1 «Xa̱bo̱ buanuu a̱ngui̱nꞌ jamí xa̱bo̱ buanuu ede̱, gu̱dxawíínlaꞌ rí ma̱tha̱n-mbáá ga̱jma̱á numuꞌ ná inalaꞌ».

2 Jamí ído̱ ni̱dxawíín xa̱bo̱ rí Páblo̱ naꞌthán ajngáa ebréo̱, a̱ꞌkhue̱n i̱tha̱án neꞌne-wíyuu rawúu̱n. A̱ꞌkhue̱n niꞌthúu̱n xóó:

3 «Gakon máꞌ rí ikhúúnꞌ ñajunꞌ xa̱bo̱ judío̱, ni̱gu̱múú ná xuajen Társo̱ rí ꞌgí ná numbaa Silísia̱, i̱ndo̱ó máꞌ numuu rí niguju̱ún ná xuajen ríge̱ꞌ. Ne̱ne̱-gajma̱a̱ ná inuu táta̱ Gamaliél, xómá naꞌthán jayu xtángoo drígu̱ún táta̱-xi̱ꞌñálóꞌ wajyúú, jamí na̱ne̱-mbánuu mbá xúgíí rí nandoo Ana̱ꞌlóꞌ, xómá rí nu̱ne̱laꞌ mbá xúgiáanꞌlaꞌ xúge̱ꞌ. 4 Ne̱ne̱-ngíníi mi̱ndaꞌkho jamí asndo ni̱gúdíin xa̱bo̱ tsí nanimbu̱únꞌ juyáá gisngáá drígo̱o̱ Jesús. Ni̱guátúun xa̱bekha jamí go̱ꞌo̱, ni̱xu̱ꞌdíi̱n ná géjwa̱nꞌ. 5 Tsí jayá idxu̱ún dxakuun, jamí mbá xúgíin xa̱bo̱ buanuu mangiin nduyáá rí xkuaꞌnii ne̱ne̱. Ikhii̱n nixniꞌ i̱yi̱i̱ꞌ rí ma̱go̱ ma̱xna̱xí ná inúú a̱ngia̱nꞌlóꞌ xa̱bo̱ judío̱ tsí júwa̱ꞌ ná Damásko̱. Nika ikhín kajngó mba̱ꞌñíi xa̱bo̱ tsúꞌkhue̱n, jamí ma̱ꞌkha ja̱guu̱n ná Jerusalén ge̱jyoꞌ, kajngó ma̱gu̱ma-ngíníi̱.

6 »I̱ndo̱ó máꞌ numuu rí ído̱ inu ma̱gánú ná xuajen Damásko̱, xó mbá wakha̱ꞌ niníí wáa eꞌne, a̱ꞌkhue̱n nda̱a̱ ajngóo nimbiꞌi-taꞌa gakhe̱ ná inuꞌ mbá agu rí na̱ꞌkha̱ mikhuíí. 7 A̱ꞌkhue̱n nixpátri̱gu̱ún mbayíí, jamí ni̱dxawuun mbá a̱ꞌwá rí naꞌthínꞌ: "Sáu̱lo̱, Sáu̱lo̱, náá numuu kajngó nadxa̱ꞌ-raraxkoꞌ róꞌ". 8 A̱ꞌkhue̱n ikhúúnꞌ ni̱riꞌña: "Tsáa ñajwaanꞌ róꞌ, Táta̱". Jamí a̱ꞌwá niꞌthínꞌ: "Ikhúúnꞌ ñajunꞌ Jesús tsí na̱ꞌkha̱ ná Nasarét, tsí ikháánꞌ nadxo̱ꞌ-raraxkáá". 9 Jamí xa̱bo̱ tsí nagóó ga̱jma̱á nindxu̱ꞌ gakon máꞌ rí ndiyáa̱ agu jamí nimíñúu̱,* i̱ndo̱ó máꞌ numuu rí táfruꞌúu̱n a̱ꞌwóo tsí naꞌthán ga̱jma̱á nindxu̱ꞌ. 10 A̱ꞌkhue̱n ni̱ra̱xu̱u̱lo̱ꞌ: "Dí jaꞌyoo ma̱ne̱ rá, Táta̱". Jamí ikhaa̱ niꞌthínꞌ: "A̱tu̱xa̱a̱ꞌ mi̱dxo̱ꞌ ná Damásko̱. Ikhín mi̱ꞌtháanꞌ mbá xúgíí rí gíꞌmaa ma̱tha̱ne̱".

