1 Reve A̱sulazuva a damma Musa, 2 <<Damma ama a Isra'ila a̱ ta̱wa̱a̱ mu nu uneꞌe. Vu ushiya̱ mu uneꞌe u na vuma biti okolo a̱ yi a ca niyi u ca mu. 3 Apa nda cu'un vu ne'e na va̱a̱ ushi e ekere e le: zinariya na̱ azurufa na̱ rumushili; 4 na̱ a̱punda̱ a̱ mini ma̱ bulu nu ushili u ma̱ɗiya̱ na̱ mini ma̱ shili no okoro a sa'ani ne eleme e mgbele, 5 na̱ kwan va̱ a̱giri'i a na a̱ sukuta̱i ushili na̱ kwan sa'ani na akpata o uɗanga a akashiya; 6 na̱ mani'in ma̱ zetun adama a fitila ni itana yu ucita adama a mani'in mo utsusun na adama a̱ a̱tsuka̱ a̱ ma̱guru; 7 na atali a na a̱ tsu ɗe onis* na akapi a atali e ikebe a na aa ɓuɓama a epo no oosonu a̱ ma̱ka̱ka̱n. 8 Reve waru a yuwaan mu a̱a̱'isa̱ uba̱ta̱ u na ma̱a̱ da̱nu a̱tsuma̱ a ama a̱ va̱. 9 I yuwan yi cine moo roco wu ni itana i na aa yuwaan ulinga pe suru tsoyi.>>

10 <<Vu zuwa le a yuwan aakpati a ɗanga akashiya uga'an wa̱ yi ana a ta'atsu na akapi, washin wa̱ yi waru ana e re na akapi, mishin waru ana e re na akapi. 11 A̱vu vu sura yi na̱ zinariya can, a̱ a̱tsuma̱ na alanga suru, reve vu ginda̱la̱ nge'en ma̱ yi na̱ zinariya. 12 Vu zuɗa̱ nkawani n zinariya n na̱shi reve vu zuwa le a ana a̱ na̱shi va aakpati'i, ejere a̱ nge'en n ta̱ ejere waru a̱ nge'en n ro. 13 Vu yuwan aɗanga a ɗanga akashiya, reve vu sura le na̱ zinariya. 14 A̱vu vo otoloi aɗanga'a a̱ wungu wu nkawani wu nge'e'en adama o utanusu wa aakpati'i.>> 15 Aɗanga'a a̱ ta̱ da̱na̱ pe a̱ wungu wa aakpati'i; o foɗo le shi. 16 Reve vu zuwa pe a̱tsuma̱ a akpati'i Nzuwulai n na maa ca wu. 17 Vu yuwaan aakpati'i ikpa̱ta̱tsu i zinariya can i na yoo o'wo uba̱ta̱ u matara mo ume mo unusu uga'an wa̱ yi ana a ta'atsu na akapi washin waru ana e re na akapi. 18 A̱vu vu yuwan nan kerobobi* e re n zinariya na a rumai a̱ nge'en n re mi ikpa̱ta̱tsu m matara mo ume mo unusu'u. 19 Vu zuwa kerobi ta̱ o ukosu u ta̱ za ve ire waru a̱ nge'en n ndeɗe. Vu yuwan nan kerobobi'i ili i ta̱ ni ikpa̱ta̱tsu'u a̱ nge'en n re'e. 20 Evelu a nan kerobobi'i a̱ da̱na̱ ta̱ mishin ubapu, e ikpa̱ta̱tsu i matara mo ume mo unusu. Nan kerobobi'i a̱ da̱na̱ a̱ nka̱la̱la̱i a̱ ka̱lyuwusa̱ ikpa̱ta̱tsu'u. 21 Vu zuwa ikpa̱ta̱tsu'u zuva va akpati'i, reve vu zuwa pe atali a na a ɗanai ɗe Nzuwulai'i, za na maa ca wu. 22 Ɗe ɗa maa ga'asan na̱ a̱vu, reve n yuwan adanshi na̱ a̱vu e ikpa̱ta̱tsu ya Akpati a Nzuwulai 'i e memere ma nan kerobobi n re n na n ri zuva vi ikpa̱ta̱tsu'u adama e ili i na n zuwai i na maa ca wu adama a aza a Isra'ila. 23 Vu yuwan apada a̱ ɗanga akashiya uga'an wa̱ yi ana a ta'atsu na akapi, washin wa̱ yi udasuwu anana a̱ ta̱ na akapi mishin ma̱ yi ana e re na akapi. 