱n. 26 A̱ꞌkhue̱n nda̱a̱ ajngóo gakhe̱ mi̱ndaꞌkho nixma, rí asndo nakhúu géjwa̱nꞌ niꞌba̱a̱n. Jamí núkho̱ ni̱ma̱ꞌthoo mbá xúgíí xkrugoo géjwa̱nꞌ, xúꞌkhue̱n máꞌ nikhúu mbá xúgíí ñuu ajwa̱nꞌ rí xtuꞌúún ga̱jma̱á xa̱bo̱. 27 Ído̱ nijwi̱i xa̱bo̱ tsí na̱ña̱wu̱u̱n géjwa̱nꞌ, jamí ndiꞌyoo̱ rí ja̱ma̱ꞌtha xkrugoo géjwa̱nꞌ, a̱ꞌkhue̱n niríye̱e̱ꞌ chídii̱ kajngó maxíya̱-mine̱e̱ꞌ, numuu na̱ju̱mu̱u̱ rí nigáñúú xa̱bo̱ tsí traꞌi̱in géjwa̱nꞌ. 28 Xómáꞌ Páblo̱ phú gakhe̱ nindxaꞌwá rí niꞌthúu̱n: «¡Ma̱xátha̱ne ñawún-mina̱ꞌ, numuu rí mbá xúgiáanꞌxo̱ꞌ máꞌ gacháanꞌxo̱ꞌ ge̱jyoꞌ!».

29 A̱ꞌkhue̱n xa̱bo̱ tsí na̱ña̱wu̱u̱n géjwa̱nꞌ ni̱nda̱ꞌa̱ agu, jamí nagáyuu̱ ni̱to̱ꞌo̱o̱ awúún, xúꞌkhue̱n máꞌ asndo naguaꞌaa̱n rí namíñuu̱ nismáti̱go̱o̱ ná nakhúu Páblo̱ ga̱jma̱á Síla̱s. 30 A̱ꞌkhue̱n ikhaa̱ ni̱gu̱wíi̱n ná géjwa̱nꞌ jamí niraxúu̱n:

—Xa̱bo̱ buanuu, dí jaꞌyoo ma̱ne̱ kajngó ma̱jríñu̱úꞌ rá.

31 Xómáꞌ ikhii̱n nitháa̱n:

—Ga̱nimba̱a̱ꞌ xtayáá Táta̱ Jesukrísto̱, kajngó ma̱jríñáaꞌ ikháánꞌ, jamí ma̱jáwíin xa̱bo̱ guꞌwáaꞌ.

32 A̱ꞌkhue̱n ikhii̱n nitháa̱n ajngóo̱ Táta̱, ikhaa̱ gajmíi̱ mbá xúgíin xa̱bo̱ tsí júwa̱ꞌ ná guꞌwóo̱. 33 Jamí ikhaa máꞌ mbroꞌon rúꞌkhue̱n, xa̱bo̱ tsí na̱ña̱wu̱u̱n géjwa̱nꞌ niꞌjñáa̱ ná nijámbi̱yu̱u̱ꞌ Páblo̱ ga̱jma̱á Síla̱s. A̱ꞌkhue̱n mbá nacha̱ máꞌ waxúꞌdu-maꞌáa̱n ná awúun iya, ikhaa̱ jamí mbá xúgíin xa̱bo̱ guꞌwóo̱ waxúꞌdu-maꞌíin ná awúun iya. 34 A̱ꞌkhue̱n ni̱ka̱ jaguu̱n ná guꞌwóo̱, jamí nistrámee̱ rí mu̱pho̱. Jamí phú nadxu a̱kuii̱n, ikhaa̱ gajmíi̱ mbá xúgíin xa̱bo̱ guꞌwóo̱, numuu rí nanimbúu̱n juyáa̱ Ana̱ꞌlóꞌ.

35 Ído̱ ni̱mbiꞌi, a̱ꞌkhue̱n tsí ñajúún xa̱bo̱ ñajun ni̱xu̱ꞌmii̱ xa̱bo̱ magóó juñu̱ú ajngáa ríge̱ꞌ ná inuu xa̱bo̱ tsí na̱ña̱wu̱u̱n géjwa̱nꞌ: «Atatsíñúú xa̱bo̱ tsúꞌkhue̱n magúu̱n». 36 A̱ꞌkhue̱n xa̱bo̱ tsí na̱ña̱wu̱u̱n géjwa̱nꞌ niꞌthúun Páblo̱ ajngáa ríge̱ꞌ:

—Xa̱bo̱ ñajun nuxna-ñajwinꞌ rí ma̱ni̱ꞌñálaꞌ. Ikhaa jngó rí xúge̱ꞌ rá, ma̱goo máꞌ ma̱ga̱jnáaꞌlaꞌ, jamí tsímáá gúꞌgua̱aꞌlaꞌ.

37 Xómáꞌ Páblo̱ niꞌthúún xa̱bo̱ tsí niguwá juñu̱ú ajngáa:

—Ni̱xpa̱tháa̱nꞌxo̱ꞌ mi̱ndaꞌkho ná inúú xa̱bo̱, maske máꞌ túra̱jwe̱e̱ꞌ xí gakon rí guáꞌdááxo̱ꞌ aꞌkhán. Ikháanꞌxo̱ꞌ tsáanꞌ ñajwanxo̱ꞌ xa̱bo̱ Róma̱, ni̱xu̱dáa̱nꞌxo̱ꞌ géjwa̱nꞌ. Jamí xúge̱ꞌ nandúu̱n rí mu̱rawiáa̱nꞌxo̱ꞌ ngu̱ꞌwa̱ ráanꞌ. ¡Na̱nguá, ma̱xáꞌne xúꞌkhue̱n! A̱guwée̱ꞌ jmínii̱ ikhii̱n mu̱rawiáa̱nꞌxo̱ꞌ.

38 A̱ꞌkhue̱n xa̱bo̱ tsí niguwá juñu̱ú ajngáa nigúu̱n ná inúú xa̱bo̱ ñajun, jamí nithúu̱n ajngáa rí niꞌthán Páblo̱. Ído̱ xa̱bo̱ ñajun ni̱dxawíín rí xa̱bo̱ Róma̱ ñajúu̱n, phú nimíñúu̱. 39 A̱ꞌkhue̱n nigóo̱ jmínúu̱ꞌ gúnda̱ꞌáa̱ Páblo̱ ga̱jma̱á Síla̱s rí mune̱ mba̱a̱ a̱kuíi̱n juñúu̱. Ni̱rawíi̱n ná géjwa̱nꞌ, jamí ni̱ndu̱ꞌúu̱n rí ma̱ga̱jnáa̱ ná awúun xuajen. 40 Ído̱ nigájnáa̱ ná géjwa̱nꞌ, a̱ꞌkhue̱n nigóo̱ ná guꞌwóo Lídia̱. Ikhín ndiñúu̱ a̱ngia̱nꞌlóꞌ jamí nixnaa̱ la tsiakhe̱. Nda̱wa̱á a̱ꞌkhue̱n nigájnúu̱ nigóo̱.