11 »A̱ꞌkhue̱n tsí naka gajmíꞌ ni̱ra̱tuu̱n ñawúnꞌ nigóo̱ juñúu̱ ná Damásko̱, numuu nánguá ifrigo̱ꞌ ga̱jma̱á numuu rí phú gakhi̱i̱ agu rí nimbiꞌi-taꞌa ná inuꞌ. 12 Ikhín xtáa mbáa xa̱bo̱ tsí mbiꞌyuu Ananía̱s, tsí májáan a̱kui̱in xómá naꞌthán ná xtángoo, jamí máján kri̱ga̱ ajngáa ga̱jma̱á numuu̱ ná inúú mbá xúgíin xa̱bo̱ judío̱ tsí júwa̱ꞌ máꞌ ikhín. 13 Ikhaa̱ ni̱ꞌkhe̱e̱ gáꞌyeꞌ, jamí niꞌthínꞌ: "Dxájuꞌ Sáu̱lo̱, ga̱mba̱ꞌtha̱a la idaaꞌ". A̱ꞌkhue̱n núkho̱ máꞌ ni̱ma̱ꞌtha̱a iduꞌ, jamí ndiyoo ndi̱yo̱o̱lo̱ꞌ.

14 »Jamí ikhaa̱ niꞌthínꞌ: "Ana̱ꞌlóꞌ tsí ñajuun Anu̱ú táta̱-xi̱ꞌñálóꞌ niraꞌwíín rí ma̱tha̱ne̱-nuwiin rí nandoo̱ ma̱tha̱ne̱, xúꞌkhue̱n máꞌ rí ma̱tha̱ya̱á tsí Jmbii, jamí ma̱ta̱dxawíín ajngóo̱ rí maꞌtháa̱nꞌ máꞌ jmína̱a̱ꞌ. 15 Numuu rí ikháánꞌ ma̱ra̱tha̱n rí gakon ga̱jma̱á numuu̱ ikhaa̱ ná inúú mbá xúgíin xa̱bo̱. Ma̱ra̱tha̱n rí nithayáá jamí rí nitadxawíín. 16 Ikhaa jngó, rí xúge̱ꞌ rá, náxáraꞌthi̱ín xóó. A̱tu̱xa̱a̱ꞌ jamí gi̱xúꞌdu-maꞌáán ná awúun iya, xúꞌkhue̱n máꞌ a̱ta̱nda̱ꞌa̱á Ana̱ꞌlóꞌ rí ma̱ꞌne mba̱a̱ a̱kui̱in jaꞌyoo aꞌkháanꞌ".

17 »Ído̱ nithangu̱ún ná Jerusalén, awúun máꞌ rí xtáá na̱tha̱n-jáñuu Ana̱ꞌlóꞌ ná guꞌwá dxákuun, a̱ꞌkhue̱n ndi̱yo̱o̱ inu-mbiꞌíí. 18 Ndi̱yo̱o̱ Táta̱, jamí naꞌthínꞌ: "¡Nacha̱ gátha̱ne̱! A̱ga̱jnáaꞌ ná Jerusalén ge̱jyoꞌ. Numuu rí ma̱xánimbu̱únꞌ xa̱bo̱ rí ma̱ra̱thu̱ún ga̱jma̱á numuꞌ". 19 Xómáꞌ ikhúúnꞌ ni̱thu̱u̱n: "Táta̱, ikhii̱n nduyáa̱ rí ikhúúnꞌ nika-ra̱ꞌñíi ná awúun mbámbá guꞌwá rí na̱gi̱mbíin xa̱bo̱ judío̱ mbá xúgíin xa̱bo̱ tsí nanimbu̱únꞌ juyaaꞌ ikháánꞌ, kajngó ma̱xu̱ꞌdíi̱n ná géjwa̱nꞌ jamí ma̱ne̱-ngíníi̱. 20 Nákhí waꞌxnáá jamí nijáñuu Estéba̱n, tsí niꞌthúún xa̱bo̱ ga̱jma̱á numaaꞌ, mangúúnꞌ máꞌ nixtáá ikhín, jamí máján máꞌ neꞌne rí nijáñuu̱ i̱yo̱o̱, xúꞌkhue̱n máꞌ ni̱ña̱wu̱u̱n xtíñúú tsí ni̱xíya̱a̱". 21 Xómáꞌ Táta̱ niꞌthínꞌ: "Ayu, numuu rí ikhúúnꞌ na̱xu̱ꞌmáá mi̱dxo̱ꞌ tsíngua̱ꞌ ná inúú xa̱bo̱ tsí ra̱ꞌkháa judío̱ ñajúún"».