24 Reve vu sura yi na̱ zinariya can, a̱vu vu ginda̱la̱ nge'en ma̱ yi na̱ zinariya a̱ ka̱nda̱ruwa̱. 25 Waru vu yuwaan apada'a nge'en a̱ ka̱nda̱ruwa̱ washin wu ukere reve vu ginda̱la̱ nge'e'en na̱ zinariya. 26 Vu zuɗa̱a̱ apada'a nkawani n na̱shi n zinariya reve vo oto le o obolu a̱ na̱shi uba̱ta̱ ana a̱ na̱shi a̱ yi. 27 Nkawani'i n ta̱ da̱na̱ zuzu na akpata'a adama a̱ guza̱ aɗanga a na a tsu tanuwa apada'a. 28 Vu yuwan aɗanga na̱ ɗanga akashiya, a̱vu vu sura le na̱ zinariya, adama o utanusu wa apada'a. 29 Reve vu yuwaan yi mpara na̱ ntaɗa na̱ zinariya can, na̱ ndele na̱ munda adama a̱ kucci vi ili yo oso. 30 A̱vu kuci vu zuwa ɗe a apada'a no opopofu a na tawai a̱ da̱na̱ a̱ ma̱ka̱ka̱n ma̱ va̱. 31 <<Vu yuwan wisawatan u fitila u zinariya can, ikyun na aaɗanga a̱ yi vu ruma le, mukkoto ma̱ yi oroci a̱ yipa̱lu na̱ a̱kutsu na̱ yipa̱lu i na i ɓosoi vu yuwan le uɓoluloi. 32 Akatsu a̱ ta̱li a̱ ta̱ ba̱ruwa̱ o uta̱ a̱ nge'en n wisawatan u fitila'a, aza a ta'atsu e eɓele a nda, aza a ta'atsu waru e eɓele a̱ ndeɗe. 33 Mukotto n ta'atsu n na a yuwain nu uruma wo oroci a̱ yipa̱lu i alumo* a̱ ta̱ da̱na̱ a aakatsu a̱ ta̱, aza a ta'atsu waru a aakatsu a na, ne ɗa a̱ da̱na̱ akatsu a̱ ta̱li a na a̱ buruwa̱i o uta̱ a wisawatan u fitila'a. 34 Reve a wisawatan u fitila'a aa yuwan ɗe mukkoto n na̱shi nu uruma wo oroci a̱ yipa̱lu i alumo na̱ a̱kutsu no ototopi. 35 A̱a̱kutsu a̱ ta̱ a̱ da̱na̱ za̱la̱ vu udaru wa akatsu e re a na a̱ ri a aaɗanga a wisawatan u fitila'a, a̱a̱kutsu e ire waru za̱la̱ vu udaru va akatsu e re e ire, a̱a̱kutsu a ta'atsu waru za̱la̱ vu udaru wa ta'atsu suru suru a̱ ta̱ da̱na̱ akatsu a̱ ta̱li. 36 A̱a̱kutsu'u na akatsu'u na̱ wisawatan u fitila'a a̱ da̱na̱ ili i ta̱, a ruma le uɓoluloi na̱ zinariya can.>> 37 <<Reve vu yuwan ifitila i cindere, reve vu zuwa le ɗe a wisawatan u fitila'a adama a ca ekan elime a̱ yi. 38 Vu yuwan makkana mo ukimususa̱n wa akina oɓolo na̱ mutaɗa n zinariya can. 39 Ukunzuwu wu ume u zinariya mata'atsu no ozo o ton can ɗa vaa yuwaan wisawatan u fitila'a ni itana i nda suru. 40 Vu reve vu yuwan le ta̱ cine o roco nuwu a masasa'an tsoyi.>>