Atos 3

Na̱gu̱ma-thanáá mbáa xa̱bo̱ tsí réngui̱i̱

1 Ni̱ka̱ Pédro̱ ga̱jma̱á Juáán ná guꞌwá dxákuun rí atsú i̱ka̱ ajwa̱nꞌ rí wakhíí, ído̱ rí nuthán-jáñíi̱ Ana̱ꞌlóꞌ. 2 Jamí mbámbá mbiꞌi na̱ꞌkha̱ jiꞌyáa ná guꞌwá dxákuun mbáa xa̱bo̱ tsí réngui̱i̱ asndo nákhí máꞌ ni̱gu̱maa. Ikhaa tsúꞌkhue̱n nu̱ꞌgíi̱ ná rawuun xkrugua rí mbiꞌyuu Mitsaan, kajngó ma̱nda̱ꞌa̱-mínu̱u̱ꞌ ná inúú tsí na̱tu̱ꞌu̱ún ikhín. 3 Ído̱ rí xa̱bo̱ tsíge̱ꞌ ndiꞌyoo rí Pédro̱ ga̱jma̱á Juáán inu júwe̱e̱ꞌ ma̱tu̱ꞌúu̱n ná guꞌwá dxákuun, a̱ꞌkhue̱n ni̱ndu̱ꞌúu̱n rí muxná-míníi̱ꞌ. 4 A̱ꞌkhue̱n rí Pédro̱, ga̱jma̱á Juáán ni̱ya̱xi̱i̱ ná inuu, jamí Pédro̱ niꞌthúu̱n: «Atiaxa̱ꞌxo̱ꞌ». 5 A̱ꞌkhue̱n rí xa̱bo̱ tsúꞌkhue̱n niyaxúu̱n, numuu ni̱ju̱mu̱u̱ rí ríga̱ rí ma̱janáa̱ gúne̱. 6 Xómáꞌ Pédro̱ niꞌthúu̱n: «Na̱nguá gúꞌdo̱ꞌ ajwa̱nꞌ miꞌxá ni máꞌ ajwa̱nꞌ mo̱jmo̱ꞌ, i̱ndo̱ó máꞌ numuu rí na̱xna̱a̱ꞌ rí gúꞌdo̱ꞌlo̱ꞌ: ga̱jma̱á majñu̱u̱ Jesukrísto̱, tsí na̱ꞌkha̱ ná Nasarét, a̱tu̱xa̱a̱ꞌ jamí a̱ngriga̱a̱ꞌ».

7 A̱ꞌkhue̱n Pédro̱ niwatuun ñawún mújúu̱n, jamí nixúxi̱i̱. Núkho̱ máꞌ ni̱wi̱ji̱i̱ gúkúu̱ ga̱jma̱á nakhúu̱. 8 Asndo ni̱ki̱xi̱i̱ ni̱wi̱ji̱i̱ ga̱jma̱á nakhúu̱ jamí nigíꞌdu̱u̱n ningrigo̱o̱ꞌ. Ni̱to̱ꞌo̱o̱ gajmíi̱ ná guꞌwá dxákuun, ngrigo̱o̱ꞌ jamí na̱ki̱xi̱i̱, xúꞌkhue̱n máꞌ naꞌne-mba̱a̱ Ana̱ꞌlóꞌ. 9 Mbá xúgíin xa̱bo̱ ndiyáá rí ngrigo̱o̱ꞌ xúꞌkhue̱n máꞌ rí naꞌne-mba̱a̱ Ana̱ꞌlóꞌ. 10 Jamí nene̱-nuwii̱n rí ikhaa̱ ñajuu̱n tsí na̱ge̱ꞌe̱ jayu ná guꞌwá dxákuun na̱nda̱ꞌa̱-mínu̱u̱ꞌ ná rawuun xkrugua rí mbiꞌyuu Mitsaan. A̱ꞌkhue̱n phú nimakúu̱n jamí phú nimíñúu̱ ga̱jma̱á numuu rí niríga̱.