Atos 2

Pédro̱ naꞌthán-ráꞌa a̱pha̱ ná inúú mbaꞌiin xa̱bo̱

14 A̱ꞌkhue̱n Pédro̱ ni̱we̱je̱ gajmíí tsí mbá gu̱wa̱ꞌ i̱mbi̱in (11), nixúxi̱i̱ a̱ꞌwóo̱ jamí niꞌthúu̱n: «Xa̱bo̱ buanuu judío̱, jamí mbá xúgiáanꞌlaꞌ tsáanꞌ juwalaꞌ ná Jerusalén ge̱jyoꞌ, a̱gu̱ya̱álaꞌ dí ñajuun rí niríga̱, jamí gu̱dxawíín májánlaꞌ rí ma̱tha̱nꞌlaꞌ. 15 Tsíjngi̱in xa̱bo̱ tsíge̱ꞌ, xómá rí na̱ju̱ma̱ꞌ ikháanꞌlaꞌ, numuu rí ni̱kú máꞌ mijnagu̱wa̱ꞌ i̱ka̱ ajwa̱nꞌ rí miꞌcha̱. 16 Ikhaa ríge̱ꞌ ñajuun rí niꞌthán Joél, tsí ni̱gu̱wíjnga̱a ajngóo Ana̱ꞌlóꞌ wajyúú:

17 "Naꞌthán Ana̱ꞌlóꞌ: awúun mbiꞌi rí na̱ka̱-rayámba̱ numbaa,

ma̱xnu̱ú Xu̱ꞌ mbá xúgíin xa̱bo̱ numbaa.

I̱jña̱ꞌlaꞌ tsí xa̱bekha jamí i̱jña̱ꞌlaꞌ tsí go̱ꞌo̱ mu̱rawíjnga̱a ajngóꞌ.

Tsí jñáma mbuyáa̱ inu-mbiꞌíí gáꞌne Ana̱ꞌlóꞌ,

jamí tsí xa̱bo̱ buanuu Ana̱ꞌlóꞌ maꞌthúu̱n ga̱jma̱á majñu̱u̱ xnuꞌndaa.

18 Jamí gakon máꞌ rí mbiꞌi rúꞌkhue̱n ma̱xnu̱ú Xu̱ꞌ yumbéꞌ,

kajngó xa̱bekha jamí go̱ꞌo̱ mu̱rawíjnga̱a ajngóꞌ.

19 Jamí ma̱ne̱ rí phú wáá ná mikhuíí,

xúꞌkhue̱n máꞌ ma̱ri̱gá rí phú ma̱makúún xa̱bo̱ gáꞌne ná inuu numbaa:

iꞌdi jamí agu, xúꞌkhue̱n máꞌ ru̱jmbo̱oꞌ gúní.

20 Xómáꞌ a̱kha̱ꞌ ma̱ꞌni̱i mijína,

jamí go̱nꞌ ma̱ꞌni̱i xómá iꞌdi,

nákhí rí xóó tsíga̱nú mbiꞌi rí ma̱ꞌkha̱a Táta̱.

Mbiꞌi rí phú mba̱a̱ jamí phú mitsaan ñajuun ne̱.

21 Jamí jámba̱a̱ tsí naxrígo̱o̱ mbiꞌyuu Táta̱,

ma̱jríya̱a̱ꞌ".*2.17-21 Ajngáa ríge̱ꞌ na̱ꞌkha̱ ná I̱yu̱u̱ꞌ Joél 2.28-32.

