1 Reve A̱sulazuva a damma Musa, <<Gogo i te ene ili i na maa yuwan na̱ Firi'awuna. Nu ucira wu ukere u va̱ n ta zuwa yi u lyawa le a̱ ka̱ra̱. Waru nu ucira wu ukere u va̱ n ta zuwa yi u loso le o uta̱ a̱tsuma̱ e iɗa ya̱ yi.>>

2 Reve gba A̱sula̱ a yuwan adanshi na̱ Musa, <<A̱mu ɗa A̱sulazuva. 3 N roco ta̱ aciya̱va̱ tso Mogono mo Ucira suru uba̱ta̱ wa Ibrahim na̱ Ishiyaku na̱ Yakubu. Agba na ala a̱ va̱ A̱sulazuva, n revetyo le shi. 4 Waru n yuwaan le ta̱ akucunu a na maa ca le iɗa ya Ka'ana, uba̱ta̱ u na a̱ shi a yuwusan nden n tsumocin. 5 Waru mu uwwa ta̱ i'wan ya ama a Isra'ila, aza a na aza a Masar aa zuwusa tsugbashi. Waru n cuwan ta̱ na akucunu a̱ va̱.

6 <<Adama o ndolo, vu damma ama a Isra'ila, <A̱mu ɗa A̱sulazuva. N to uta̱a̱ ɗu o ulinga wi iɓongi wa aza a Masar. N ta wawa ɗu a tsugbashi tsa na yaa yuwusan. Waru n ta tsupaa ɗu nu ukere wu ucira nu uge'etosu wu usuɗuwu. 7 N ta tara ɗu ama a̱ va̱, reve mo o'wo A̱sula̱ a̱ ɗu. Waru i te reve a na a̱mu ɗa A̱sulazuva A̱sula̱ a̱ ɗu, za na uta̱a̱ nɗu a̱tsuma̱ o ulinga wi iɓongi wa aza a Masar. 8 N ta̱ ta̱wa̱to ɗu a̱tsuma̱ e iɗa i na n kucinai nu ukere u va̱ zuva i na maa ca Ibrahim na̱ Ishiyaku na̱ Yakubu. N ta ca ɗu iɗa'a yo o'wo iɗa ya agadu a̱ ɗu. A̱mu ɗa A̱sulazuva.> >>

9 Reve Musa gba damma aza a Isra'ila ili i na A̱sulazuva a dammai, agba o poloo yi atsuvu shi, adama a na okolo a kuɗa le ta̱ na̱ a̱tsuma̱lima̱ o ulinga wu usa̱n u tsugbashi.

10 Reve A̱sulazuva a yuwan adanshi na̱ Musa, 11 <<Ka̱ra̱ a̱ ka̱mba̱ uba̱ta̱ wa Firi'awuna, a̱vu vu damma yi, u lyawa ama a Isra'ila a lyawa iɗa ya̱ yi.>>

12 Reve Musa usu A̱sulazuva, <<Nna aza a Isra'ila o poloo mu atsuvu shi, cine tsa ɗa Firi'awuna oo poloo mu atsuvu? A̱mu ɗa nda n gura adanshi paɗu paɗu shi.>>

13 Reve A̱sulazuva a yuwan adanshi na̱ Musa na̱ Haruna adama a aza a Isra'ila na̱ Firi'awuna mogono ma Masar, reve u zuwa le o uta̱a̱ aza a Isra'ila a̱tsuma̱ e iɗa ya Masar.

14 Ele nda ele ɗa azagbain vu nkaya vu gundo le. Muwun mo olobo ma̱ Roben mawun mo ufaru ma Isra'ila, ele ɗa: Hanoko na̱ Palu na̱ Hezeron na̱ Karmi. Ele nda ele ɗa ugundo wa̱ Roben.

15 Muwun mo olobo ma Saminu ele ɗa: Yemuye, na̱ Yamin na̱ Ohada na̱ Yakin na̱ Zohara na̱ Shawulu mawun ma na ka vi iɗa va Ka'ana matsain, ele ɗa gundo va Saminu.

16 Ele nda ele ɗa ala a̱ muwun mo olobo ma̱ Levi a alabari a limatan le, Gashon na̱ Koha na̱ Merari. Levi yuwan ta̱ a'wan ukpaku na̱ mata'atsu na̱ a̱za̱ e cindere (137).

17 Muwun mo olobo ma Gashon na̱ gundo le ele ɗa: Libini na̱ Shimeyi.

18 Muwun mo olobo ma Koha ele ɗa: Amuram, na̱ Izaha na̱ Heburon na̱ Uziye. Koha gba u yuwan ta̱ a'wan ukpaku na̱ mata'atsu na aza a ta'atsu (133).

19 Muwun mo olobo ma Merari gba ele ɗa: Mali na̱ Mushi. Ele nda ele ɗa gundo va̱ Levi a alabari a limatan le.

20 Amuram zuwa ta̱ Yokabe zawa'a vu usheli va dada va̱ yi, reve gba u matsaan yi Haruna na̱ Musa. Amuram gba u yuwan ta̱ a'wan ukpaku na̱ mata'atsu na̱ a̱za̱ e cindere (137).

21 Muwun mo olobo ma Izaha ele ɗa: Kora na̱ Nefeke na̱ Zikiri.

22 Muwun mo olobo ma Uziye ele ɗa: Mishe na̱ Elizafan na̱ Sitiri.

23 Haruna zuwa ta̱ Elishaba, usheli wa Aminada zawa'a va Nashon, a̱vu u matsaan yi Nadab na̱ Abihu na̱ Eliyaza na̱ Itama.

24 Muwun mo olobo ma̱ Kora ele ɗa: Asiri na̱ Elikana na̱ Abiyasa. Ele nda ele ɗa ugundo wa̱ Kora.

25 Eliyaza mawun ma Haruna ma zuwa ta̱ usheli u ta̱ a̱tsuma̱ e esheli a Futiye, reve u matsaan yi Finiha. Ele nda ele ɗa azagbain a nkaya o ugundo wa̱ Levi.

26 Haruna na̱ Musa nda, ele ɗa aza a na A̱sulazuva a dammai, <<Uta̱yi aza a Isra'ila a̱tsuma̱ e iɗa ya Masar oɓolo oɓolo.>>

27 Ele ɗaɗa aza a na a yuwain adanshi na̱ Firi'awuna mogono ma Masar adama a̱ mota̱a̱ ma aza a Isra'ila a̱tsuma̱ e iɗa ya Masar.

28 O urana u na A̱sulazuva a yuwain adanshi na̱ Musa a̱tsuma̱ e iɗa ya Masar,

29 U damma yi ta̱ a na, <<A̱mu ɗa A̱sulazuva, vu damma Firi'awuna mogono ma Masar ili i na maa dansa wu suru.>>

30 Agba Musa usu ta̱ A̱sulazuva a na, <<Vu reve ta̱ a na a̱mu n gura adanshi paɗu paɗu shi, cine mogono moo poloo mu atsuvu?>>