1 Reve Musa ɓoloto aza a Isra'ila suru reve u damma le, <<Apa ili i na A̱sulazuva a zuwai na yaa yuwan, 2 i ta yuwan linga a̱tsuma̱ a rana ta̱li, amma urana we cindere u to o'wo ɗu urana wa akiza, Ashibi urana u wivuwun e ekere a̱ A̱sulazuva. Vuma na suru yuwain ulinga o urana u ndolo a̱ to una yi. 3 She i gba'ato akina a̱tsuma̱ a 'wa ɗu o urana wa Ashibi wan.>>

4 A̱vu Musa damma aza a Isra'ila suru, <<Nda ili i na A̱sulazuva a zuwai i yuwan: 5 A̱tsuma̱ e ili i na i ri na̱ a̱yi, i ca A̱sulazuva uneꞌe. Za na ri no okolo o ucasu suru u ta̱wa̱a̱ A̱sulazuva kucci zinariya ko azurufa na̱ rumushili. 6 Waru a̱a̱ ta̱wa̱a̱ na̱ a̱punda̱ a̱ mini ma̱ bulu nu ushili u ma̱ɗiya̱ na̱ mini ma̱ shili san na̱ a̱punda̱ o okoro a sa'ani ne eleme e mgbele, 7 na̱ kwan va̱ a̱giri'i a na a̱ sukuta̱i ushili na̱ kwan sa'ani na akpata o uɗanga a akashiya. 8 A̱a̱ ta̱wa̱a̱ na̱ mani'in ma̱ zetun adama a fitila ni itana i ma̱guru adama a mani'in mo utsusun na adama a̱ a̱tsuka̱ a̱ ma̱guru, 9 na atali a na a̱ tsu ɗe onis na akapi a atali e ikebe a na aa ɓuɓama e epo na apaɗi a̱ ma̱ka̱ka̱n. 10 Aza a na a gurai ulinga wu ukere a̱tsuma̱ a̱ ɗu suru a̱ ta̱wa̱ a yuwan ili i na A̱sulazuva a zuwai suru: 11 oogodo o uga'asusa'an no Oogodo na aapalutsu a̱ yi na̱ nkoroto va̱ yi na̱ akpata Oogodo o ucuwusan a̱ nge'en a̱ yi na aɗanga a̱ yi na atsura a̱ yi na̱ nda̱na̱ta̱ ma̱ yi, 12 akpati'i na aɗanga a̱ yi ni ikpa̱ta̱tsu i matara mo ume mo unusu nu umuna u na u geshe niyi, 13 na apada na̱ aɗanga a̱ yi ni itana ya̱ yi suru, no opopofu a na tawai, 14 na̱ wisawatan u fitila adama e ekan, ni itana ya̱ yi ni ifitila ya̱ yi oɓolo na̱ mani'in me ele; 15 na̱ masa'a ma̱ a̱tsuka̱ a̱ ma̱guru na aɗanga e le na̱ mani'in mo utsusun ni ili i ma̱guru nu umuna wu una̱ntsu o u'uwata wo oogodo o uga'asusan, 16 na̱ masa'a ma̱ kucci vu ukula̱tosu nu uzatsuwata wa̱ yi wu rumushili na aɗanga a̱ yi, oɓolo ni itana ya̱ yi suru na aasa'atsu ni ikyun a̱ yi; 17 na amuna o ukowo na atsura a̱ yi na̱ nda̱na̱ta̱ ma̱ yi nu umuna wu una̱ntsu wu ukowo; 18 ni irumu i ma̱shuwa̱ mo oogodoꞌo ni irumu yu ukowo'o na amunga e le; 19 na̱ a̱tugu o uga'an o uɗavu adama a̱ a̱ga̱nda̱ a̱tsuma̱ a̱ A̱a̱'isa̱, na̱ a̱tugu o uga'an a akiza adama a Haruna ganu na̱ a̱tugu o uga'an o olobo a̱ yi o ulinga u le u tsuganu.>>