22 Jamí xa̱bo̱ tsí mbaꞌiin ni̱dxawíín rí niꞌthán Páblo̱ asndo rí niꞌthée̱n ajngáa rúꞌkhue̱n. A̱ꞌkhue̱n ni̱gíꞌdíi̱n ni̱ndxa̱ꞌwe̱e̱, jamí nithee̱n: «¡Ga̱ja̱ñúu xa̱bo̱ tsúꞌkhue̱n! ¡Nda̱a̱ numuu rí ma̱xtáa̱!». 23 Numuu rí ikhii̱n nu̱ndxa̱ꞌwe̱e̱ máꞌ xúꞌkhue̱n, jamí nudataꞌée̱n xtíñúu̱ ga̱jma̱á yujnda̱ꞌ ná inuu gíñá, 24 a̱ꞌkhue̱n xa̱bo̱ ede̱ drígu̱ún tsí ku̱ra̱tuun ajwa̱nꞌ nixná-ñájun rí mu̱xu̱da̱a̱ꞌ Páblo̱ ná guꞌwá rí gachúu̱n. Xúꞌkhue̱n máꞌ nixná-ñájwii̱n rí mi̱xpáthii̱n kajngó maríye̱e̱ꞌ rawuu̱n náá numuu kajngó xkuaꞌnii nu̱ndxa̱ꞌwa̱ xa̱bo̱ xuajen ga̱jma̱á numuu̱. 25 I̱ndo̱ó máꞌ numuu rí ído̱ júwe̱e̱ꞌ nu̱ru̱ꞌwáa̱ kajngó mu̱xpa̱thíi̱n, a̱ꞌkhue̱n Páblo̱ niꞌthúun xa̱bo̱ tsí naꞌthán-ñájúún tsí ku̱ra̱tuun ajwa̱nꞌ tsí wéje̱ ikhín:

—Á gíꞌmaa mu̱xpa̱thíinlaꞌ mbáa xa̱bo̱ Róma̱ tsí xóó tákujma aꞌkhúun rá.

26 Ído̱ nidxawuun ajngáa rúꞌkhue̱n xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, a̱ꞌkhue̱n ni̱ke̱e̱ gáꞌthúu̱n xa̱bo̱ ede̱ drígúu̱n: «Dí gátha̱ne̱ xúge̱ꞌ rá. Numuu rí xa̱bo̱ Róma̱ ñajuun xa̱bo̱ tsúꞌkhue̱n».

27 A̱ꞌkhue̱n rí xa̱bo̱ ede̱ drígu̱ún tsí ku̱ra̱tuun ajwa̱nꞌ nixuꞌma-mina̱ꞌ jamí niraxu̱u̱ Páblo̱:

—Arathúnꞌ, á gakon rí ikháánꞌ ñajwaanꞌ xa̱bo̱ Róma̱ dxe̱ꞌ.

A̱ꞌkhue̱n Páblo̱ niriꞌña:

—Aan, ikhaa ñajunꞌlo̱ꞌ.

28 A̱ꞌkhue̱n niꞌthán xa̱bo̱ ede̱ drígu̱ún tsí ku̱ra̱tuun ajwa̱nꞌ:

—Ikhúúnꞌ phú mba̱a̱ mbúkha̱a̱ niꞌkhu̱ꞌ kajngó ma̱nindxu̱ꞌ xa̱bo̱ Róma̱.

A̱ꞌkhue̱n Páblo̱ niꞌthúu̱n:

—Xómáꞌ ikhúúnꞌ ñajunꞌ xa̱bo̱ Róma̱ asndo nákhí ni̱gu̱múúlo̱ꞌ.

29 A̱ꞌkhue̱n tsí nune̱-mbáníí rí mu̱xpa̱thíin Páblo̱, nene̱-janíí-mijnée̱ ná inuu̱. Jamí asndo xa̱bo̱ ede̱ drígúu̱n máꞌ mangaa, ído̱ nidxawuu̱n rí Páblo̱ ñajuun xa̱bo̱ Róma̱, phú nimíñúu̱ numuu rí niroꞌwóo̱.

30 I̱mba̱ mbiꞌi, xa̱bo̱ ede̱ drígu̱ún tsí ku̱ra̱tuun ajwa̱nꞌ ndiyoo mba̱ꞌyoo náá numuu kajngó xa̱bo̱ judío̱ nune̱ aꞌkhúun Páblo̱, ikhaa jngó nirakhúu̱ ñuu ajwa̱nꞌ rí xtoꞌwóo̱. A̱ꞌkhue̱n nindxaꞌwúu̱n dxakuun tsí gíꞌdoo numúú, jamí mbá xúgíin xa̱bo̱ buanuu ede̱, xúꞌkhue̱n máꞌ niríya̱a̱ꞌ Páblo̱, jamí ni̱ꞌkha̱ jayáa̱ ná inúú xa̱bo̱ tsúꞌkhue̱n.