1 O woto wa ta'atsu ana aza a Isra'ila a lyawai iɗa ya Masar o urana u ndolo u ɗa a rawai a̱ A̱tsumona a Sinai. 2 Ana a̱ 'yoyin diga Refidim, a̱vu a uwa A̱tsumona a Sinai. Reve a̱ va̱la̱ lo a̱ a̱tsumona e ikyun i masasan.

3 Reve Musa kumba a̱ tyo uba̱ta̱ wa̱ A̱sula̱. Reve A̱sulazuva e ɗe yi ɗe zuva masasa'an, a̱vu u damma yi, <<Apa ili i na vaa damma u'wa wa Yakubu na aza a Isra'ila: 4 <A̱ɗu na aciya̱ɗu ye ene ta̱ ili i na n yuwain na aza a Masar, na̱ cine n tanu nɗu e evelu tsa̱ a̱a̱kuru, reve n ta̱wa̱to ɗu uba̱ta̱ u va̱. 5 Gogo, ni i yuwan tsutoni na adanshi a̱ va̱ ulobonu, waru i yuwan tsutoni na akucunu a̱ va̱, ko na wo o'woi uvaɗi u nda suru za va̱ ɗa, i to o'wo ama a na n ɗangwai. 6 I to o'wo ama nan ganu a na a̱ ri n yuwusaan mu a̱ga̱nda̱ ni iɗa ya akiza. Ili i na vaa damma aza a Isra'ila a ɗa nda.> >>

7 Ɗaɗa Musa cipa̱i, a̱vu u ɓoloto azagbagbain a Isra'ila wira̱ u ta̱. Reve u damma le ili i na A̱sulazuva a dammai suru. 8 Reve ama'a a̱ usu una̱ta̱, <<Tsu ta yuwan ili i na A̱sulazuva a dammai suru.>> Reve Musa ka̱mbuwa̱ A̱sulazuva ili i na a dammai. 9 Reve A̱sulazuva a damma Musa, <<N ta̱ ta̱wa̱ ya̱'a̱ wu a̱tsuma̱ e eleshe e irumbu, adama ama a uwwa na̱ maa yuwusan adanshi na̱ a̱vu adama waru a̱ usu ili na vu dammai kucci.>> Reve Musa damma A̱sulazuva ili i na ama a dammai.

10 Reve A̱sulazuva a damma yi, <<'Ya̱wa̱ uba̱ta̱ wa ama, reve vu zuwa le o o'wo cece ana'an na̱ nfa'an, a̱ za̱za̱'wa̱ itana i le. 11 A̱vu a̱ da̱na̱ ufoɓu o urana wa ta'atsu, adama a na o urana u ndolo u ɗa a̱mu A̱sulazuva ma̱a̱ cipa̱ zuva Masasan ma Sinai e esu a ama suru. 12 Vu zuwaa ama utyo a̱ ka̱nda̱ruwa̱ masasa'an, reve vu damma le a yuwan ugbozu she a kumba zuva wan, ko a̱ ju'wa̱n masasan wan. Adama a na za na ju'wa̱in masasa'an suru, na amayun u ta̱ kuwa̱. 13 Na a ciga 'yuwan a vara yi na atali ko a tawan yi na aya, agba ko ukere wa̱a̱ ju'wa̱n yi shi. Ko na̱ shi iliyamunga i ɗa ko vuma, aa lyawa yi wuma shi. A mantsa ma na e ivulula̱i aavana a̱ a̱giri'i, reve ama a̱ ta̱wa̱ zuzu na̱ masasa'an.>> 14 Ɗaɗa Musa cipa̱i a masasan reve u zuwa ama'a o o'wo cece, reve a̱ za̱'wa̱ itana i le. 15 Reve u damma ama'a, <<Foɓoi adama o urana wa ta'atsu; she za raɓato ka va̱ yi wan.>>

16 O usana wu urana wa ta'atsu, reve a yuwan tsata ni imaɗatsu a̱vu eleshe a̱ lima̱ da̱n a̱ ɓa̱ru masasa'an. Reve ama'a a uwwa wivulu wa aavana adama a na u yuwain mesun lon. Aza a na a̱ da̱na̱i lo suru e reme ta̱ meje'en ma̱ lipu. 17 Reve Musa tara ama'a o uta̱ uba̱ta̱ u na a̱ va̱la̱i, adama a ga'an na̱ A̱sula̱, reve e isawan e ikyun i masasa'an. 18 Mikyon m ɓa̱ru ta̱ Masasan ma Sinai, adama a na A̱sulazuva a̱ cipa̱ ta̱ zuva va̱ yi she damma akina, hali masasa'an ma̱ jinga̱ɗa̱. Mikyo'on m ɓa̱ru yi ta̱ she damma mikyon ma̱ a̱gugwa̱ mo ukula̱tosu wu mpondo. 19 Reve mesun ma aavana ma̱ 'yosun lon. A̱vu Musa yuwan adanshi, reve uɗyo wa̱ A̱sula̱ u usu yi she damma tsata. 20 A̱vu A̱sulazuva a̱ cipa̱ zuva Masasan ma Sinai, reve u ɗe Musa kumba zuva masasa'an. Ɗaɗa Musa kumbai zuva. 21 Ɗaɗa A̱sulazuva a damma niyi, <<Cipa̱ vu ɓara ama adama a pasa a̱ ta̱wa̱ e ene A̱sulazuva wan, reve gba na̱ a̱bunda̱ e le a̱ kuwa̱. 22 Ko nan ganu na a̱ tsu rawusa zuzu na̱ A̱sulazuva, na a ciga a 'yuwan o o'woto aciyele na akiza, na̱ ne ɗa shi n to kototo le.>> 23 Reve Musa damma A̱sulazuva, <<Ama'a a̱ ri n ne aa kumba Masasan ma Sinai shi, adama a na a̱vu na aciya̱wu vu ɓara tsu ta̱ ɗe vu damma, <I zuwa utyo a̱ ka̱nda̱ruwa̱ masasa'an i tara yi cece.> >> 24 Reve A̱sulazuva a damma Musa, <<Cipa̱ reve vu tara Haruna a kumba oɓolo na̱ a̱vu; amma she vu lyawa ganu ko ama a pasa a kumba a̱ ta̱wa̱ uba̱ta̱ u va wan. Na̱ ne ɗa shi n to kototo le.>> 25 Ɗaɗa Musa ka̱ra̱i a̱ cipa̱ uba̱ta̱ wa ama reve u damma le.