1 Reve Musa na aza a Isra'ila a canaa A̱sulazuva ishipa i nda,

<<N ta canaa A̱sulazuva

adama a na u lyuwai aci suru suru,

a̱vu u vari ido na akumbi e le a mala.

2 A̱sulazuva a ɗa ucira u va̱ ni ishipa i va̱,

waru a̱yi ɗa wo o'woi iwawi i va̱.

A̱yi ɗa A̱sula̱ a̱ va̱, n ta cuwa yi,

A̱sula̱ a dada va̱ waru n ta tara yi na̱ tsugbain.

3 A̱sulazuva za na gurai uvon u ɗa,

A̱sulazuva a ɗa ala a̱ yi.

4 Ikeke yi ido ya Firi'awuna

no oɓolo a̱ a̱soja a̱ yi

wo oco le ta̱ a mala.

Azagbain a Firi'awuna a na a ɗangwai

a liɓato le ta̱ a Mala ma̱ Shili.

5 Mini ma̱ a̱ru'un mo soɗu le ta̱,

a liɓa ta̱ pe za̱la̱ tsa aatali.

6 Ukere u sa'ani wa̱ wu, A̱sulazuva,

u ta̱ nu ucira a̱tsuma̱ a tsugbain.

A̱sulazuva, ukere u sa'ani wa̱ wu

wu kuɗa ta̱ n'yuwatan.

7 A̱tsuma̱ a mgbain n tsugbain tsa̱ wu tsa ɗa

vu variyi aza a na a 'yuwan nuwu.

Vu lyawa ta̱ upan wa̱ wu

wu uta̱ reve u tama le tsa̱ a̱'yuwa̱.

8 Nu ucira u wivuwun u vunu va̱ wu

mini mo ɓolotoi.

Mini ma̱ a̱bunda̱ mo ɓolotoi aganga,

reve mini ma̱ a̱ru'un ma̱ kutsa̱

e memere ma mala.

9 Ma'yuwatan ma damma ta̱,

<N ta saɓa le reve n cina le.

N te ne'eshen itana i na n usai,

reve n tara ili i na n cigai suru.

N ta tala matsun me pe'eni,

reve ukere u va̱ u kototo le.>

10 Reve vi ivula̱ wivuwun wa̱ wu,

reve mala mo soɗu le.

Reve a liɓa tsa̱ rumu a̱ mini ma gbain.

11 A̱tsuma̱ a̱ musula̱ zane ɗa ri tsa̱ wu, A̱sulazuva?

Zane ɗa ri tsa̱ wu a̱tsuma̱ o ulobonu wa akiza,

a̱tsuma̱ a tsugbain o wovon,

a̱tsuma̱ o ulinga wa asalama?

12 Vu canana ta̱ ukere wa̱ wu

reve iɗa i soɗu le.>>

13 <<A̱tsuma̱ e icigi ya̱ a̱ɓula̱ a̱ wu,

vu rono ta̱ ama a̱ wu a na vu tsupayi aɗanga.

A̱tsuma̱ o ucira wa̱ wu

vu kuruyi ne ele a̱ tyo

uba̱ta̱ wu nden wa akiza a̱ wu.

14 Elentsu a uwwa ta̱ reve e je'en lipu,

reve wovon u reme aza a Filistiya.

15 Gogo nda okolo o ngono ma Edom a̱ 'yon ta̱,

reve azagbain a̱ Mowa e reme meje'en ma̱ lipu.

Reve ama a Ka'ana suru e jeruwe,

16 wovon na̱ meje'en ma̱ lipu me reme le.

Nu ucira wu ukere wa̱ wu e isawain kpen

tsa aatali hali she na ama a̱ wu a pasai A̱sulazuva,

hali she na ama a̱ wu a na vu tsulai a pasai.

17 Vu ta̱ ta̱wa̱to le,

vu shuwa̱ le a masasan ma̱ wu, A̱sulazuva,

uba̱ta̱ u na vu yuwain adama a̱ nden ma̱ wu, A̱sulazuva,

A̱a̱'isa̱ a na e ekere a̱ wu a̱ shuwa̱i.

18 A̱sulazuva a ta yuwan

tsugono babu ukotu.>>

19 Ana ido ya Firi'awuna ni ikeke yi ido ya̱ yi na akumbi e ido ya̱ yi a uwai a mala, reve A̱sulazuva a̱ ka̱mba̱to mini ma mala a aci e le, ama a Isra'ila gba a wala ta̱ e iɗa yu u'yewu e memere ma mala. 20 A̱vu Maryamu vumava̱sula̱, zakpara va Haruna tara maganga o ukere wa̱ yi. A̱vu a̱ma̱ci suru o toni yi a yuwusan uro nu uje'en. 21 Reve u cana ishipa i nda:

<<Canayi A̱sulazuva ishipa, adama a na u lyuwai aci suru suru,

u vari ta̱ ido na akumbi e le a mala.>>

22 Reve Musa zuwa ama'a a yuwan mmalu diga a Mala ma̱ Shili a̱ tyo a̱tsumona a̱ Shuru. Reve a yuwan mmalu hali rana ta'atsu, agba a̱ tsura̱ mini mo oso shi. 23 Reve a rawa Mara, agba a gura sowo mini'i shi, adama a na u ri okono. (Adama o ndolo a ɗa e ɗeyi uba̱ta̱'a̱ Mara a na <<Okono.>>) 24 Reve ama'a a yuwaan Musa acingi a dansa, <<Nye tsoo sowo?>>

25 A̱vu Musa showen A̱sulazuva, ɗaɗa A̱sulazuva o roco niyi eepete o uɗanga. Ana u vari niyi a̱ mini, ɗaɗa mini'i u ka̱mba̱i uyo'o.

Lo uba̱ta̱ u ɗaɗa A̱sulazuva a̱ lyungwa̱i ama a̱ yi, reve u ca le wila̱ na̱ ritosu waru. 26 U damma, <<Nni i poloo adanshi a̱ A̱sulazuva A̱sula̱ a̱ ɗu atsuvu ulobonu, reve i kuru ili i na u zuwai i kurusu mejege, reve yu uwwa ili i na u zuwai, a̱vu i yuwan ili i na u lobonoi i yuwusan, ma̱a̱ ta̱wa̱a̱ ɗu na̱ ko a̱tsuma̱lima̱ a̱ ta̱ a na n ta̱wa̱yi aza a Masar shi. Adama a na a̱mu ɗa A̱sulazuva za na oo o'woto ɗu gbaga.>>

27 Reve ama'a a yuwan mmalu a̱ tyo Elim, uba̱ta̱ u na u da̱na̱i ne esu a̱ mini kupa ne ejere na̱ ɗanga da̱bina̱ kupocindere. Reve a̱ va̱la̱ lo zuzu na̱ mini'i.