22 »Xa̱bo̱ buanuu Israél, gu̱dxawíínlaꞌ ajngáa ríge̱ꞌ: Jesús tsí na̱ꞌkha̱ ná Nasarét, Ana̱ꞌlóꞌ nisngájma rí xtáa ga̱jma̱á nindxu̱u̱ ná majña̱ꞌlaꞌ ga̱jma̱á rí phú wáá, jamí rí ma̱makualóꞌ rí neꞌne Ana̱ꞌlóꞌ ná inalaꞌ ga̱jma̱á majñu̱u̱ ikhaa̱, xómá rí ndu̱ya̱á jmína̱áꞌ ikháanꞌlaꞌ. 23 Ikhaa tsíge̱ꞌ waxnáxi̱i̱ xómá rí awuun Ana̱ꞌlóꞌ jamí xómá rí asndo nákhí máꞌ wapha ndaꞌyoo̱ rí ma̱ri̱gá. Ikháanꞌlaꞌ ni̱rtuwii̱n xúꞌkhue̱n máꞌ ni̱xíya̱a̱laꞌ ga̱jma̱á majñu̱ú xa̱bo̱ tsí ra̱májíin, jamí ni̱dujmaa̱laꞌ ná ixe̱ krúsi̱. 24 I̱ndo̱ó máꞌ numuu rí Ana̱ꞌlóꞌ neꞌne rí mbayáa̱ mbiꞌyuu̱, jamí neꞌne-jríya̱a̱ꞌ inuu ski̱yu̱u̱ꞌ tsí naꞌne rí ma̱ja̱ñúú xa̱bo̱, numuu rí tsiakhe̱ rúꞌkhue̱n tsíꞌngo̱o̱ ne̱ rí ma̱gi̱ꞌdaa̱ mbá jayu. 25 Numuu rí thúngaa Dabíd naꞌthán ga̱jma̱á numuu Jesús:

"Jámba̱ miꞌtsú nda̱yo̱o̱lo̱ꞌ Táta̱ ná inuꞌ.

Numuu rí ikhaa̱ xtáa̱ ná ñawún mújúnꞌ,

nda̱a̱ rí ma̱ꞌne rí ma̱ba̱ñu̱úlo̱ꞌ.

26 Ikhaa numuu rúꞌkhue̱n nixtáá gagi,

jamí nadxu a̱kui̱nꞌ ne̱ne̱ ajmúú,

jamí asndo ga̱jma̱á mbá jañii a̱kui̱nꞌ mba̱ya̱a xu̱ꞌlo̱ꞌ.

27 Numuu rí ma̱xáta̱tsi̱ꞌñáá ními̱ꞌ ná iñá-wajíín,

ni máꞌ ma̱xáta̱tsi̱ꞌñáá rí Xa̱bia̱aꞌ tsí Jaꞌwii mi̱ga xuyuu.

28 Nithane̱ rí ma̱ne̱-núwíinlo̱ꞌ jambo̱o̱ rí ma̱ju̱wá jámuu xa̱bo̱,

jamí ma̱tha̱ne̱ rí ma̱xtáálo̱ꞌ gagi ná inaaꞌ".*2.25-28 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 16.8-11.

29 »Xa̱bo̱ buanuu a̱ngui̱nꞌ, nandoꞌ ma̱tha̱nꞌlaꞌ rí gakon ga̱jma̱á numuu táta̱-xi̱ꞌñálóꞌ Dabíd. Nákhí rí ikhaa̱ nijáñuu̱, waꞌdii̱ la, jamí nduꞌyáálóꞌ rí iñá-wajñuu̱ kri̱ga̱ ne̱ ná majña̱ꞌlóꞌ asndo mbiꞌi xúge̱ꞌ. 30 I̱ndo̱ó máꞌ numuu rí Dabíd ninindxu̱u̱ tsí ni̱gu̱wíjnga̱a ajngóo Ana̱ꞌlóꞌ, jamí ndaꞌyoo̱ máꞌ rí Ana̱ꞌlóꞌ nixuda-mina̱ꞌ ga̱jma̱á nindxu̱u̱ rí ná majñu̱ú xa̱bo̱ ri̱jyu̱u̱ꞌ ma̱ꞌkha̱ Krísto̱, tsí ma̱nindxu̱u̱ thúngaa. 31 Wapha máꞌ ndiꞌyoo̱ rí ma̱ri̱gá, ikhaa jngó niꞌthée̱n rí mbayáa mbiꞌyuu Krísto̱, rí ma̱xánguanúu nímii̱ ná iñá-wajíín, ni máꞌ xuyuu̱ ma̱xíga. 32 Ikhaa Jesús tsíge̱ꞌ ndiyáa̱ mbiꞌyuu̱ neꞌne Ana̱ꞌlóꞌ, jamí mbá xúgiáanꞌ ikháanꞌxo̱ꞌ ndi̱ya̱áxo̱ꞌ rúꞌkhue̱n. 33 Rí xúge̱ꞌ rá, waxúxii̱ mikhuíí jamí xtáa̱ ná ñawún mújúun Ana̱ꞌlóꞌ. A̱ꞌkhue̱n ni̱grui̱guíi̱ Xu̱u̱ꞌ Ana̱ꞌlóꞌ neꞌne Tátée̱, wámba̱ rúꞌkhue̱n ikhaa̱ nixúngua̱a̱ꞌ rí mu̱dríguíi̱ ikháanꞌxo̱ꞌ xómá rí nixuda-mine̱e̱ꞌ. Ikhaa rúꞌkhue̱n ñajuun rí ndu̱ya̱á ikháanꞌlaꞌ jamí nu̱dxawíínlaꞌ xúge̱ꞌ. 34 Numuu rí Dabíd tátsimaa̱ mikhuíí, i̱ndo̱ó máꞌ numuu rí ikhaa̱ niꞌthée̱n:

"Táta̱ Mikhuíí niꞌthúun Tátéꞌ:

‘Araꞌún ná ñawún mújúnꞌ ge̱jyoꞌ,

35 asndo gáskuíji̱in xa̱bo̱ sia̱nꞌ dríga̱a̱ꞌ ná agoo nakhuáaꞌ’ ".*2.34-35 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 110.1.

36 »Ikhaa jngó, gu̱dxawíín mújúún mbá xúgíin xa̱bo̱ Israél, rí Jesús tsíge̱ꞌ, tsí ikháanꞌ ni̱dujmaalaꞌ ná ixe̱ krúsi̱, Ana̱ꞌlóꞌ neꞌne rí ma̱nindxu̱u̱ Táta̱ jamí Krísto̱».

37 Ído̱ ni̱dxawíi̱n ajngáa rúꞌkhue̱n, a̱ꞌkhue̱n phú nitájwíin a̱kuíi̱n, jamí nitháa̱n Pédro̱ xúꞌkhue̱n máꞌ i̱ꞌwíin tsí nixúngui̱inꞌ Jesús:

—Xa̱bo̱ buanuu a̱ngia̱nꞌxo̱ꞌ, dí jaꞌyoo mu̱ne̱xo̱ꞌ rá.

38 A̱ꞌkhue̱n Pédro̱ niꞌthúu̱n:

—Ga̱thanga̱a a̱kia̱nꞌlaꞌ ná inuu Ana̱ꞌlóꞌ, jamí mbámbáa tsí ikháanꞌlaꞌ ga̱jngúun ná awúun iya ga̱jma̱á mbiꞌyuu Jesukrísto̱, kajngó ma̱ꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlaꞌ, a̱ꞌkhue̱n mu̱dríguíilaꞌ Xu̱u̱ꞌ Ana̱ꞌlóꞌ tsí naxniálóꞌ. 39 Numuu rí ikháanꞌlaꞌ jaꞌyalaꞌ rí nixuda-mina̱ꞌ Ana̱ꞌlóꞌ, jamí i̱jña̱ꞌlaꞌ, xúꞌkhue̱n máꞌ mbá xúgíin tsí júwa̱ꞌ tsíngua̱ꞌ, jamí mbá xúgíin máꞌ tsí nandoo Táta̱ Ana̱ꞌlóꞌ mandxaꞌúún.

40 Xkuaꞌnii iꞌthúu̱n, jamí naꞌthán-múꞌúu̱n ga̱jma̱á mbaꞌa i̱ꞌwá ajngáa: «Gu̱ne̱-jríya̱ꞌ-mijnálaꞌ ná majñu̱ú xa̱bo̱ ra̱májíin tsí júwa̱ꞌ mbiꞌi rí juwalóꞌ».

41 Ikhaa jngó, tsí ninimbu̱únꞌ ajngáa rí niꞌthée̱n nijngúún ná awúun iya. Ikhaa máꞌ mbiꞌi rúꞌkhue̱n nijimi̱i xó mbá atsú míl (3 000) wáa xa̱bo̱ ga̱jma̱á nindxúu̱n.