20 Reve oɓolo aza a Isra'ila suru a̱ ka̱ra̱ a lyawa Musa. 21 Waru aza a na a cigai a ca waru okolo e le a tarai a̱ ta̱wa̱a̱ A̱sulazuva nu uneꞌe adama o ulinga wo Oogodo o Uga'asusan, adama a̱ a̱ga̱nda̱ a̱ yi na̱ a̱tugu o uga'an a akiza a̱vu a̱ ta̱wa̱a̱. 22 Reve ali na̱ a̱ma̱ci suru aza a na a cigai a̱ ta̱wa̱a̱ na̱ kucci le vi iliyatsuvu i zinariya vu cu'un suru: nkawani ni iyeɗi ni ili i yinlu i le ni ili i tsulolobo. Suru nle a ca ta̱ A̱sulazuva zinariya le kucci vu u'ya̱susa̱n. 23 Reve za na suru ri na̱ a̱punda̱ mini ma̱ bulu nu ushili u ma̱ɗiya̱ nu ushili san na̱ a̱punda̱ o okoro a sa'ani ne eleme e mgbele na̱ kwan va̱ a̱giri'i a na a̱ sukuta̱i ushili na̱ kwan sa'ani a̱ ta̱wa̱ ne ele. 24 Za na suru aa gura ca azurufa ko rumushili u ta̱wa̱a̱ ta̱ na̱ a̱yi kucci e ekere a̱ A̱sulazuva. A̱vu za na suru ri na̱ ɗanga akashiya u na aa yuwaan cu'un vu ulinga u ro a̱tsuma̱ o ulingaꞌa u ta̱wa̱a̱ na̱ a̱yi. 25 Reve ka na suru gurai upunda̱ wa̱ a̱punda̱, u yuwan a̱vu a̱ ta̱wa̱a̱ ni ili i na a̱ punda̱i mini ma̱ bulu nu ushili u ma̱ɗiya̱ na̱ a̱punda̱ a̱ shili san na̱ a̱punda̱ a sa'ani o okoro. 26 A̱ma̱ci a na suru okolo e le a tarai a yuwan ulinga nu uguru u le a̱ punda̱ ta̱ e eleme e mgbele'e. 27 Reve azagbain a̱ ta̱wa̱a̱ na atali a na a̱ tsu ɗe onis na akapi a atali e ikebe a na aa ɓuɓama e epo na̱ mapaɗi a̱ ma̱ka̱ka̱n. 28 A̱ ta̱wa̱ ta̱ waru ni itana yu ucita na̱ mani'in adama a fitila na adama a mani'in mo utsusun na adama a̱ a̱tsuka̱ a̱ ma̱guru. 29 Aza a Isra'ila ali na̱ a̱ma̱ci suru aza a na a cigai a̱ ta̱wa̱a̱ ta̱ A̱sulazuva nu uneꞌe wu ucigu wo okolo adama o ulinga u na A̱sulazuva a zuwai a yuwan o una̱ wa Musa suru.

30 Reve Musa damma aza a Isra'ila, <<Uwwai nda, A̱sulazuva a ɗangwai Bezale ulobo wa̱ Uri, ulobo wa̱ Huru vu ugundo wa Yahuza, 31 waru u shiton yi ta̱ na̱ Ruhu va̱ A̱sula̱ nu uguru nu urevu na̱ cu'un vu ulinga wu ukere suru, 32 adama u yuwan yiɗanishi i na aa yuwaan ulinga u zinariya na̱ azurufa na̱ rumushili, 33 u te she'en atali a na oo oto, nu ushe'en wa akpata na̱ cu'un vu ulinga vu ukere suru wu za na gurai. 34 Waru u ca yi ta̱ oɓolo na̱ Oholiyabu ulobo wa Ahisamak vu ugundo wa Dan, uguru u na oo roco ozo o ro. 35 U shiton le ta̱ nu uguru u na aa yuwan cu'un vu ulinga wu ukere na̱ yiɗanishi na̱ yiɗavishi na̱ yikalishi i maɗava ye ekere ya̱ a̱punda̱ a̱ mini ma̱ bulu nu ushili u ma̱ɗiya̱ na̱ za mini ma̱ shili san, na̱ a̱punda̱ o okoro a sa'ani a gura ta̱ cu'un vu ulinga wu ukere biti.